SURAT KADAGITI TAGA-EFESO

1 Siak ni Pablo a maysa nga apostol ni Kristo Jesus babaen ti pagayatan ti Dios. Nagsuratak kadagiti nasantuan nga adda dita Efeso+ ken matalek a naikaykaysa ken Kristo Jesus:

2 Adda koma kadakayo ti nagpaiduma a kinaimbag ken talna manipud iti Dios nga Amatayo ken ni Apo Jesu-Kristo.

3 Maidaydayaw koma ti Dios ken Ama ni Apotayo a Jesu-Kristo. Ta kas naikaykaysa ken Kristo, inikkannatayo iti tunggal kita ti naespirituan a bendision idiay langit,+ 4 ken pinilinatayo a maikaykaysa kenkuana* sakbay ti panangrugi ti sangatauan, tapno maipakitatayo ti ayat ken agbalintayo a nasantuan ken awan pagkuranganna+ iti sanguananna. 5 Ta nasaksakbay nga inkeddengna+ nga amponennatayo kas annakna+ babaen ken Jesu-Kristo, maitunos iti pakaragsakan ken pagayatanna.+ 6 Iti kasta, maidaydayaw gapu ta inusarna ti ay-ayatenna nga Anak+ a mangipakita iti nadayag a nagpaiduma a kinaimbagna+ kadatayo. 7 Babaen ti Anakna, nasubbot ken nawayawayaantayo. Wen, napakawan dagiti basoltayo babaen ti dara ti Anakna,+ maitunos iti kinaaglaplapusanan ti nagpaiduma a kinaimbagna.

8 Sipaparabur nga impakita kadatayo ti Dios ti nagpaiduma a kinaimbagna babaen ti amin a sirib ken pannakaawat,* 9 tapno maipakaammona kadatayo ti sagrado a palimed+ ti pagayatanna. Maitunos iti pakaragsakanna, pinanggepna 10 ti mangipasdek iti administrasion* apaman a malpas dagiti inkeddengna a tiempo, tapno ummongenna ti amin a banag nga agpaituray ken Kristo, ti bambanag idiay langit ken ti bambanag ditoy daga.+ Wen, kenkuana, 11 a nakaikaykaysaantayo ken kaduatayo nga agtawid,+ kas nasaksakbay nga inkeddeng ti Dios maitunos iti panggepna. Ar-aramidenna ti amin a banag maitunos iti pagayatanna, 12 tapno babaen kadatayo, kas dagiti umuna a mangnamnama iti Kristo, maidaydayaw ken maipadayag ti Dios. 13 Ngem nanginanamakayo met kenkuana kalpasan a nangngegyo ti sao ti kinapudno, ti naimbag a damag maipapan iti pannakaisalakanyo. Kalpasan a namatikayo, naselioankayo*+ babaen kenkuana iti naikari a nasantuan nga espiritu, 14 a maysa a nasaksakbay a garantia* ti tawidtayo,+ tapno babaen ti subbot,+ mawayawayaan dagiti sanikua ti Dios,+ para iti pakaidaydayawan ken pakaipadayaganna.

15 Dayta met ti makagapu a manipud idi nadamagko ti pammatiyo ken Apo Jesus ken ti ayat nga ipakpakitayo iti amin a nasantuan, 16 diak pulos sumarsardeng nga agyaman gapu kadakayo. Kanayon a dakdakamatenkayo kadagiti kararagko, 17 tapno ti Ama ti kinadayag, a Dios ni Apotayo a Jesu-Kristo, ikkannakayo koma iti pannakabalin tapno agbalinkayo a masirib ken maawatanyo dagiti ipalgakna nga umiso a pannakaammo maipapan kenkuana.+ 18 Linuktan ti Dios ti pusoyo tapno makita ken maammuanyo ti impanamnamana kadakayo ken dagiti awan kapadana a kinabaknang nga inkarina nga ipatawid kadagiti nasantuan,+ 19 ken ti kadakkel ti pannakabalin nga impakitana kadatayo a manamati.+ Maitunos dayta iti panangusarna iti kasta unay a kinabilegna, 20 idi pinagungarna ni Kristo ken pinagtugawna iti makannawanna+ idiay langit, 21 nga adayo a nangatngato ngem iti tunggal gobierno, autoridad, pannakabalin, kinaturay, ken iti tunggal nagan a naipanagan,+ saan laeng nga iti daytoy a sistema ti bambanag,* no di pay ket iti daydiay umayto. 22 Impasakupna met ti amin a banag iti baba dagiti saka ni Kristo,+ ket pinagbalinna nga ulo ti amin a banag iti kongregasion,+ 23 a dayta ti bagina,+ a napno iti amin a banag maipapan kenkuana, a mangkompleto iti amin a banag.

