SURAT KADAGITI TAGA-GALACIA

1 Siak ni apostol Pablo. Awan ti tao a nangdutok kaniak nga agbalin nga apostol no di ket ni Jesu-Kristo+ ken ti Dios nga Amatayo,+ a nangpagungar kenkuana. 2 Siak, agraman ti amin a kakabsat a kaduak, nagsuratak kadagiti kongregasion dita Galacia:

3 Adda koma kadakayo ti nagpaiduma a kinaimbag ken talna manipud iti Dios nga Amatayo ken ni Apo Jesu-Kristo. 4 Insakripisiona ti biagna tapno mapunas dagiti basoltayo+ ket maisalakannatayo iti agdama a dakes a sistema ti bambanag*+ maitunos iti pagayatan ti Dios ken Amatayo,+ 5 a pakaitedan ti dayag iti agnanayon nga awan inggana. Amen.

6 Nasdaawak ta nagpartak ti itatallikudyo* iti Daydiay nangayab kadakayo babaen ti nagpaiduma a kinaimbag ni Kristo tapno surotenyo ti sabali a kita ti naimbag a damag.+ 7 Saan a gapu ta adda sabali a naimbag a damag; no di ket adda dagiti mangal-allilaw kadakayo+ ken kayatda a libegen ti naimbag a damag maipapan iti Kristo. 8 Ngem no adda man kadakami wenno adda anghel idiay langit a mangipakaammo iti naimbag a damag a naiduma iti naimbag a damag nga impakaammomi kadakayo, mailunod koma. 9 Kas iti imbagami idin, ibagak manen: Mailunod koma ti asinoman a mangipakaammo kadakayo iti naimbag a damag a naiduma iti inawatyo.

10 Kinaagpaysuanna, ti kadi pabor ti tattao ti ikagkagumaak a gun-oden wenno ti pabor ti Dios? Wenno tattao kadi ti ikagkagumaak a paragsaken? No tattao latta ti parparagsakek, saanak nga agbalin nga adipen ni Kristo. 11 Ta kayatko a maammuanyo, kakabsat, a saan a tao ti naggapuan ti naimbag a damag nga impakaammok kadakayo;+ 12 ta saan a tao ti nangted kaniak, wenno saan met a tao ti nangisuro kaniak, no di ket impalgak ni Jesu-Kristo.

13 Ammok a nadamagyon ti kababalinko idi miembroak pay laeng iti Judaismo.+ Nakaro* idi ti panangidadanesko iti kongregasion ti Dios tapno madadael dayta.+ 14 Mas aktiboak met idi a miembro ti Judaismo ngem iti adu a kailiak a kaedadko, ta adayo a naregregtaak a mangsurot kadagiti tradision dagidi ammak.+ 15 Ngem idi a ti Dios, a nangipalubos a mayanakak ken nangayab kaniak babaen ti nagpaiduma a kinaimbagna,+ ket naragsakan 16 a nangipalgak iti Anakna babaen kaniak tapno maipakaammok kadagiti nasion ti naimbag a damag maipapan kenkuana,+ saanak a dagus a nagkonsulta iti asinoman a tao.* 17 Saanak met a napan idiay Jerusalem tapno agpabalakad kadagiti apostol nga immun-una ngem siak. Napanak ketdi idiay Arabia, sa nagsubliak idiay Damasco.+

18 Kalpasan ti tallo a tawen, napanak idiay Jerusalem+ tapno sarungkarak ni Cefas.*+ Nakipagyanak kenkuana iti 15 nga aldaw. 19 Ngem ni laeng Santiago+ a kabsat ti Apo ti nakitak kadagiti dadduma pay nga apostol. 20 No maipapan kadagiti isursuratko kadakayo, ipasiguradok iti sanguanan ti Dios a diak agul-ulbod.

21 Kalpasan dayta, napanak kadagiti rehion ti Siria ken Cilicia.+ 22 Ngem saandak pay idi a nakitkita dagiti kongregasion ni Kristo idiay Judea. 23 Kastoy laeng ti nangnangngegda: “Daydiay mangidaddadanes kadatayo+ idi ket ikaskasabana itan ti naimbag a damag maipapan iti pammati a kayatna idi a dadaelen.”+ 24 Indaydayawda ngarud ti Dios gapu kaniak.

