Ti Maikadua a Cronicas

25 Agtawen ni Amazias iti 25 idi nagbalin nga ari, ket nagturay iti 29 a tawen idiay Jerusalem. Ti nanangna ket ni Jehoadan a taga-Jerusalem.+ 2 Inar-aramidna ti umiso iti imatang ni Jehova, ngem saan nga iti amin a pusona. 3 Apaman a bimmileg ti panangiturayna iti pagarian, pinatayna dagiti adipenna a nangpatay iti amana nga ari.+ 4 Ngem saanna a pinatay dagiti annakda, ta nagtignay maitunos iti naisurat iti Linteg, iti libro ni Moises, a sadiay nga imbilin ni Jehova: “Saan a mapapatay dagiti amma maigapu kadagiti annakda, ket saan met a mapapatay dagiti annak maigapu kadagiti ammada. Mapapatay ti maysa maigapu iti bukodna a basol.”+

5 Inummong ni Amazias ti Juda ket pinagtakderna ida sigun iti pamilia dagidi ammada, sigun kadagiti panguluen ti rinibu ken kadagiti panguluen ti ginasut para iti intero a Juda ken Benjamin.+ Inrehistrona dagiti agtawen iti 20 nga agpangato,+ ket nakitana nga adda 300,000 a nasanay* a mannakigubat nga agserbi iti armada, a nalaing nga agusar iti gayang ken dakkel a kalasag. 6 Nangtangdan pay iti Israel iti 100,000 a nabileg a mannakigubat ket inikkanna ida iti 100 a talento* a pirak. 7 Ngem kinuna kenkuana ti adipen ti pudno a Dios: “O ari, dimo ipalubos a kumuyog kenka ti armada ti Israel,+ ta awan ni Jehova iti Israel ken iti asinoman nga Efraimita. 8 Mapanka a siksika, agtignayka, ken papigsaem ti pakinakemmo a makigubat. Adda pannakabalin ti Dios a tumulong+ kenka. Ngem no dimo aramiden daytoy, ipalubosna nga abakennaka ti kabusormo.” 9 Gapuna, kinuna ni Amazias iti adipen ti pudno a Dios: “Ngem kasanon ti 100 a talento nga intedko kadagiti soldado ti Israel?” Insungbat ti adipen ti pudno a Dios: “Kabaelannaka nga ikkan ni Jehova iti ad-adu ngem iti dayta.”+ 10 Gapuna, pinagawid ni Amazias dagiti soldado a naggapu iti Efraim. Ngem kasta unay ti pungtotda iti Juda, isu a nagawidda a sipupungtot.

11 Kalpasanna, pinapigsa ni Amazias ti pakinakemna ket indauluanna dagiti soldadona a mapan iti Tanap ti Asin;+ ket pinapatayna ti 10,000 a lallaki ti Seir.+ 12 Nakatiliw met dagiti lallaki ti Juda iti 10,000 a lallaki. Impanda ida iti rangkis sa intinnagda ida, ket nasinasina dagiti bagida. 13 Ngem dagiti soldado a pinagawid ni Amazias a makikadua koma kenkuana iti gubat+ rinautda dagiti siudad ti Juda, manipud Samaria+ agingga idiay Bet-horon;+ ket pinapatayda ti 3,000 a tattao ken nangalada iti adu a banag.

14 Ngem idi nakasubli ni Amazias a nangraut kadagiti Edomita, inyawidna dagiti didiosen dagiti lallaki ti Seir ken inaramidna dagita kas diosna.+ Nagruknoy kadagita ken nangipaay iti daton a mangpataud iti asuk. 15 Gapuna, nakapungtot unay ni Jehova ken ni Amazias, ket nangibaon iti propeta a nangibaga kenkuana: “Apay nga agserserbika kadagiti didiosen dagiti tattao a saan a nangisalakan kadagiti umilida manipud iti imam?”+ 16 Bayat nga agsasao ti propeta, kinuna ti ari: “Dinutokanka kadi a mangbalakad kaniak?+ Agsardengka!+ Kayatmo kadi nga ipapatayka?” Gapuna, nagsardeng ti propeta ngem kinunana: “Ammok nga inkeddeng ti Dios a dadaelennaka ta inaramidmo daytoy ken saanka a dimngeg iti balakadko.”+

17 Kalpasan a nakisarita ni Ari Amazias ti Juda kadagiti mamalbalakadna, nangipatulod iti mensahe ken Jehoas nga anak ni Jehoahaz nga anak ni Jehu nga ari ti Israel: “Umayka ta aggubatta.”*+ 18 Impaibaga ni Jehoas nga ari ti Israel ken ni Amazias nga ari ti Juda: “Impaibaga ti siitan a ruot ti Lebanon iti sedro ti Lebanon, ‘Itedmo ti anakmo a babai kas asawa ti anakko.’ Ngem adda limmabas nga atap nga animal ti Lebanon ket impayatpayatna ti siitan a ruot. 19 Imbagam, ‘Pinarmekko* ti Edom.’+ Isu a nagtangsit ta pusom, ta kayatmo ti maipadayag. Ngem agtalinaedka ita iti balaymo.* Apay a mangaramidka iti pakadidigraam ken pakatnagam, agraman ti Juda?”

20 Ngem saan a dimngeg ni Amazias,+ ta naggapu daytoy iti pudno a Dios tapno mayawatna ida kadagiti kabusorda,+ gapu ta nagserbida kadagiti didiosen ti Edom.+ 21 Gapuna, rimmuar ni Ari Jehoas ti Israel ket naggubatda ken Ari Amazias ti Juda idiay Bet-semes,+ a kukua ti Juda. 22 Inabak ti Israel ti Juda, ket nagawid ti tunggal maysa iti balayna.* 23 Inabak ni Jehoas nga ari ti Israel ni Amazias nga ari ti Juda, nga anak ni Jehoas nga anak ni Jehoahaz,* idiay Bet-semes. Kalpasanna, impanna idiay Jerusalem ket giniwanganna ti pader ti Jerusalem manipud iti Ruangan ti Efraim+ agingga iti Makinsuli a Ruangan,+ 400 a kasiko.* 24 Innalana ti amin a balitok ken pirak ken ti amin nga alikamen nga adda iti balay ti pudno a Dios agraman* ni Obed-edom ken dagiti pagidulinan iti gameng iti balay* ti ari,+ agraman dagiti balud. Kalpasanna, nagsubli idiay Samaria.

25 Nagbiag ni Amazias+ nga anak ni Jehoas nga ari ti Juda iti 15 a tawen kalpasan ti ipapatay ni Jehoas+ nga anak ni Jehoahaz nga ari ti Israel.+ 26 Ti dadduma pay a pasamak iti pakasaritaan ni Amazias, manipud rugi agingga iti ngudona, ket naisurat iti Libro ti Ar-ari ti Juda ken ti Israel. 27 Manipud idi insardeng ni Amazias ti agserbi ken Jehova, adda dagiti nagkukumplot+ maibusor kenkuana idiay Jerusalem, ket nagkamang idiay Lakis. Ngem nangibaonda kadagiti lallaki a mangsurot kenkuana idiay Lakis ket pinatayda sadiay. 28 Gapuna, insakayda kadagiti kabalio ket inyawid ken intabonda a kas kadagidi ammana iti siudad ti Juda.