Deuteronomio
5 Kalpasanna, inayaban ni Moises ti intero nga Israel ket kinunana: “Denggenyo, O Israel, dagiti regulasion ken dagiti pangngeddeng nga ipakaammok kadakayo ita nga aldaw, ket masapul a sursuruen ken ikagumaanyo a tungpalen dagitoy. 2 Nakitulag kadatayo ni Jehova a Diostayo idiay Horeb.+ 3 Saan a nakitulag ni Jehova kadagidi ammatayo, no di ket kadatayo, amintayo a sibibiag ita nga aldaw. 4 Rupanrupa a nakisao kadakayo ni Jehova iti bantay manipud iti apuy.+ 5 Nakatakderak idi iti nagbaetanyo ken ni Jehova+ tapno ibagak kadakayo ti sao ni Jehova, ta nagbutengkayo iti apuy ket saankayo a simmang-at iti bantay.+ Kinunana:
6 “‘Siak ni Jehova a Diosmo, a nangiruar kenka iti Egipto, a nakaadipenam.*+ 7 Dika pulos maaddaan kadagiti sabali a dios malaksid kaniak.*+
8 “‘Dika mangaramid iti kinitikitan nga imahen+ wenno iti kapada ti aniaman nga adda iti langit, daga, wenno iti danum. 9 Dika agruknoy wenno agserbi kadagita,+ ta siak ni Jehova a Diosmo nga agkidkiddaw iti naipamaysa a debosion.+ Dusaek dagiti nakabasol ken gumurgura kaniak, agraman dagiti annak, appoko, ken appoko iti tumeng gapu iti basol dagiti amma,+ 10 ngem ipakitak ti napudno nga ayat* agingga iti maikasangaribu a henerasion dagidiay mangay-ayat kaniak ken agtultulnog kadagiti bilinko.
11 “‘Dimo usaren ti nagan ni Jehova a Diosmo iti di umiso a pamay-an,+ ta sigurado a dusaen ni Jehova ti asinoman a mangusar iti naganna iti di umiso a pamay-an.+
12 “‘Ngilinem ti aldaw ti Sabbath ken ibilangmo a sagrado, kas imbilin kenka ni Jehova a Diosmo.+ 13 Agtrabahoka iti innem nga aldaw,+ 14 ngem ti maikapito nga aldaw ket sabbath para ken Jehova a Diosmo.+ Dika agtrabaho iti uray ania+—sika, ti anakmo a lalaki wenno babai, ti adipenmo a lalaki wenno babai, ti baka, asno, ken aniaman a tarakenmo, wenno ti ganggannaet a residente kadagiti siudadyo*+—tapno makainana met ti adipenmo a lalaki ken babai a kas kenka.+ 15 Laglagipem a nagbalinka nga adipen idiay Egipto ket inruarnaka sadiay ni Jehova a Diosmo babaen ti mannakabalin nga ima ken nabileg* a takiag.+ Dayta ti makagapu nga imbilin ni Jehova a Diosmo a ngilinem ti aldaw ti Sabbath.
16 “‘Dayawem da tatang ken nanangmo,+ kas imbilin kenka ni Jehova a Diosmo, tapno napaut ti biagmo ken rumang-ayka* iti daga nga ited kenka ni Jehova a Diosmo.+
20 “‘Dika agtestigo iti ulbod maibusor iti padam a tao.+
21 “‘Dimo tarigagayan ti asawa a babai ti padam a tao.+ Dimo met siaagum a tarigagayan ti balay ti padam a tao, ti talonna, ti adipenna a lalaki wenno babai, ti bakana, ti asnona, wenno aniaman a kukua ti padam a tao.’+
22 “Dagitoy a bilin* ti imbaga ni Jehova kadakayo amin idiay bantay babaen ti napigsa a timek manipud iti apuy, ti ulep, ken ti nakaro a kinasipnget,+ ket awanen ti innayonna. Kalpasanna, insuratna dagita iti dua a tapi a bato sa intedna kaniak.+
23 “Ngem idi nangngegyo ti timek manipud iti sipnget, bayat nga umap-apuy ti bantay,+ immasideg kaniak ti amin a pannakaulo dagiti tribuyo ken dagiti panglakayenyo. 24 Imbagayo, ‘Impakita kadakami ni Jehova a Diostayo ti dayag ken kinatan-okna, ket nangngegmi ti timekna manipud iti apuy.+ Nakitami ita nga aldaw a mabalin a makisarita ti Dios iti tao ket agtalinaed a sibibiag.+ 25 Saanmi a kayat ti matay, ta mabalin nga ibusennakami daytoy dakkel nga apuy. Sigurado a mataykami no agtultuloy a mangngegmi ti timek ni Jehova a Diostayo. 26 Ta asino iti amin a tao* ti nakangngeg iti timek ti sibibiag a Dios nga agsasao babaen ti apuy a kas iti napadasanmi ket agtalinaed a sibibiag? 27 Sika ti umasideg tapno denggem ti amin a sawento ni Jehova a Diostayo, ket ibagamto kadakami ti amin nga ibaga kenka ni Jehova a Diostayo, ket denggen ken aramidenminto dayta.’+
28 “Gapuna, nangngeg ni Jehova dagiti imbagayo kaniak, ket kinuna kaniak ni Jehova, ‘Nangngegko ti imbaga kenka dagitoy a tattao. Nasayaat ti amin nga imbagada.+ 29 No koma kanayon nga agbuteng kaniak+ ti pusoda ken tungpalenda ti amin a bilinko;+ iti kasta, nasayaatto ti pagbanaganda ken dagiti annakda iti agnanayon!+ 30 Ibagam kadakuada: “Agawidkayo kadagiti toldayo.” 31 Ngem agtalinaedka ditoy, ket ibagak kenka ti amin a bilin, regulasion, ken pangngeddeng a masapul nga isurom kadakuada ken tungpalenda iti daga nga itedko a tagikuaenda.’ 32 Ita, tungpalenyo a naimbag ti imbilin kadakayo ni Jehova a Diosyo.+ Dikay agturong iti kannawan wenno kannigid.+ 33 Masapul a surotenyo ti amin nga imbilin kadakayo ni Jehova a Diosyo,+ tapno agbiagkayo ken nasayaat ti pagbanaganyo ket agbayagkayo iti daga a tagikuaenyo.+