2 Kalpasan ti 14 a tawen, napanak manen idiay Jerusalem a kaduak ni Bernabe.+ Inkuyogko met ni Tito.+ 2 Napanak gapu ta naipalgak a mapanak, ket impakaammok kadakuada ti naimbag a damag nga ikaskasabak kadagiti nasion. Ngem impakaammok laeng dayta kadagiti mararaem a kakabsat tapno masiguradok a saan a sayang ti naaramidak ken ti ar-aramidek idi a panagbannog para iti Dios. 3 Uray ni Tito+ a kaduak ket saan a napilit nga agpakugit,+ nupay maysa a Griego. 4 Ngem timmaud dayta nga isyu gapu kadagiti sinankakabsat a di nadnadlaw+ a nakastrek iti kongregasion tapno espiaanda ti wayawayami+ kas adalan ni Kristo Jesus tapno maadipendakami.+ 5 Saanmi ida nga inkankano,+ uray apagbiit* laeng, tapno agtalinaed kadakayo ti kinapudno ti naimbag a damag.

6 Ngem no maipapan kadagidiay maibilang nga importante+​—saan a napateg kaniak ti kinasiasinoda, ta saan a ti makinruar a langa ti tao ti kitkitaen ti Dios​—awan ti baro a naisuro kaniak dagidiay a mararaem a tattao. 7 Nupay kasta, idi nakitada a naibaonak a mangikasaba iti naimbag a damag kadagidiay di nakugit,+ a kas ken Pedro a naibaon kadagidiay nakugit​— 8 ta daydiay nangted ken Pedro iti autoridad kas apostol kadagiti nakugit ti nangted met laeng kaniak iti autoridad kas apostol kadagiti nasion+—​ 9 ken idi nakitada ti nagpaiduma a kinaimbag a naipakita kaniak,+ da Santiago,+ Cefas,* ken Juan, a maibilang kas adigi ti kongregasion, inalamanodakami ken ni Bernabe+ kas pagilasinan ti panagkakaduami tapno mapankami kadagiti nasion, ngem isuda ti mapan kadagidiay nakugit. 10 Ti laeng indawatda ket laglagipenmi dagiti napanglaw, ket dayta ti inkagumaak met nga aramiden.+

11 Nupay kasta, idi immay ni Cefas*+ iti Antioquia,+ imparupak kenkuana ti panangbabalawko* ta nalawag a saan a husto* ti ar-aramidenna. 12 Ta sakbay a simmangpet dagiti lallaki nga imbaon ni Santiago,+ nakaugalianna ti mangan a kadua dagiti tattao kadagiti nasion.+ Ngem idi addadan, insardengna nga aramiden dayta ken saanen a nakikadua kadakuada ta mabuteng kadagiti nakugit.+ 13 Kasta met a panagpammarang* ti inaramid ti dadduma a Judio isu a naimpluensiaanda met ni Bernabe iti panagpammarangda.* 14 Ngem idi nakitak a dida sursuroten ti kinapudno ti naimbag a damag,+ imbagak ken Cefas* iti sanguananda amin: “Maysaka a Judio, ngem no ar-aramidem ti ar-aramiden dagiti nasion ket saan a ti ar-aramiden dagiti Judio, kasano a mapilitmo dagiti tattao kadagiti nasion a mangaramid iti ar-aramiden dagiti Judio?”+