2 Kanayonanna, pinagbiagnakayo ti Dios nupay naibilangkayo idi a natay gapu kadagiti kamali ken basolyo.+ 2 Agbibiagkayo idi a kas iti sistema ti bambanag* daytoy a lubong,+ maitunos iti agturay iti autoridad ti angin,+ ti espiritu+ nga agtigtignay ita kadagiti annak ti kinasukir. 3 Wen, adda idi tiempo nga agbibiagtayo amin a kas kadakuada maitunos kadagiti tarigagay ti lasagtayo.+ Ar-aramidentayo idi ti kayat ti managbasol a bagi ken panunottayo,+ ket nainkasigudan nga annaknatayo ti pungtot+ kas iti dadduma. 4 Ngem ti Dios ket napnuan iti asi,+ ken gapu iti dakkel a panagayatna kadatayo,+ 5 pinagbiagnatayo ken inkaykaysanatayo ken Kristo, uray pay idi naibilang a nataytayo gapu kadagiti kamali+​—naisalakankayo babaen ti nagpaiduma a kinaimbagna. 6 Pinagbiagnatayo met ken inikkannatayo iti pagtugawan idiay langit gapu ta inkaykaysanatayo ken Kristo Jesus,+ 7 tapno iti sumungsungad a sistema ti bambanag,* ipakitana ti di maartapan a kinaaglaplapusanan ti nagpaiduma a kinaimbagna babaen ti kinaparaburna* kadatayo a maikaykaysa ken Kristo Jesus.

8 Gapu iti pammati, naisalakankayo babaen daytoy a nagpaiduma a kinaimbagna,+ ket saan a gapu iti panagreggetyo. Imbes ketdi, sagut dayta ti Dios. 9 Saan a resulta dayta dagiti aramidyo,+ tapno awan ti rason ti asinoman nga agpannakkel. 10 Datayo ket inaramid* ti Dios ken naparsuatayo+ a maikaykaysa ken Kristo Jesus+ tapno agaramidtayo iti naimbag, a nasaksakbay nga inyurnos ti Dios nga aramidentayo.

11 Laglagipenyo ngarud a nayanakkayo idi kas tattao kadagiti nasion. “Saan a nakugit” ti inyawag idi kadakayo dagidiay “kinugit” dagiti tattao. 12 Iti dayta a tiempo, diyo ammo ti Kristo, naisinakayo iti nasion ti Israel ken saankayo a karaman kadagiti tulag ti kari.+ Agbibiagkayo idi iti lubong nga awanan iti namnama ken awanan iti Dios.+ 13 Ngem ita ta naikaykaysakayon ken Kristo Jesus, dakayo nga adayo idi, nayasidegkayon babaen ti dara ti Kristo. 14 Ta isu ti nangted kadatayo iti talna.+ Isu met ti namagkaykaysa iti dua a grupo+ ken nangrebba iti pader iti tengnga a namagsina kadakuada.+ 15 Babaen ti panangidatonna iti bagina, pinagpatinggana ti panagginnura ken ti Linteg ni Moises a buklen dagiti bilin, tapno ti dua a grupo a maikaykaysa kenkuana ket maparsuana a kas maysa a baro a tao+ ken mapagkappiana ida, 16 ken tapno naan-anay a matulonganna ti dua a grupo kas maysa a bagi a maikappia iti Dios babaen ti kayo a pagtutuokan,*+ gapu ta inikkatnan ti panagginnura+ babaen ti ipapatayna. 17 Ket immay ken indeklarana ti naimbag a damag ti kappia kadakayo nga adda idi iti adayo, ken kappia kadagidiay adda iti asideg. 18 Ta babaen kenkuana, datayo a dua a grupo ket nawayan a makaasideg iti Ama babaen ti maymaysa nga espiritu.

