Deuteronomio
8 “Tungpalenyo a naimbag ti tunggal bilin nga itedko kadakayo ita nga aldaw, tapno agtultuloykayo nga agbiag+ ket umadukayo ken sumrekkayo ken tagikuaenyo ti daga nga inkari ni Jehova kadagidi ammayo.+ 2 Laglagipenyo ti atiddog a kalsada a nangiturongan kadakayo ni Jehova a Diosyo iti 40 a tawen idiay let-ang,+ tapno pagpakumbabaennakayo ken masuboknakayo+ ket maammuanna ti adda iti pusoyo,+ no tungpalenyo dagiti bilinna wenno saan. 3 Iti kasta, pinagpakumbaba ken binay-annakayo nga agbisin+ ket pinakannakayo iti manna,+ a saanyo pay idi a nakitkita uray dagidi ammayo, tapno ipabigbigna kadakayo a saan laeng a tinapay ti pagbiag ti tao, no di ket ti tunggal sao nga aggapu ken Jehova.+ 4 Saan a narunot ti badoyo ken saan a limteg dagiti sakayo kadagitoy 40 a tawen.+ 5 Pagaammoyo nga inlintegnakayo ni Jehova a Diosyo, kas iti panangilinteg ti ama iti anakna.+
6 “Ita, masapul a tungpalenyo dagiti bilin ni Jehova a Diosyo babaen ti pannagnayo iti dalanna ken panagbutengyo kenkuana. 7 Ta ipannakayo ni Jehova a Diosyo iti nasayaat a daga+ nga addaan kadagiti karayan, ubbog nga agayus iti tanap ken kabambantayan, 8 trigo ken sebada, puon ti ubas, kayo a higos, kayo a granada,+ lana ti olibo ken diro,+ 9 adu a taraon ken addanto amin a kasapulanyo, maysa a daga nga adda landok kadagiti batona ket agminaskayto iti gambang kadagiti bantayna.
10 “Inton makapangankayo ken mapnekkayon, masapul nga idaydayawyo ni Jehova a Diosyo gapu iti nasayaat a daga nga intedna kadakayo.+ 11 Agannadkayo tapno saanyo a malipatan ni Jehova a Diosyo babaen ti saanyo a panangtungpal kadagiti bilin, pangngeddeng, ken lintegna nga itedko kadakayo ita nga aldaw. 12 Inton makapangankayo ken mapnekkayon ket mangbangonkayo kadagiti nasayaat a balay ken agnaedkayo kadagita,+ 13 inton umadu ti baka, karnero, ken kaldingyo, kasta met ti pirak ken balitokyo, ket nakaad-adun ti sanikuayo, 14 dikay koma agpannakkel+ tapno diyo malipatan ni Jehova a Diosyo, a nangiruar kadakayo idiay Egipto, a nakaadipenanyo,+ 15 a nangiturong iti pannagnayo iti nalawa ken nakabutbuteng a let-ang+ nga addaan kadagiti nagita nga uleg ken manggagama, ken natikag a daga nga awan ti danumna. Nangpataud iti danum iti natangken a bato*+ 16 ken inikkannakayo iti manna+ a kanenyo idiay let-ang, a saan pay a nakitkita dagidi ammayo, tapno agpakumbabakayo+ ken masuboknakayo ket magunggonaankayo iti masanguanan.+ 17 No kunaenyo iti pusoyo, ‘Naadda daytoy a kinabaknangko gapu iti pannakabalin ken bilegko,’+ 18 laglagipenyo a ni Jehova a Diosyo ti mangipapaay iti bilegyo a maaddaan iti kinabaknang,+ tapno itungpalna ti tulag nga inkarina kadagidi ammayo, kas ita nga aldaw.+
19 “No lipatenyo latta ni Jehova a Diosyo ket sumurotkayo kadagiti sabali a dios sa agserbi ken agruknoykayo kadakuada, pakdaarankayo ita nga aldaw a sigurado a madadaelkayto.+ 20 Madadaelkayto a kas kadagiti nasion a dadaelen ni Jehova iti sanguananyo, ta diyo impangag ti timek ni Jehova a Diosyo.+