Deuteronomio

15 “Iti ngudo ti tunggal pito a tawen, masapul a mangwayawayaka.+ 2 Kastoy ti maaramid: Kanselaren ti nagpautang ti utang ti kaarrubana. Saanna a piliten nga agbayad ti kaarruba wenno kabsatna, ta imbilin ni Jehova a makanselar ti utang.+ 3 Mabalinmo a piliten nga agbayad ti ganggannaet,+ ngem kanselarem ti aniaman nga utang ti kabsatmo. 4 Awanto kadakayo ti agbalin a napanglaw, ta sigurado a bendisionannakayto ni Jehova+ iti daga nga ipatawid kadakayo ni Jehova a Diosyo, 5 no la ket ta ikagumaanyo ti agtulnog iti timek ni Jehova a Diosyo ken tungpalenyo a naimbag ti amin a bilin nga itedko kadakayo ita nga aldaw.+ 6 Ta bendisionannakayto ni Jehova a Diosyo kas inkarina kadakayo, ket agpautangkayto* iti adu a nasion, ngem saanyonto a kasapulan ti umutang.+ Iturayanyonto ti adu a nasion, ngem saandakayto a maiturayan.+

7 “No adda pumanglaw a kabsatmo nga aggigian iti maysa kadagiti siudad iti daga nga ited kadakayo ni Jehova a Diosyo, saanmo a patangkenen ti pusom wenno imutan ti napanglaw a kabsatmo.+ 8 Masapul a paraburam+ ken pautangam* iti aniaman a kasapulan wenno pagkuranganna. 9 Agannadka amangan no adda dakes a tumaud iti pusom, ket ibagam, ‘Asidegen ti maikapito a tawen, ti tawen a panangwayawaya,’+ ket imutam ti napanglaw a kabsatmo ken awan ti itedmo kenkuana. Makabasolkanto no ipulongnaka ken Jehova.+ 10 Naparaburka koma a mangted kenkuana,+ ket saan koma a nasakit ti nakemmo* a mangted, ta daytanto ti pangbendisionan ni Jehova a Diosmo iti tunggal aramid ken gapuanam.+ 11 Ta addanto latta napanglaw iti dagayo+ isu nga ibilinko kenka, ‘Sipaparabur koma a luktam ti imam iti marigrigatan ken napanglaw a kabsatmo.’+

12 “No nailako kenka ti maysa kadagiti Hebreo a kabsatmo, lalaki man wenno babai, ket nakapagserbin kenka iti innem a tawen, masapul a wayawayaam iti maikapito a tawen.+ 13 No wayawayaam, saanmo a pagawiden nga ima-ima. 14 Sipaparabur nga ikkam iti taraken, bukbukel, lana, ken arak. Mangtedka kenkuana kas iti panangbendision kenka ni Jehova a Diosmo. 15 Laglagipem a naadipenka idi idiay Egipto ngem winayawayaannakayo ni Jehova a Diosyo. Dayta ti makagapu nga ibilinko daytoy kenka ita nga aldaw.

16 “Ngem no ibagana, ‘Dikay kayat a panawan!’ gapu ta ipatpategnaka ken ti sangakabbalayam, ken naragsak nga agserserbi kenka,+ 17 ipanmo iti ridaw sa mangalaka iti pagtebbeng ket tebbengam ti lapayagna. Iti kasta, agbalinto nga adipenmo iti intero a panagbiagna. Kasta met ti aramidem iti adipenmo a babai. 18 Saan koma a nasakit ti nakemmo no wayawayaam ti adipenmo ken no panawannaka, ta ti panagserbina kenka iti innem a tawen ket doble ti katupagna no idilig iti panagserbi ti matangtangdanan a trabahador, ken binendisionannaka ni Jehova a Diosmo.

19 “Idatonmo ken Jehova a Diosmo ti amin nga inauna nga urbon ti kalakian a baka, karnero, ken kaldingmo.+ Saanmo a pagtrabaho ti inauna nga urbon a kalakian a bakam wenno pukisan ti inauna a karnero wenno kaldingmo. 20 Kanem dayta ken ti sangakabbalayam iti sanguanan ni Jehova a Diosmo iti kada tawen iti disso a piliento ni Jehova.+ 21 Ngem no adda depekto dayta—pilay, bulsek, wenno aniaman a depekto—saanmo nga idaton ken Jehova a Diosmo.+ 22 Kanem dayta iti uneg dagiti siudadyo,* kas iti pannanganmo iti gasela ken ugsa. Mabalin a mangan ti tao a maibilang a narugit ken nadalus.+ 23 Ngem saanmo a kanen ti darana;+ masapul nga ibukbokmo dayta iti daga a kas iti danum.+