19 Saankayo ngaruden nga estranghero ken ganggannaet,+ no di ket kailian+ dagiti nasantuan ken miembro ti sangakabbalayan ti Dios,+ 20 ket naibangonkayon iti rabaw ti pundasion dagiti apostol ken propeta,+ bayat a ni Kristo Jesus a mismo ti pundasion a bato a pasuli.+ 21 Ti intero a pasdek ken ti amin a pasetna ket agtutunos ti panagkokonektarda.+ Ken gapu ta naikaykaysa kenkuana, dumakdakkel dayta tapno agbalin a nasantuan a templo para ken Jehova.*+ 22 Naikaykaysakayo kenkuana isu a maibangbangonkayo met a sangsangkamaysa tapno agbalinkayo a kas pasdek a pagnaedan ti Dios nga ayan ti espirituna.+

3 Maigapu iti daytoy, siak, ni Pablo, naibaludak+ gapu ken Kristo Jesus ken gapu kadakayo a tattao kadagiti nasion. 2 Sigurado a nangngegyon nga inawatko ti responsabilidad a tumulong kadakayo+ tapno magunggonaankayo iti nagpaiduma a kinaimbag ti Dios. 3 Wen, naipalgak kaniak ti sagrado a palimed kas iti insuratko idin kadakayo iti ababa. 4 Isu nga inton mabasayo daytoy, maamirisyo ti pannakaawatko maipapan iti sagrado a palimed+ ti Kristo. 5 Iti dadduma a henerasion, saan a naipakaammo kadagiti tattao daytoy a palimed a kas iti kalawag ti pannakaipalgakna ita kadagiti nasantuan nga apostolna ken kadagiti propeta babaen ti espiritu.+ 6 Daytoy ti palimed: dagiti tattao kadagiti nasion a maikaykaysa ken Kristo Jesus ket makipagtawid ken agbalin a paset ti isu met la a grupo*+ ken kaduatayo nga umawat iti naikari kadatayo babaen ti naimbag a damag. 7 Nagbalinak a ministro daytoy gapu iti awan bayadna a sagut ti nagpaiduma a kinaimbag ti Dios a naited kaniak maitunos iti pannakabalinna.+

8 Daytoy nagpaiduma a kinaimbag ket naipakita kaniak+ a kanunumuan iti amin a nasantuan,+ tapno ideklarak kadagiti nasion ti naimbag a damag maipapan kadagiti di matukod a kinabaknang ti Kristo 9 ken tapno ipakitak iti amin ti pannakaibanag ti sagrado a palimed+ a nabayag a saan nga impalgak ti Dios* a nangparsua iti amin a bambanag. 10 Kasta ti naaramid ita tapno babaen ti kongregasion,+ ti sirib ti Dios a makita iti nadumaduma a pamay-an ket maipakaammo koma kadagiti gobierno ken turay idiay langit.+ 11 Maitunos dayta iti agnanayon a panggepna mainaig iti Kristo,+ ni Jesus nga Apotayo, 12 a babaen kenkuana, sigurado a nawayatayo nga agsao ken nawayatayo a makaasideg iti Dios+ gapu iti pammatitayo kenkuana. 13 Isu a kiddawek a saankayo a sumuko maigapu kadagiti rigatko para kadakayo, ta kaipapanan dagitoy ti pannakaipadayagyo.+

14 Dayta ti makagapu nga agparintumengak iti Ama, 15 a nakautangan ti amin a pamilia idiay langit ken ditoy daga iti naganda. 16 Ikarkararagko iti nakadaydayag a Dios a pabilgenna koma ti kinataoyo+ babaen ti pannakabalin ti espirituna, 17 ken maadda koma ti Kristo ken ti ayat kadagiti pusoyo gapu iti pammatiyo kenkuana.+ Mairamut+ ken maipasdekkayo koma iti pundasion,+ 18 tapno kas iti amin a nasantuan, interamente a maawatanyo a naimbag ti kaakaba ken kaatiddog ken kangato ken kauneg ti kinapudno, 19 ken tapno maammuanyo ti ayat ti Kristo+ a napatpateg ngem iti pannakaammo, tapno maawatyo ti amin nga ipapaay ti Dios.

