Ti Maikadua a Cronicas
33 Agtawen ni Manases+ iti 12 idi nagbalin nga ari, ket nagturay iti 55 a tawen idiay Jerusalem.+
2 Inaramidna ti dakes iti imatang ni Jehova, ken tinuladna dagiti narugit nga aramid dagiti nasion a pinapanaw ni Jehova iti sanguanan ti ilina nga Israel.+ 3 Binangonna manen dagiti nangato a disso a dinadael ni Ezekias nga amana,+ nangaramid kadagiti altar para kadagiti Baal, ken nangibangon kadagiti sagrado a poste.* Nagruknoy ken nagserbi iti intero nga armada ti langit.+ 4 Nangibangon met kadagiti altar iti balay ni Jehova,+ a tuktukoyen ni Jehova idi kinunana: “Agnanayonto nga adda ti naganko iti Jerusalem.”+ 5 Nangibangon pay kadagiti altar para iti intero nga armada ti langit iti dua a paraangan ti balay ni Jehova.+ 6 Impalasatna dagiti annakna iti apuy+ iti Tanap ti Anak ni Hinnom;+ nagsalamangka,+ nagbuyon, nagkulam, ken nangdutok kadagiti espiritista ken mammadles.+ Nakaro unay ti inaramidna a kinadakes iti imatang ni Jehova, a namagpungtot kenkuana.
7 Inkabilna ti inaramidna a kinitikitan nga imahen iti balay ti pudno a Dios+ a tuktukoyen ti Dios idi imbagana ken David ken iti anakna a ni Solomon: “Permanentento nga ikabilko ti naganko iti daytoy a balay ken iti Jerusalem, a pinilik manipud iti amin a tribu ti Israel.+ 8 Ken diakton ikkaten ti Israel iti daga nga intedko kadagidi ammada, no la ket ta tungpalenda ti amin nga imbilinko, ti intero a Linteg, dagiti regulasion ken pangngeddeng a naited babaen ken Moises.” 9 Inyaw-awan ni Manases ti Juda ken dagiti agnanaed iti Jerusalem tapno aramidenda ti dakdakes ngem kadagiti nasion nga inibus ni Jehova iti sanguanan dagiti Israelita.+
10 Maulit-ulit a nakisarita ni Jehova ken ni Manases ken iti ilina, ngem saanda a dimngeg.+ 11 Iti kasta, impalubos ni Jehova a rauten ida dagiti pangulo ti armada ti ari ti Asiria, ket tiniliwda ni Manases babaen kadagiti kawit* ken pinosasanda iti dua a gambang sa impanda idiay Babilonia. 12 Idi marigrigatanen, nagpakpakaasi ken Jehova a Diosna* ket nagpakumbaba unay iti sanguanan ti Dios dagidi ammana. 13 Nagkarkararag ket natignay ti Dios iti panagpakaasina ken impangagna ti kiddawna, isu nga insublina idiay Jerusalem kas ari.+ Iti kasta, nabigbig ni Manases a ni Jehova ti pudno a Dios.+
14 Kalpasanna, nangibangon iti makinruar a pader iti Siudad ni David+ iti laud ti Gihon+ idiay tanap.* Dumanon ti pader idiay Ruangan ti Ikan,+ ken agtultuloy agingga iti Ofel.+ Nakangatngato dayta a pader. Nangdutok kadagiti pangulo ti armada iti amin a napaderan a siudad iti Juda. 15 Inikkatna dagiti sabali a dios ken ti idolo iti balay ni Jehova+ ken ti amin nga altar nga imbangonna iti bantay ti balay ni Jehova+ ken idiay Jerusalem ket impaibellengna dagita iti ruar ti siudad. 16 Insaganana pay ti altar ni Jehova+ ken nangipaay kadagiti daton a pakikappia+ ken daton ti panagyaman+ sa imbagana iti Juda nga agserbida ken Jehova a Dios ti Israel. 17 Nupay kasta, nagidatdaton latta dagiti tattao kadagiti nangato a disso, ngem para laeng ken Jehova a Diosda.
18 Ti dadduma pay a pasamak iti pakasaritaan ni Manases, ti kararagna iti Diosna, ken ti imbaga dagiti managsirmata a nagsao kenkuana iti nagan ni Jehova a Dios ti Israel, ket nairekord iti pakasaritaan dagiti ari ti Israel. 19 Naisurat met iti sasao dagiti propetana ti kararagna+ ken no kasano a napatgan ti dawatna, amin a basolna ken ti saanna a panagmatalek,+ dagiti lugar a nangibangonanna kadagiti nangato a disso ken kadagiti sagrado a poste*+ ken kadagiti kinitikitan nga imahen sakbay a nagpakumbaba. 20 Naginana ni Manases a kas kadagidi ammana, ket intabonda iti balayna. Ni Amon nga anakna ti simmaruno nga ari.+
21 Agtawen ni Amon+ iti 22 idi nagbalin nga ari, ket nagturay iti dua a tawen idiay Jerusalem.+ 22 Inar-aramidna ti dakes iti imatang ni Jehova, kas iti inaramid ni Manases nga amana.+ Nagdaton ni Amon iti amin a kinitikitan nga imahen nga inaramid ni Manases nga amana,+ ket nagserserbi kadagita. 23 Ngem saan a nagpakumbaba ni Amon iti sanguanan ni Jehova+ a kas iti panagpakumbaba ni Manases nga amana,+ no di ket pinakarona ti basolna. 24 Idi agangay, nagkukumplot dagiti adipenna maibusor kenkuana+ ket pinatayda iti balayna. 25 Ngem pinatay dagiti umili ti amin a nagkukumplot maibusor ken Ari Amon,+ ket pinagbalinda nga ari ni Josias+ nga anakna kas sukatna.