Deuteronomio

6 “Dagitoy ti bilin, regulasion, ken pangngeddeng nga inted kaniak ni Jehova a Diosyo nga isurok kadakayo, tapno tungpalenyo inton makastrekkayo iti daga a tagikuaenyo, 2 ket agbutengkayo ken Jehova a Diosyo ken tungpalenyo ti amin a linteg ken bilinna nga itedko kadakayo—dakayo, dagiti annakyo, ken dagiti appokoyo+—iti intero a panagbiagyo tapno napaut ti biagyo.+ 3 Masapul a denggenyo, O Israel, ken tungpalenyo a naimbag dagita tapno nasayaat ti pagbanaganyo ken umadukayo unay iti daga a pagay-ayusan ti gatas ken diro, kas inkari kadakayo ni Jehova a Dios dagidi ammayo.

4 “Denggenyo, O Israel: Ni Jehova a Diostayo ket maymaysa a Jehova.+ 5 Masapul nga ayatenyo ni Jehova a Diosyo iti amin a pusoyo ken iti amin a kararuayo*+ ken iti amin a pigsayo.*+ 6 Masapul nga ipapusoyo dagitoy nga ibilbilinko kadakayo, 7 ken masapul nga isuroyo* kadagiti annakyo+ ken isarsaritayo kadakuada no nakatugawkayo iti balayyo, no magmagnakayo iti dalan, no nakaiddakayo, ken no bumangonkayo.+ 8 Igalutyo dagita iti imayo kas pammalagip, ken kas bedbed iti mugingyo.*+ 9 Isuratyo dagita kadagiti hamba ti ridawyo ken kadagiti ruanganyo.

10 “Inton ipannakayo ni Jehova a Diosyo iti daga nga inkarina kadagidi ammayo a da Abraham, Isaac, ken Jacob nga itedna kadakayo+—dagiti dadakkel ken napipintas a siudad a diyo imbangon,+ 11 dagiti balay a napno iti nasayaat a bambanag a diyo nagbannogan, dagiti pagurnongan iti danum a diyo kinali, dagiti kaubasan ken kaykayo ti olibo a diyo immula—ket inton mangankayo ken mapnekkayo,+ 12 agannadkayo tapno saanyo a malipatan ni Jehova,+ a nangiruar kadakayo idiay Egipto, a nakaadipenanyo. 13 Rumbeng a pagbutngan+ ken pagserbianyo+ ni Jehova a Diosyo, ken agsapatakayo laeng iti naganna.+ 14 Dikay agserbi kadagiti sabali a dios, aniaman a dios dagiti tattao iti aglawlawyo,+ 15 ta ni Jehova a Diosyo ket Dios nga agkidkiddaw iti naipamaysa a debosion.+ Ta no saan, makapungtot ni Jehova a Diosyo+ ket ibusennakayo iti rabaw ti daga.+

16 “Diyo suboken ni Jehova a Diosyo,+ kas iti panangsubokyo kenkuana idiay Massa.+ 17 Tungpalenyo a naimbag dagiti bilin ni Jehova a Diosyo ken dagiti pammalagip ken regulasionna nga imbilinna kadakayo. 18 Masapul nga aramidem ti umiso ken naimbag iti imatang ni Jehova, tapno rumang-ayka ket makastrek ken matagikuam ti nasayaat a daga nga inkari ni Jehova kadagidi ammam,+ 19 babaen ti panangpapanawna iti amin a kabusormo, kas inkari ni Jehova.+

20 “Iti masanguanan, no damagento ti anakyo, ‘Ania ti kaipapanan dagiti pammalagip, regulasion, ken pangngeddeng nga imbilin kadakayo ni Jehova a Diostayo?’ 21 isungbatyonto kenkuana, ‘Nagbalinkami nga adipen ni Faraon idiay Egipto, ngem inruarnakami ni Jehova manipud Egipto babaen ti mannakabalin nga ima. 22 Gapuna, nakitatayo ti panangaramid ni Jehova kadagiti pagilasinan ken milagro, a nakaro ken makadidigra, iti Egipto,+ ken ni Faraon, ken iti intero a sangakabbalayanna.+ 23 Inruarnatayo sadiay ket impannatayo ditoy tapno itedna ti daga nga inkarina kadagidi ammatayo.+ 24 Kalpasanna, binilinnatayo ni Jehova a tungpalentayo amin dagitoy a regulasion ken agbutengtayo ken Jehova a Diostayo agpaay a pagimbagantayo iti agnanayon,+ tapno agtalinaedtayo a sibibiag,+ kas ita nga aldaw. 25 Maibilangtayo a nalinteg no tungpalentayo a naimbag amin dagitoy a bilin kas panagtulnog ken* Jehova a Diostayo, kas imbilinna kadatayo.’+