20 Iti daydiay makabael a mangaramid iti ad-adu pay ngem iti aglaplapusanan unay, nga agsobsobra pay iti amin a banag a kiddawen wenno mapanunottayo,+ maitunos iti pannakabalinna nga agtigtignay kadatayo,+ 21 maikari kenkuana ti dayag babaen ti kongregasion ken babaen ken Kristo Jesus iti amin a henerasion iti agnanayon nga awan inggana. Amen.

4 Gapuna, kas balud+ maigapu iti Apo, ipakaasik nga agbiagkayo maitunos+ iti nakaayabanyo. 2 Kanayon koma a napakumbabakayo,*+ naalumamay, naanus,+ agpipinnasensiakayo gapu iti ayat,+ 3 agkakappiakayo, ken ikagumaanyo a taginayonen ti panagkaykaysa a nagun-odanyo babaen ti nasantuan nga espiritu.+ 4 Adda maysa a bagi,+ ken maysa nga espiritu,+ a kas iti kaadda ti maysa a namnama+ a nakaayabanyo; 5 maysa nga Apo,+ maysa a pammati, maysa a bautismo; 6 maysa a Dios ken Ama ti amin, a kangatuan iti amin ken mangidaldalan babaen ti amin ken mangiwanwanwan iti amin.

7 Naipakita iti tunggal maysa kadatayo ti nagpaiduma a kinaimbag sigun iti panangted ni Kristo iti daytoy awan bayadna a sagut.+ 8 Ta naibaga: “Immuli iti nangato a disso ket nangikuyog kadagiti naipanaw;* nangted kadagiti lallaki a kas sagut.”+ 9 Ania ti kayat a sawen ti “immuli” ngem immulog met iti nababbaba a disso, nga isu ti daga? 10 Daydiay immulog ket isu met laeng daydiay immuli+ iti ngatuen ti intero a langit,+ tapno maitungpalna ti amin a bambanag.

11 Ket intedna ti dadduma kas apostol,+ propeta,+ ebanghelisador,*+ papastor ken mannursuro,+ 12 tapno mailinteg* dagiti nasantuan a tattao, tapno agserbi iti sabsabali,* tapno mapabileg ti bagi ti Kristo,+ 13 agingga nga agkaykaysatayo* iti pammati ken iti umiso a pannakaammo maipapan iti Anak ti Dios, nga agbalintayo a nataengan,+ a kas iti kinanataengan ti Kristo. 14 Isu a ditay koma agbalinen a kasla ubbing, ta dagidiay sumursurot kadagiti ulbod a sursuro+ ti manangallilaw a tattao ket kas iti bangka nga iyallo-allon dagiti dalluyon ken iyalla-alla ti angin. 15 Ngem bayat a sawentayo ti kinapudno, ti koma ayat ti mangtignay kadatayo nga agmataengan iti amin a banag maitunos ken Kristo nga ulotayo.+ 16 Babaen kenkuana, agtutunos ti panagkokonektar ti amin a paset ti bagi+ ken agtitinnulongda a mangipaay kadagiti kasapulan ti bagi. No aramiden a naimbag ti tunggal paset ti akemna, dumakkel ti intero a bagi ket tumibker babaen ti ayat.+

17 Daytoy ngarud ti ibagak ken iyunay-unayko kadakayo iti sanguanan ti Apo, a saanyon a tultuladen ti panagbiag dagiti nasion,+ ta awan serserbi* ti panagpampanunotda.+ 18 Adda iti kinasipnget ti panunotda ken dida awaten ti biag nga ipapaay ti Dios kadatayo, ta ignoranteda ken bimmato ti pusoda. 19 Gapu ta kimmalio ti konsiensiada, igaggagarada ti nakaal-alas a kababalinda*+ ken ti amin a kita ti kinarugit ken kinaagum.

