Deuteronomio

25 “No saan a nagkinnaawatan ti dua a tao, mabalinda ti dumatag kadagiti ukom.+ Usigen dagiti ukom ti dida nagkinnaawatan ket ideklarada a nalinteg daydiay awan basolna ken dakes daydiay nakabasol.+ 2 Maikari a masapsaplit daydiay dakes,+ pagpakleben ti ukom, sa masaplit iti sanguananna. Ti bilang ti pannakasaplitna ket depende iti kakaro ti dakes nga inaramidna. 3 Mabalinna a sapliten iti 40 a daras.+ Ngem dina surokan ta no itultuloyna a sapliten, maibabain ti kabsatyo iti sanguananyo.

4 “Diyo busalan* ti kalakian a baka bayat nga agir-irik.+

5 “No agaassideg ti pagnanaedan dagiti agkakabsat ket matay ti maysa kadakuada ngem saan a naaddaan iti anak, saan a mabalin a makiasawa ti nabalo a babai iti saan a kapamilia ni lakayna. Ti kayongna ti mangasawa kenkuana ta responsabilidadna dayta.+ 6 Ti inauna nga anakna ket maibilang nga anak ti natay a kabsatna,+ tapno saan a mapunas ti naganna iti Israel.+

7 “No saan a kayat ti lalaki nga asawaen ti nabalo nga ipagna, mapan ti ipagna kadagiti panglakayen idiay ruangan ti siudad ket ibagana, ‘Saan a kayat ni kayongko a taginayonen ti nagan ti kabsatna iti Israel. Saannak a kayat nga asawaen.’ 8 Paayaban dagiti panglakayen ti lalaki ket kasaritada. No saanna latta a kayat ket ibagana, ‘Diak kayat nga asawaen,’ 9 umasideg ti nabalo a babai kenkuana iti sanguanan dagiti panglakayen ket uksotenna ti sandalias+ ni kayongna sa tupraanna ti rupana, ken ibagana, ‘Kasta ti mapasamak iti lalaki a saan a mangtaginayon iti pamilia ti kabsatna.’ 10 Kalpasanna, agdinamagto ti nagan ti pamiliana* iti Israel kas ‘Ti pamilia ti lalaki a nauksot ti sandaliasna.’

11 “No aglablaban ti dua a lallaki ket bumallaet ti asawa ti maysa kadakuada tapno protektaranna ni lakayna babaen ti pananggammatna iti mabagbagi ti kalablaban ni lakayna, 12 masapul a putdenyo ti ima ti babai. Dikay koma maasian* kenkuana.

13 “Dikay mangikarga iti dua a kita ti padagsen a bato iti bag nga awityo,+ maysa a dakkel ken maysa a bassit. 14 Dikay mangidulin iti balayyo iti dua a kita ti pagsukatan,*+ maysa a dakkel ken maysa a bassit. 15 Rumbeng nga umiso ken saan a suitik ti pagtimbangan ken pagsukatanyo, tapno napaut ti biagyo iti daga nga ited kadakayo ni Jehova a Diosyo.+ 16 Ta kagura ni Jehova a Diosyo ti suitik a tao a kasta ti ar-aramidenna.+

17 “Laglagipenyo ti inaramid kadakayo dagiti Amalekita iti dalan idi rumrummuarkayo idiay Egipto,+ 18 no kasano a sinabetdakayo iti dalan ken dinarupda ti amin nga adda iti likudanyo a nabambannog ken agkakapsuten. Saanda a nagbuteng iti Dios. 19 Inton paginanaennakayo ni Jehova a Diosyo manipud kadagiti kabusoryo iti daga nga ited ni Jehova a Diosyo kas tawidyo,+ masapul a papatayenyo amin nga Amalekita tapno saandanton a malaglagip iti baba ti langit.+ Diyo liplipatan dayta.