15 Nayanaktayo a Judio. Saantayo a kas kadagiti managbasol a tattao kadagiti nasion. 16 Ammotayo a ti maysa a tao ket maideklara a nalinteg, saan a babaen kadagiti aramid nga ipapaannurot ti linteg, no di ket babaen laeng ti pammati+ ken Jesu-Kristo.+ Isu a mamatitayo ken Kristo Jesus, tapno maideklaratayo a nalinteg babaen ti pammati ken Kristo ken saan a babaen ti panangsurot iti linteg, ta awan ti tao* a maideklara a nalinteg babaen ti panangsurotna iti linteg.+ 17 No naammuan met a managbasoltayo bayat nga ikagkagumaantayo ti maideklara a nalinteg babaen ken Kristo, ni Kristo aya ngarud ti mangisungsungsong kadatayo nga agbasol? Saan! 18 No bangonek manen dagiti rinebbak, ipakpakitak a managbasolak. 19 Ta babaen ti linteg, natayak para iti linteg,+ tapno agbiagak para iti Dios. 20 Nailansaak iti kayo a kadua ni Kristo.+ Saanakon nga agbibiag para iti bagik+ no di ket agbibiagak a maikaykaysa ken Kristo. Talaga nga agbibiagakon maitunos iti pammatik iti Anak ti Dios+ a nangayat kaniak ken nangisakripisio iti biagna para kaniak.+ 21 Saanko nga ilaksid* ti nagpaiduma a kinaimbag ti Dios,+ ta talaga nga awan ti serserbi ti ipapatay ni Kristo no ti maysa a tao ket agbalin a nalinteg babaen ti linteg.+

3 O dakayo a maag a taga-Galacia! Asino ti dakes a nangimpluensia kadakayo,+ uray no nailawlawagen kadakayo ti pannakailansa ni Jesu-Kristo iti kayo?+ 2 Saludsodek* man kadakayo: Inawatyo kadi ti espiritu gapu iti panangsurotyo iti linteg wenno gapu iti panamatiyo iti nangngegyo?+ 3 Nakaro kadi ti kinamaagyo? Idi damo, agpapaiwanwankayo iti nasantuan nga espiritu,* ngem ita panagrasrason kadin ti tattao* ti sursurotenyo?+ 4 Awan aya ti serserbi ti nagadu a panagsagabayo? Diak mamati nga awan serserbina. 5 Gapuna, daydiay aya mangipapaay kadakayo iti espiritu ken mangar-aramid kadagiti milagro+ kadakayo, ar-aramidenna dayta gapu ta sursurotenyo ti linteg wenno gapu iti panamatiyo iti nangngegyo? 6 Kas ken Abraham a “namati ken Jehova,* ket naibilang kas nalinteg.”+

7 Sigurado nga ammoyo a dagidiay addaan iti pammati ket isuda dagiti annak ni Abraham.+ 8 Impakpakauna ti Dios iti kasuratan nga ideklarana a nalinteg dagiti tattao kadagiti nasion gapu iti pammatida, isu a nasaksakbay nga impakaammona ti naimbag a damag ken Abraham idi imbagana: “Mabendisionanto ti amin a nasion babaen kenka.”+ 9 Isu a mabembendisionan dagidiay addaan iti pammati a kas ken Abraham nga addaan iti pammati.+

10 Mailunod ti amin nga agpampannuray iti panangsurot iti linteg, ta naisurat: “Mailunod daydiay saan a mangsurot iti amin a naisurat iti lukot daytoy a Linteg ken saan nga agtulnog kadagita.”+ 11 Nalawag met nga awan ti maideklara a nalinteg iti sanguanan ti Dios babaen ti panagtulnog iti linteg,+ ta “agbiagto ti nalinteg gapu iti pammatina.”+ 12 Ita ti Linteg ket saan a naibatay iti pammati. Imbes ketdi, “agbiagto ti mangtungpal kadagita.”+ 13 Ginatangnatayo ni Kristo+ isu a nawayawayaantayo+ iti lunod ti Linteg babaen ti panagbalinna a lunod imbes a datayo, ta naisurat: “Nailunod ti tunggal tao a naibitin iti kayo.”+ 14 Naaramid dayta tapno babaen ken Kristo Jesus, ti bendision ni Abraham ket makadanon kadagiti nasion,+ tapno maawattayo koma ti naikari nga espiritu+ babaen ti pammatitayo.