20 Ngem ammoyo a saan a kasta ti Kristo, 21 no la ket ta maitunos iti kinapudno nga insuro ni Jesus ti nangngeg ken nasursuroyo. 22 Naisuro kadakayo nga ikkatenyo ti daan a personalidadyo+ a kas kadagiti dati nga ar-aramidenyo a dumakdakes maitunos kadagiti tarigagayna a mangal-allilaw kadakayo.+ 23 Ket masapul nga itultuloyyo a pabaruen ti puersa a mangiturturong iti panunotyo,*+ 24 ken isuotyo ti baro a personalidad+ a pinarsua ti Dios maitunos iti pagayatanna ken iti agpayso a kinalinteg ken kinapudno.

25 Gapu ta inwaksiyon ti kinaulbod, sawenyo ngarud ti kinapudno iti kaarrubayo,+ ta pasetnatayo amin ti maymaysa a bagi.+ 26 Agpungtotkayo, ngem dikay agbasol;+ diyo ipalubos a lumnek ti init nga agung-ungetkay pay laeng;+ 27 diyo ikkan ti Diablo iti gundaway.*+ 28 Saan koman nga agtakaw ti agtaktakaw. Imbes ketdi, aggaggaget koma nga agtrabaho, nga usarenna dagiti imana nga agaramid iti nasayaat,+ tapno adda mairanudna iti asinoman nga agkasapulan.+ 29 Awan koma ti naalas* a sao a rummuar iti ngiwatyo,+ no di laeng ti nasayaat ken makapabileg a sasao iti aniaman a maitutop a tiempo, tapno magunggonaan dagiti makangngeg.+ 30 Saanyo met a pagleddaangen* ti nasantuan nga espiritu ti Dios,+ a pinangseliona* kadakayo+ para iti aldaw ti pannakawayawayayo babaen ti subbot.+

31 Ikkatenyo kadakayo ti amin a kita ti sakit ti nakem,+ panagunget, panagpungtot, panagbugkaw, nasakit a panagsasao,*+ ken amin a banag a makapainsulto.+ 32 Ngem agbalinkayo a naimbag iti tunggal maysa, sidudungngo a makipagriknakayo,+ ken situtulok nga agpipinnakawankayo a kas met iti panangpakawan ti Dios kadakayo babaen ken Kristo.+

5 Gapuna, kas annak a dungdungnguen, tuladenyo ti Dios,+ 2 ken itultuloyyo nga ipakita ti ayat,+ a kas met iti panagayat kadatayo* ti Kristo+ ken panangtedna iti bagina para kadatayo* kas nabanglo a daton iti Dios.+

3 Saan man la koma a madakamat iti tengngayo ti seksual nga immoralidad* ken ti tunggal kita ti kinarugit wenno kinaagum+ ta saan a maitutop dagita kadagiti nasantuan a tattao;+ 4 uray ti nakababain nga aramid wenno minamaag a panagsasao wenno naalas a panagang-angaw+​—bambanag a di maitutop​—no di ket ti panagyaman.+ 5 Ta ammoyo daytoy, ken bigbigenyo, nga awan ti tao nga agar-aramid iti seksual nga immoralidad*+ wenno narugit a tao wenno naagum a tao,+ kayatna a sawen, maysa nga agdaydayaw iti idolo, nga addaan ti aniaman a tawid iti Pagarian ti Kristo ken ti Dios.+

6 Awan koma ti tao a mangallilaw kadakayo iti awan serserbina a sasao, ta gapu kadagita, ibulos ti Dios ti pungtotna kadagiti nasukir. 7 Isu a diyo tultuladen ida; 8 ta addakayo idi iti sipnget, ngem addakayo itan iti lawag+ kas naikaykaysa iti Apo.+ Itultuloyyo ti magna kas annak ti lawag, 9 ta ti bunga ti lawag ket ti amin a kita ti kinasayaat ken kinalinteg ken kinapudno.+ 10 Itultuloyyo a siguraduen no ania ti makaay-ayo+ iti Apo; 11 ken isardengyo nga aramiden dagiti awan serserbina nga aramid a konektado iti kinasipnget;+ ibutaktakyo ketdi ida. 12 Ta dagiti ar-aramidenda iti nalimed ket nakababain uray madakamat laeng. 13 Ita, amin a maibutbutaktak* ket imbutaktak ti lawag, ta amin a maipakpakita ket lawag. 14 Isu a naibaga: “Agriingka, sika a matmaturog, ken bumangonka manipud ken patay,+ ket agsilnagto kenka ti Kristo.”+

