Ti Umuna a Cronicas
28 Inummong ni David idiay Jerusalem ti amin a prinsipe ti Israel: dagiti prinsipe dagiti tribu, dagiti panguluen dagiti grupo+ nga agserserbi iti ari, dagiti panguluen ti rinibu ken ti ginasut,+ ken dagiti panguluen a mangaywan iti amin a sanikua ken taraken ti ari+ ken dagiti annakna,+ agraman dagiti opisial ti palasio ken tunggal nabileg ken makabael a lallaki.+ 2 Kalpasanna, timmakder ni Ari David ket kinunana:
“Denggendak, kakabsat ken kakailiak. Tarigagayan ti pusok ti mangibangon iti balay a permanente a pakaikabilan ti lakasa ti tulag ni Jehova ken pagbatayan ti saka ti Diostayo,+ ket nagsaganaak nga agibangon.+ 3 Ngem imbaga kaniak ti pudno a Dios, ‘Saanto a sika ti mangibangon iti balay para iti naganko,+ ta maysaka a mannakigubat, ken nagibukbokka iti dara.’+ 4 Nupay kasta, pinilinak ni Jehova a Dios ti Israel manipud iti pamilia ni amak tapno agbalin nga ari iti Israel iti agnanayon,+ ta pinilina ni Juda kas lider.+ Iti pamilia ni Juda, pinilina ti pamilia ni amak.+ Kadagiti annak ni amak, siak ti pinilina nga agbalin nga ari iti intero nga Israel.+ 5 Iti amin nga annakko—ta adu nga annak ti inted kaniak ni Jehova+—pinilina ni Solomon+ nga anakko nga agtugaw iti trono ni Jehova ken agturay iti Israel.+
6 “Imbagana kaniak, ‘Ni Solomon nga anakmo ti mangibangonto iti balayko ken kadagiti paraangak, ta pinilik kas anakko, ket siakto ti amana.+ 7 Pagtalinaedekto iti agnanayon+ ti kinaarina no naan-anay a tungpalenna dagiti bilin ken pangngeddengko,+ kas iti ar-aramidenna ita.’ 8 Gapuna, ibagak iti sanguanan ti intero nga Israel, ti kongregasion ni Jehova, ken iti sanguanan ti Diostayo: Sukimaten ken tungpalenyo a naimbag ti amin a bilin ni Jehova a Diosyo, tapno matagikuayo ti nasayaat a daga+ ken maipasayo dayta kadagiti annakyo kas permanente a tawid.
9 “Sika, Solomon nga anakko, am-ammuem ti Dios ni amam ket agserbika kenkuana iti naan-anay* a puso+ ken naragsak* a kararua,* ta suksukimaten ni Jehova ti amin a puso,+ ken ammona ti tunggal pampanunot ken tarigagaymo.+ No birokem, ipalubosnanto a masarakam,+ ngem no panawam, ilaksidnakanto iti agnanayon.+ 10 Ita, pinilinaka ni Jehova a mangibangon iti maysa a balay kas santuario. Bumilegka ket rugiamon ti trabaho.”
11 Gapuna, inted ni David ken ni Solomon nga anakna ti plano+ ti beranda+ ken dagiti siled, agraman dagiti siledna a pagidulinan, siledna iti pangatepan, makin-uneg a siledna, ken ti siled nga ayan ti pakikappia a kalub.*+ 12 Intedna ti plano ti amin nga impalgak kenkuana ti espiritu ti Dios para kadagiti paraangan+ ti balay ni Jehova, amin a siled a panganan, dagiti pagidulinan iti gameng iti balay ti pudno a Dios, ken dagiti pagidulinan iti bambanag a napagbalin a nasantuan;*+ 13 kasta met para kadagiti grupo dagiti papadi+ ken Levita, ken amin a trabaho iti panagserbi iti balay ni Jehova, ken amin nga alikamen iti panagserbi iti balay ni Jehova; 14 kasta met iti rumbeng a kadagsen ti balitok, ti amin nga alikamen a balitok a mausar iti nagduduma a panagserbi, ken iti kadagsen ti pirak, ti amin nga alikamen a pirak a mausar iti nagduduma a panagserbi; 15 ken iti rumbeng a kadagsen ti nagduduma a balitok a kandelero+ ken dagiti lamparana, ken iti kadagsen ti nagduduma a pirak a kandelero ken dagiti lamparana; 16 kasta met iti rumbeng a kadagsen ti balitok kadagiti lamisaan ti napagtutuon a tinapay,*+ para iti tunggal lamisaan, ken ti kadagsen ti pirak kadagiti lamisaan a pirak; 17 ken dagiti tinidor, malukong, pitser a puro a balitok, ken iti rumbeng a kadagsen dagiti babassit a malukong a balitok,+ para iti tunggal bassit a malukong, ken ti kadagsen dagiti babassit a malukong a pirak, para iti tunggal bassit a malukong. 18 Intedna met ti kadagsen ti napasudi a balitok para iti altar ti insienso+ ken iti mangirepresentar iti karuahe,+ kayatna a sawen, dagiti kerubin+ a balitok a nakaukrad dagiti payakda a mangsallukob iti lakasa ti tulag ni Jehova. 19 Imbaga ni David: “Inikkannak ni Jehova iti sirib ket natarusak no kasano nga itungpal ti amin a detalye iti plano,+ nga insuratko+ babaen ti panangidalanna.”
20 Kalpasanna, kinuna ni David ken ni Solomon nga anakna: “Papigsaem ti pakinakemmo ken bumilegka ket rugiamon ti trabaho. Dika agbuteng wenno agamak, ta adda kenka ni Jehova a Dios, ti Diosko.+ Dinakanto baybay-an wenno panawan,+ no di ket addanto kenka agingga a malpas ti amin a trabaho iti balay ni Jehova. 21 Dagitoy ti grupo dagiti papadi+ ken Levita+ para iti amin a panagserbi iti balay ti pudno a Dios. Addaanka kadagiti situtulok ken eksperto a trabahador iti tunggal kita ti trabaho,+ agraman dagiti prinsipe+ ken amin a tattao a mangitungpal iti amin nga instruksionmo.”