Job

 2 “Diak maanusanen ti di sumungbat ta mariribukanen ti panunotko,

Madandanaganen ti riknak.

 3 Nangngegko ti pammabalaw a manginsulto kaniak;

Gapu iti pannakaawatko,* kapilitan a sumungbatak.

 4 Sigurado a kanayon nga ammom daytoy,

Ta nangrugin dayta sipud pay idi naparsua ti tao* ditoy daga,+

 5 Nga apagbiit ti ragsak dagiti managdakdakes

Ken saan nga agbayag ti rag-o daydiay rebelioso.*+

 6 Nupay tumukno sadi langit ti kinatan-okna

Ken dumanon kadagiti ulep ti ulona,

 7 Isu ket kas iti takkina a pulos a dinton masarakan;

Ibaganto dagiti dati a makakitkita kenkuana, ‘Ayannan?’

 8 Isu ket awanton a kas iti tagtagainep, ken didanton masarakan pay;

Kas iti sirmata iti rabii nga agpukawto.

 9 Saanton a makita daydiay nakakita idi kenkuana,

Ket awanton iti dati nga ayanna.+

10 Agpakaasinto dagiti annakna kadagiti napanglaw,

Ket isu a mismo ti mangisubli iti kinabaknangna.+

11 Nakatibtibker idi dagiti tulangna a kas iti agkabannuag,

Ngem makikaiddanto dayta* kenkuana iti tapok.

12 No nasam-it ti panagramanna iti dakes,

Ken mulmolanna dayta,

13 No nanamenna ken dina kayat nga iyula,

Ken pagtalinaedenna iti ngiwatna,

14 Agbalinto dayta a naalsem iti tianna;

Kasla gita* dagiti kobra nga addan iti bagina.

15 Tinilmonna ti kinabaknang, ngem isaruananto dayta;

Iruarto amin dayta ti Dios manipud iti tianna.

16 Susopennanto ti gita dagiti kobra;

Dagiti pangil* ti karasaen ti mangpatayto kenkuana.

17 Dinanto pulos makita ti agay-ayus a danum,

Ti aglaplapusanan a diro ken mantekilia.

18 Isublinanto dagiti kukuana a dina man la nausar;*

Dinanto maramanan ti kinabaknang manipud iti panagnegosiona.+

19 Ta inkuskuspil ken binaybay-anna dagiti marigrigat;

Inagawna ti balay a saanna nga imbangon.

20 Ngem saanto nga agtalna ti panunotna;

Ti kinabaknangna ket saanto a makaisalakan kenkuana.

21 Awanen ti natedda a maalana;

Isu a saanto a manayon ti narang-ay a biagna.

22 Inton nakabakbaknangen, dumtengto dagiti pakadanaganna;

Agtupakto kenkuana ti amin a kita ti didigra.

23 Bayat nga agum-uma a mangan,

Ibuyatto kenkuana ti Dios ti pungtotna,

Kasla tudo nga agtinnagto dagiti dakes a mapasamak kenkuana.

24 Inton itartarayanna dagiti armas a landok,

Dagiti gambang a pana ti sumalputto iti bagina.

25 Guyodennanto ti pana iti bukotna,

Ti sumilsilap nga armas a simmalput iti aprona,

Isu a napalalonto ti butengna.+

26 Mapukawto iti kasipngetan dagiti kinabaknangna;

Apuy nga awan ti nangpaypay ti manguramto kenkuana;

Kalamidad ti agur-uray iti asinoman a nabati iti pagtaenganna.

27 Ti langit ti mangibaganto iti kamalina;

Ti daga ti bumusorto kenkuana.

28 Ti layus ti mangyanudto iti balayna;

Ibuyatto kenkuana ti Dios ti ungetna.

29 Dayta ti ipalak-am ti Dios iti dakes a tao,

Ti tawid nga imbilin ti Dios a maited kenkuana.”