15 No kasta, itultuloyyo ti agannad a naimbag a ti pannagnayo ket saan a kas kadagiti maag no di ket kas kadagiti masirib, 16 nga usarenyo ti tiempoyo iti kasayaatan a pamay-an*+ ta agbibiagtayon kadagiti dakes nga aldaw. 17 Gapu iti daytoy, isardengyo ti agbalin a di nainkalintegan, ngem itultuloyyo a tarusan ti pagayatan ni Jehova.*+ 18 Saankay met nga agbartek iti arak,+ ta agresulta dayta iti panaglablabes,* ngem agtultuloykayo a mapno iti nasantuan nga espiritu. 19 Iti panagsasaritayo,* dagiti koma sasaoyo ket napakuyogan kadagiti salmo, panangidaydayaw iti Dios, ken naespirituan a kanta. Naimpusuan nga agkanta+ ken agtokarkayo+ iti pakaidaydayawan ni Jehova,*+ 20 a kanayon nga agyamankayo+ iti Dios ken Amatayo gapu iti amin a banag iti nagan ni Jesu-Kristo nga Apotayo.+

21 Agpasakupkayo iti maysa ken maysa+ gapu iti panagbuteng ken Kristo. 22 Agpasakup koma ti babai iti asawana+ a kas iti Apo, 23 ta ti asawa a lalaki ti ulo ti asawana a babai+ no kasano a ti Kristo ti ulo ti kongregasion,+ ta isu ti mangisalakan iti daytoy a bagi. 24 Kinapudnona, no kasano a ti kongregasion ket agpaspasakup iti Kristo, masapul met nga agpasakup ti asawa a babai ken ni lakayna iti amin a banag. 25 Asawa a lalaki, itultuloymo nga ayaten ni baketmo,+ no kasano nga inayat met ti Kristo ti kongregasion ken intedna ti bagina para iti dayta,+ 26 tapno mapagbalinna a nasantuan dayta, a daldalusanna iti sao ti Dios a kas iti panangbuggo iti danum,+ 27 tapno ti kongregasion ket agbalin koma a napintas iti sanguananna, nga awanan iti depekto wenno kuretret wenno aniaman a kas kadagita,+ no di ket nasantuan ken awan pagkuranganna.+

28 Kasta met, masapul nga ayaten ti asawa a lalaki ti asawana a babai kas iti bukodna a bagi. Ti lalaki a mangay-ayat ken baketna ay-ayatenna ti bagina, 29 ta awan pay a pulos ti tao a nanggura iti bukodna a bagi,* no di ket pakanen ken dungdungnguenna dayta, a kas met iti panagayat ti Kristo iti kongregasion, 30 ta kamengtayo ti bagina.+ 31 “Daytoy ti makagapu a panawanto ti lalaki ti ama ken inana ket makitiponto* iti asawana, ket ti dua agbalinto a maymaysa a lasag.”+ 32 Nakapatpateg daytoy a sagrado a palimed.+ Ita, ibagbagak ti maipapan ken Kristo ken iti kongregasion.+ 33 Ngem ayaten koma ti tunggal maysa kadakayo ti asawana a babai+ a kas iti panagayatna iti bagina; iti sabali a bangir, masapul nga adda nauneg a respeto ti babai iti asawana a lalaki.+

6 Annak, agtulnogkayo kadagiti nagannakyo+ maitunos iti pagayatan ti Apo, ta daytoy ket nalinteg. 2 “Dayawem da tatang ken nanangmo”+ ti umuna a bilin a kakuykuyog daytoy a kari: 3 “Tapno naimbag ti pagbanagam* ken atiddog ti biagmo ditoy daga.” 4 Ket dakayo nga amma, diyo ruroden dagiti annakyo,+ no di ket itultuloyyo ida a padakkelen iti disiplina+ ken pammagbaga* ni Jehova.*+