15 Kakabsat, mangusarak iti ilustrasion maibatay iti pudno a pasamak: Apaman a mapatalgedan ti tulag, uray no tao laeng ti nangpatalged, awan ti makawaswas wenno makainayon iti aniaman iti dayta. 16 Adda dagiti inkari ti Dios ken Abraham ken iti kaputotanna.*+ Saan a naibaga: “ken kadagiti kaputotam,”* a kasla aduda. Imbes ketdi, naibaga: “ken iti kaputotam,”* a tumukoy iti maysa nga isu ni Kristo.+ 17 Ibagak met daytoy: Ti Dios ti immuna a nangaramid iti tulag, ket kalpasan ti 430 a tawen,+ intedna ti Linteg, ngem saan a dayta ti nangwaswas iti tulagna ken iti karina. 18 Ta no ti tawid ket maibatay iti linteg, saanen a maibatay dayta iti kari; ngem siaasi nga inted dayta ti Dios ken Abraham babaen ti maysa a kari.+

19 Apay ngarud a naited ti Linteg? Nainayon dayta tapno maipakita dagiti salungasing,+ agingga a dumteng ti kaputotan*+ a nakaitedan ti kari. Dagiti anghel ti nangted iti Linteg+ babaen ti maysa a mangibabaet.+ 20 Awan ti mangibabaet no maymaysa laeng a persona ti maseknan, ngem ti Dios ket maymaysa. 21 No kasta, ti kadi Linteg ket maikontra kadagiti kari ti Dios? Saan! Ta no naited ti maysa a linteg a makaited iti biag, maibilangtayo ngarud a nalinteg babaen ti panangsurottayo iti linteg. 22 Ngem ipakita ti Kasuratan a ti amin ket naipasidong iti basol. Isu a ti kari a naibatay iti pammati ken Jesu-Kristo ket maited kadagidiay mangipakita nga adda pammatida kenkuana.

23 Nupay kasta, sakbay a dimteng ti pammati, ay-aywanannatayo idi ti linteg ket naipasidongtayo iti dayta, nga ur-urayentayo ti pammati a dandani idin maipalgak.+ 24 Isu a nagbalin ti Linteg a manangaywan* kadatayo a mangiturong ken Kristo,+ tapno maideklaratayo koma a nalinteg gapu iti pammatitayo.+ 25 Ngem ita ta dimtengen ti pammati,+ awantayon iti sidong ti maysa a manangaywan.*+

26 Kinapudnona, annaknakay amin ti Dios+ babaen ti pammatiyo ken Kristo Jesus.+ 27 Ta aminkayo a nabautisaran ken Kristo tultuladenyon* dagiti kababalin ni Kristo.+ 28 Awan ti Judio wenno Griego,+ awan ti adipen wenno siwayawaya a tao,+ awan ti lalaki wenno babai,+ ta maymaysakayo amin a naikaykaysa ken Kristo Jesus.+ 29 Ta no kukuanakayo met ni Kristo, talaga a kaputotannakayo*+ ni Abraham, ket tawidenyonto+ ti naikari kenkuana.+

4 Ibagak kadakayo a bayat nga ubing pay ti agtawid, kapadana ti maysa nga adipen, uray no isu ti apo ti amin a bambanag, 2 ngem adda dagiti mangaywan kenkuana ken mangasikaso iti balayna agingga iti aldaw a nasaksakbay nga inkeddeng ti amana. 3 Kastatayo met idi ubbingtayo pay. Naadipentayo kadagiti pagdamdamuan a bambanag iti lubong.+ 4 Ngem idi dimteng ti naikeddeng a tiempo, imbaon ti Dios ti Anakna, nga inyanak ti maysa a babai+ ken nagbiag maitunos iti linteg,+ 5 tapno mabayadanna ti gatad a pangwayawaya kadagiti naadipen iti linteg,+ ket maampontayo kas annak.+

6 Gapu ta dakayo ket annak, inted ti Dios iti pusotayo+ ti espiritu+ nga adda iti Anakna. Dayta ti mangtignay kadatayo a mangipukkaw iti: “Abba,* Ama!”+ 7 Isu a saankan nga adipen no di ket maysakan nga anak; ket gapu ta maysaka nga anak ti Dios, ikkannakanto met iti tawid.+

8 Nupay kasta, idi saanyo nga am-ammo ti Dios, ad-adipennakayo dagiti saan a talaga a dios. 9 Ngem ita ta am-ammoyon ti Dios, wenno am-ammonakayon ti Dios, apay a subsublianyo manen dagiti nakapuy+ ken awan patpategna a pagdamdamuan a bambanag ken kayatyo ti agpaadipen manen kadagita?+ 10 Istriktokayo a mangngilin iti al-aldaw ken bulbulan+ ken pampanawen ken tawtawen. 11 Madanaganak amangan no awanen ti serserbi ti panagreggetko a timmulong kadakayo.

