Deuteronomio

13 “No adda tumaud kadakayo a propeta wenno mangibaga iti masanguanan babaen ti tagtagainep sa mangipakita iti pagilasinan wenno tanda, 2 ket pumudno ti pagilasinan wenno tanda sa ibagana, ‘Sumurottayo kadagiti sabali a dios,’ a saantayo nga am-ammo, ‘ket agserbitayo kadakuada,’ 3 diyo patpatien dayta a propeta wenno managtagtagainep,+ ta subsubokennakayo ni Jehova a Diosyo+ tapno maammuan no ay-ayatenyo ni Jehova a Diosyo iti amin a puso ken iti amin a kararuayo.*+ 4 Rumbeng a sumurotkayo ken Jehova a Diosyo, agbutengkayo kenkuana, tungpalenyo dagiti bilinna, denggenyo ti timekna; agserbikayo laeng kenkuana ken kumpetkayo kenkuana.+ 5 Ngem mapapatay dayta a propeta wenno managtagtagainep+ ta iparparegtana ti panagrebelde ken Jehova a Diosyo—a nangiruar kadakayo idiay Egipto ken nangwayawaya kadakayo iti nakaadipenanyo—tapno suminakayo iti dalan nga imbilin ni Jehova a Diosyo a pagnaanyo. Masapul nga ikkatenyo ti kinadakes iti tengngayo.+

6 “No sililimed nga allilawennakayo ti kabsatyo a lalaki, wenno ti anakyo a lalaki wenno babai wenno ti ipatpategyo nga asawa wenno ti kasingedan a kaduayo, ket ibagana, ‘Agserbitayo kadagiti sabali a dios,’+ dagiti dios a saanyo nga am-ammo wenno dagidi ammayo, 7 ti dios dagiti nasion iti aglawlawyo, asideg man wenno adayo, manipud iti aniaman a paset ti daga, 8 dikay tumulok wenno dumngeg kenkuana,+ diyo met kaasian wenno protektaran; 9 imbes ketdi, masapul a patayenyo.+ Dakayo ti umuna a mangubor tapno mapapatay, sa uboren met ti dadduma pay a tattao.+ 10 Masapul nga uborenyo agingga a matay,+ ta pinanggepna a tallikudanyo ni Jehova a Diosyo, a nangiruar kadakayo idiay Egipto, a nakaadipenanyo. 11 Madamagto daytoy ti intero nga Israel ket agbutengda, ken awanton kadakayo ti agaramid iti aniaman a kinadakes a kas iti daytoy.+

12 “No madamagyo iti maysa kadagiti siudad nga ited ni Jehova a Diosyo a pagnaedanyo, 13 ‘Adda dagiti awan serserbina a lallaki iti tengngayo a nangikagumaan a mamagtallikud kadagiti agnanaed iti siudadda babaen ti panangibagada: “Agserbitayo kadagiti sabali a dios,” dagiti dios a saanyo nga am-ammo,’ 14 masapul nga usigenyo dayta, agimbestigarkayo a naimbag ken agdamagkayo.+ No mapaneknekanyo a pudno a napasamak dayta a makarimon a banag iti tengngayo, 15 masapul a patayenyo iti espada dagiti agnanaed iti dayta a siudad.+ Dadaelenyo ti siudad ken ti amin nga adda iti dayta, agraman dagiti tarakenda.+ 16 Kalpasanna, ummongenyo iti tengnga ti plasa ti amin a naalayo sa puoranyo ti siudad. Agbalin dagita kas daton a mapuoran para ken Jehova a Diosyo. Agtalinaedto a rebba dayta a siudad ket pulos a saanton a mabangon. 17 Dikay mangala iti aniaman a maikari a madadael,*+ tapno bumaaw ti nakaro a pungtot ni Jehova ket kaasian ken paaduennakayo, kas iti inkarina kadagidi ammayo.+ 18 Ta masapul nga agtulnogkayo ken* Jehova a Diosyo babaen ti panangtungpalyo iti amin a bilinna nga intedko kadakayo ita tapno maaramidyo ti umiso iti imatang ni Jehova a Diosyo.+