5 Dakayo nga adipen, agtulnogkayo kadagiti tattao* nga amoyo,+ a napakuyogan iti nauneg a panagraem ken buteng ken napasnek a puso, a kas iti ipakpakitayo iti Kristo, 6 saan laeng a no kitkitaendakayo tapno maparagsakyo dagiti tattao,*+ no di ket kas ad-adipen ni Kristo a mangar-aramid iti pagayatan ti Dios iti amin a kararua.*+ 7 Agpaadipenkayo nga addaan iti nasayaat a kababalin, para ken Jehova,*+ ket saan a para iti tattao, 8 ta ammoyo a gunggonaanto ni Jehova* ti aniaman a nasayaat nga aramiden ti tunggal maysa,+ adipen man wenno siwayawaya. 9 Dakayo met nga amo, itultuloyyo a tratuen ida iti kasta met la a pamay-an. Diyo butbutngen ida ta ammoyo nga adda idiay langit ti Apoda ken ti Apoyo,+ ket awan ti idumdumana.

10 Kamaudiananna, itultuloyyo ti gumun-od iti pannakabalin+ manipud iti Apo gapu iti kasta unay a kinabilegna. 11 Isuotyo ti kompleto a kabal+ manipud iti Dios tapno makapagtakderkayo a sititibker maibusor kadagiti nasikap nga aramid* ti Diablo; 12 ta makilablabantayo*+ saan a maibusor iti dara ken lasag, no di ket maibusor kadagiti gobierno, maibusor kadagiti autoridad, maibusor kadagiti agturay iti lubong daytoy a kinasipnget, maibusor kadagiti dakes nga espiritu a puersa+ kadagiti nailangitan a disso. 13 Isu nga alaenyo ti kompleto a kabal manipud iti Dios,+ tapno kabaelanyo a sanguen ti dakes nga aldaw ken makapagtakderkayo a sititibker kalpasan a naibanagyo ti amin.

14 Gapuna, agtakderkayo a sititibker. Isuotyo ti barikes ti kinapudno,+ isuotyo ti kinalinteg a proteksion ti barukongyo,+ 15 ken isuotyo kas sapatos ti kinagagar a mangipakaammo iti naimbag a damag ti talna.+ 16 Malaksid kadagitoy, alaenyo ti dakkel a kalasag ti pammati,+ tapno kabaelanyo a depdepen ti amin nga umap-apuy a pana* daydiay managdakdakes.+ 17 Maysa pay, awatenyo ti helmet ti pannakaisalakan,+ ken ti espada ti espiritu nga isu ti sao ti Dios,+ 18 bayat nga itultuloyyo ti agkararag iti nadumaduma a kita ti kararag+ ken panagpakaasi iti amin a tiempo maitunos iti espiritu.+ Tapno maaramidyo dayta, agtalinaedkayo nga alerto ken kanayon nga agpakaasikayo para iti amin a nasantuan a tattao. 19 Ikararagandak met, nga ammokto dagiti ibagak inton agsaoak tapno situtured a maipakaammok ti sagrado a palimed ti naimbag a damag,+ 20 ta maysaak nga embahador a nakakawar,+ ket situtured koma a makapagsaoak maipapan iti dayta, kas iti masapul a panagsaok.

21 Ipadamagto ni Tiquico+ kadakayo ti amin maipapan kaniak tapno maammuanyo met ti kasasaadko. Maysa isuna a dungdungnguen a kabsat ken matalek a ministro iti Apo.+ 22 Ibaonko kadakayo gapu iti daytoy met la a panggep, tapno maammuanyo ti kasasaadmi ken maliwliwanakayo.

23 Maadda koma kadagiti kakabsat ti talna ken ayat agraman pammati manipud iti Dios nga Ama ken iti Apo a ni Jesu-Kristo. 24 Maadda koma ti nagpaiduma a kinaimbag kadagidiay amin a di agkupas ti panagayatda ken Apotayo a Jesu-Kristo.