12 Kakabsat, pangngaasiyo ta agbalinkayo a kas kaniak, ta kaslaak met laeng kadakayo idi.+ Awan idi ti dakes nga inaramidyo kaniak. 13 Ngem ammoyo a gapu ta masakitak idi, naipakaammok kadakayo ti naimbag a damag iti umuna a gundaway. 14 Ken nupay maysa a pannubok kadakayo ti panagsakitko, didak inumsi wenno ginura;* inawatdak ketdi a kas anghel ti Dios, kas ken Kristo Jesus. 15 Ayannan daydi kinaragsakyo? Ta masiguradok a no mabalin la koma, suatenyo pay ketdi idi dagiti matayo tapno itedyo kaniak.+ 16 Ita, nagbalinak kadin a kabusoryo ta imbagak kadakayo ti pudno? 17 Ar-aramidenda ti amin a kabaelanda a mangallukoy kadakayo ngem saan a nasayaat ti panggepda; kayatdakayo nga iyadayo kaniak tapno magagarankayo a sumurot kadakuada. 18 Nupay kasta, kanayon a nasayaat nga adda sireregta a mangallukoy kadakayo no la ket ta nasayaat ti panggepna, ken saan laeng a no agkakaduatayo, 19 ay-ayatek nga annakko.+ Ta gapu kadakayo, marikriknak manen ti ut-ot a kas iti marikna ti agpasikal agingga a matuladyo dagiti kababalin ni Kristo. 20 No la koma addaak iti sanguananyo ita tapno kasaritakayo iti sabali a pamay-an, ta maburiboranak iti mapaspasamak kadakayo.

21 Ibagayo man kaniak, dakayo a mayat a sumurot iti linteg, Diyo aya ammo ti ibagbaga ti Linteg? 22 Kas pagarigan, naisurat nga adda dua nga annak ni Abraham, maysa iti adipenna a babai+ ken maysa iti siwayawaya a babai;+ 23 ngem daydiay inyanak ti adipen ket naipasngay iti natural a pamay-an,*+ ngem daydiay inyanak ti siwayawaya a babai ket babaen ti kari.+ 24 Maibilang dagitoy a bambanag kas simboliko a drama; ta dagitoy a babbai kaipapananna ti dua a tulag, ti maysa ket manipud Bantay Sinai,+ a mangipasngay kadagiti annak para iti pannakaadipen, ket ni Hagar ti iladawan dayta. 25 Ni Hagar kaipapananna ti Sinai+ a maysa a bantay idiay Arabia, ket irepresentarna ti Jerusalem ita, ta maad-adipen a kadua dagiti annakna. 26 Ngem siwayawaya ti Jerusalem idiay ngato, ken isu ti inatayo.

27 Ta naisurat: “Agragsakka, sika a lupes* a di aganak; agpukkawka a siraragsak, sika a saan pay a nagpasikal; ta ad-adu ti annak daydiay nabaybay-an a babai ngem ti annak ti babai nga addaan iti asawa.”+ 28 Kakabsat, dakayo ket annak gapu iti kari ti Dios a kas idi ken Isaac.+ 29 Ngem no kasano idi a daydiay nayanak iti natural a pamay-an* ket rinugianna nga indadanes daydiay nayanak babaen ti espiritu,+ kasta met ita.+ 30 Ngem ania ti ibaga ti kasuratan? “Papanawem daytoy nga adipen a babai ken ti anakna, ta saanto a makipagtawid ti anakna iti anak ti siwayawaya a babai.”+ 31 Gapuna, kakabsat, annaknatayo ti siwayawaya a babai, saan a ti adipen a babai.

