Maysa nga Apocalipsis ken Juan
5 Iti kannawan nga ima Daydiay situtugaw iti trono,+ nakitak ti maysa a lukot a nasuratan ti agsumbangirna,* ken siiirut a naserraan iti pito a selio. 2 Ket nakitak ti maysa a napigsa nga anghel a mangipakpakaammo iti napigsa a timek: “Asino ti maikari a mangukrad iti lukot ken mangikkat kadagiti seliona?” 3 Ngem awan ti asinoman idiay langit wenno iti rabaw ti daga wenno iti uneg ti daga a makabael a mangukrad iti lukot wenno mangkita iti unegna. 4 Napalalo ti sangitko ta awan ti nasarakan a maikari a mangukrad iti lukot wenno mangkita iti unegna. 5 Ngem imbaga kaniak ti maysa kadagiti panglakayen: “Isardengmon ti agsangit. Kitaem! Nagballigin+ ti Leon iti tribu ni Juda,+ ti ramut+ ni David,+ tapno ukradenna ti lukot ken ikkatenna ti pito a selio dayta.”
6 Iti tengnga* ti trono ken ti uppat a sibibiag a parsua ken iti tengnga dagiti panglakayen,+ nakitak nga agtaktakder ti maysa a kordero+ a kasla napapatay,+ a pito ti sarana ken pito ti matana, ket dagiti mata kaipapananda ti pito nga espiritu ti Dios+ a naibaon iti intero a daga. 7 Dagus nga immasideg iti sango ket innalana ti lukot iti kannawan nga ima Daydiay situtugaw iti trono.+ 8 Idi innalana ti lukot, ti uppat a sibibiag a parsua ken ti 24 a panglakayen+ ket nagruknoy iti sango ti Kordero. Tunggal maysa ket addaan iti arpa ken balitok a malukong a napno iti insienso. (Ti insienso kaipapananna ti karkararag dagiti nasantuan.)+ 9 Ket kankantaenda ti baro a kanta:+ “Maikarika a mangala iti lukot ken manglukat kadagiti seliona, ta napapatayka ket babaen ti daram, nanggatangka kadagiti tattao para iti Dios+ manipud iti tunggal tribu, lengguahe, ili, ken nasion,+ 10 ket pinagbalinmo ida a kas pagarian+ ken papadi iti Diostayo,+ ken agturaydanto kas ar-ari+ iti daga.”
11 Nakitak ti adu nga anghel iti aglawlaw ti trono ken dagiti sibibiag a parsua ken dagiti panglakayen ken nangngegko met ti timekda, ket pinullo a ribu a pinullo a ribu ken rinibu a ribu ti bilangda,+ 12 nga ibagbagada iti napigsa a timek: “Ti Kordero a napapatay+ ket maikari nga umawat iti pannakabalin, kinabaknang, sirib, bileg, dayaw, dayag, ken bendision.”+
13 Ket nangngegko nga ibagbaga ti tunggal parsua idiay langit ken iti rabaw ti daga+ ken iti uneg ti daga ken iti baybay ken amin nga adda kadakuada: “Daydiay situtugaw iti trono+ ken ti Kordero+ ti pakaitedan koma ti kinatan-ok, dayaw,+ dayag, ken pannakabalin iti agnanayon nga awan inggana.”+ 14 Ibagbaga ti uppat a sibibiag a parsua: “Amen!” ket nagruknoy ken nagdaydayaw dagiti panglakayen.