5 Dayta a wayawaya ti pinangwayawaya kadatayo ni Kristo. Agtakderkayo a sititibker+ ken diyo ipalubos nga awitenyo manen ti sangol ti pannakaadipen.+

2 Dumngegkayo! Siak ni Pablo. Ibagbagak kadakayo a no nakugitkayo, saankayo a magunggonaan iti inaramid ni Kristo.+ 3 Ipalagipko manen iti tunggal lalaki nga agpakugit nga isu ket obligado a mangsurot iti intero a Linteg.+ 4 Naisinakayo ken Kristo, dakayo a mangikagkagumaan a maideklara a nalinteg babaen ti panangsurotyo iti linteg;+ naipuerakayon iti nagpaiduma a kinaimbagna. 5 Ngem ur-urayenmi ti panagbalinmi a nalinteg iti sanguanan ti Dios a posible laeng babaen ti nasantuan nga espiritu ken pammatimi. 6 Kadagiti naikaykaysa ken Kristo Jesus, saan a napateg ti pannakakugit wenno ti saan a pannakakugit+ no di ket ti pammati a maipakita babaen ti ayat.

7 Nagsayaat idi ti panagtarayyo.+ Asino ti nanglapped kadakayo nga agtultuloy nga agtulnog iti kinapudno? 8 Daytoy a pamay-an ti panangguyugoy ket saan a naggapu iti Daydiay mangay-ayab kadakayo. 9 Ti bassit a lebadura paalsaenna ti intero a masa.+ 10 Agtalekak nga umanamongkayo kaniak, dakayo a naikaykaysa iti Apo.+ Ngem ti asinoman a mangal-allilaw kadakayo+ awatennanto ti dusa a pakaikarianna. 11 Kakabsat, no ikaskasabak pay laeng ti pannakakugit, apay a maidaddadanesak pay laeng? Ta no kasta ti ar-aramidek, saanen a pakaitibkolan dagiti tattao ti panangisurok maipapan iti ipapatay ni Jesus iti kayo a pagtutuokan.*+ 12 Kayatko nga agpakapon* pay ketdi koman dagiti lallaki a mangpadpadas a mangallilaw kadakayo.

13 Naayabankayo a mawayawayaan, kakabsat; ngem diyo koma usaren daytoy a wayawaya kas gundaway tapno surotenyo dagiti tarigagay ti lasagyo,*+ ngem agpaadipenkayo iti maysa ken maysa babaen ti ayat.+ 14 Ta ti intero a Linteg ket natungpal* iti maysa a bilin: “Masapul nga ayatem ti kaarrubam a kas iti bagim.”+ 15 Ngem no itultuloyyo ti agkikinnagat ken agiinnalun-on,+ agannadkayo a dikayo agiinnibus.+

16 Ngem ibagak nga itultuloyyo ti magna babaen ti espiritu+ tapno diyo pulos masurot dagiti tarigagay ti lasagyo.+ 17 Ta ti tarigagay ti lasag ket maikontra iti espiritu, ken ti espiritu ket maikontra iti tarigagay ti lasag. Agkinnontra dagitoy, isu a diyo maaramid dagiti mismo a kayatyo nga aramiden.+ 18 Kasta met a no idaldalannakayo ti espiritu, saannakayo nga iturturayan ti linteg.

19 Nalawag a makita dagiti aramid ti lasag, ket dagita ti seksual nga immoralidad,*+ kinarugit, nakaal-alas a kababalin,*+ 20 idolatria, espiritismo,*+ guranggura, apa, imon, panagpungpungtot, panagkikinnontra, panagsisina, panangbuangay kadagiti sekta, 21 apal, panagbarbartek,+ nalabes a panagragragsak, ken dagiti bambanag a kas kadagitoy.+ Pakpakdaarankayo maipapan kadagitoy a banag a kas met laeng iti panangpakdaarko idi kadakayo, a dagiti agar-aramid kadagita ket saanto nga agtawid iti Pagarian ti Dios.+

22 Ngem ti bunga ti espiritu ket ayat, rag-o, talna, kinaanus,* kinaimbag, kinasayaat,+ pammati, 23 kinaalumamay, panagteppel.+ Awan ti linteg a maibusor kadagita. 24 Mainayon pay, dagiti adalan ni Kristo Jesus pinataydan* ti amin a derrep ken tarigagay ti lasagda.+

25 No agbibiagtayo babaen ti espiritu, itultuloytayo met a suroten a siuurnos ti panangidalan ti espiritu.+ 26 Ditay koma agbalin a napangas,+ ditay irugrugi ti panagkokompetensia,+ ken ditay agiinnapal.

6 Kakabsat, uray no makaaramid ti maysa a tao iti di umiso sakbay a maamirisna dayta, dakayo nga addaan kadagiti naespirituan a kualipikasion* padasenyo nga aturen a siaalumamay.+ Ngem agannadkayo,+ amangan no masulisogkayo met.+ 2 Itultuloyyo ti agtitinnulong a mangawit kadagiti pakadagsenan ti maysa ken maysa+ tapno matungpalyo ti linteg ti Kristo.+ 3 Ta no panunoten ti maysa a tao nga isu ket importante idinto ta saan met,+ al-allilawenna ti bagina. 4 Ngem sukimaten koma ti tunggal maysa dagiti aramidna+ tapno addanto panggapuanna nga agrag-o kadagiti aramidna, ken saan a gapu iti panangikomparana iti bagina iti sabali.+ 5 Ta ibaklay ti tunggal maysa ti bukodna nga awit.*+

6 Kanayonanna, asinoman a masursuruan* iti sao iranudna koma ti amin a nasayaat a bambanag iti daydiay mangisursuro* kenkuana.+

7 Dikay agpaallilaw: Saanyo a mabalin a lokuen ti Dios. Ta aniaman nga imulmula ti maysa a tao, daytanto met ti apitenna;+ 8 ta ti agimulmula para iti lasagna ket agapitto iti pannakadadael manipud iti lasagna. Ngem ti agimulmula para iti espiritu ket agapitto iti biag nga agnanayon manipud iti espiritu.+ 9 Isu a ditay koma sumuko nga agaramid iti nasayaat, ta iti naikeddeng a tiempo, agapittayto no ditay mabannog.*+ 10 Gapuna, bayat nga adda gundawaytayo,* agaramidtayo koma iti naimbag iti amin, ngem nangnangruna kadagiti kapammatiantayo.

11 Kitaenyo ti kadakkel dagiti letra nga inusarko a nagsurat kadakayo.

12 Amin dagidiay mayat a mangay-ayo kadagiti tattao* ket isuda dagidiay mangpilpilit kadakayo nga agpakugit tapno laeng maliklikanda ti maidadanes gapu iti Kristo.* 13 Ta uray dagidiay agpakpakugit saanda met a tungtungpalen ti Linteg,+ ngem kayatda a makugitkayo tapno adda panggapuanda nga agpannakkel gapu iti naaramid iti bagiyo. 14 Ngem diak koma pulos agpannakkel, malaksid iti panangipannakkelko ken Apotayo a Jesu-Kristo a natay iti kayo a pagtutuokan.*+ Para kaniak, maikari idi ti lubong a matay* babaen kenkuana, ngem para iti lubong, maikariak a matay babaen kenkuana. 15 Ta saan a napateg ti pannakakugit wenno ti saan a pannakakugit.+ Ti napateg ket ti baro a parsua.+ 16 Maadda koma iti Israel ti Dios+ ti talna ken asi, wen, iti amin a mangsursurot a siuurnos iti daytoy a prinsipio.

17 Manipud ita, awan koman ti mangriribuk kaniak, ta adda kaniak dagiti marka a mangtanda a maysaak nga adipen ni Jesus.+

18 Kakabsat, adda koma kadakayo ti nagpaiduma a kinaimbag ni Apotayo a Jesu-Kristo gapu iti nasayaat a kababalin nga ipakpakitayo. Amen.