SURAT KADAGITI TAGA-FILIPOS

1 Siak ni Pablo, ket kaduak ni Timoteo a padak nga adipen ni Kristo Jesus. Nagsuratak iti amin a nasantuan dita Filipos a naikaykaysa ken Kristo Jesus,+ agraman kadagiti manangaywan ken ministerial nga adipen:*+

2 Adda koma kadakayo ti nagpaiduma a kinaimbag ken talna manipud iti Dios nga Amatayo ken ni Apo Jesu-Kristo.

3 Kanayon nga agyamanak iti Diosko no malagipkayo 4 iti tunggal panagpakaasik para kadakayo amin. Kanayon a maragsakanak nga umararaw,+ 5 gapu iti pannakitinnulongyo para* iti naimbag a damag manipud idi umuna nga aldaw nga inawatyo dayta agingga ita. 6 Ta agtalekak a daydiay nangirugi iti daytoy nasayaat nga aramid kadakayo ti mangiringpas+ iti dayta agingga iti aldaw ni Kristo Jesus.+ 7 Gapu ta ay-ayatenkayo unay, rumbeng laeng a panunotek daytoy maipapan kadakayo amin, dakayo a kakaduak a naipakitaan iti nagpaiduma a kinaimbag, agpadpada iti pannakaibaludko+ ken iti panangidepensak ken panagreggetko a gumun-od iti legal a kalintegan a mangikasaba iti naimbag a damag.+

8 Ta saksik ti Dios a mailiwak unay kadakayo amin, ta nadungngo ti panagayatko kadakayo a kas iti ayat ni Kristo Jesus. 9 Ket daytoy ti agtultuloy nga ikarkararagko, nga ad-adda pay koma+ nga umadu ti ayatyo iti umiso a pannakaammo+ ken naan-anay a pannakatarus;+ 10 tapno masiguradoyo ti napatpateg a bambanag.+ Iti kasta, awan koma ti pakapilawanyo ken diyo maitibkol ti sabsabali+ agingga iti aldaw ni Kristo; 11 ken mapnokayo koma iti nalinteg a bunga, babaen ti tulong ni Jesu-Kristo,+ a pakaitan-okan ken pakaidayawan ti Dios.

12 Kakabsat, kayatko ita a maammuanyo a kinaagpaysuanna, ti kasasaadko ket nagbanag iti pannakaisaknap ti naimbag a damag. 13 Ta ti pannakaibaludko+ maigapu ken Kristo ket naammuan+ ti amin a Guardia a Pretorio ken ti amin a dadduma pay. 14 Gapu iti pannakaibaludko, napabileg ti kaaduan kadagiti kakabsat iti Apo, isu a saandan a mabuteng ket naturtureddan a mangipakaammo iti sao ti Dios.

15 Agpayso nga ikaskasaba ti dadduma ti Kristo gapu iti apal ken panagriribal, ngem ti dadduma ket gapu iti nasayaat a motibo. 16 Dagidiay nasayaat ti motiboda ipakpakaammoda ti Kristo gapu iti ayat, ta ammoda a nadutokanak a mangidepensa iti naimbag a damag.+ 17 Ngem aramiden dayta dagidiay naapal ken mannakiribal gapu ta kayatda ti makiriri, saan a gapu iti nasayaat a motibo, ta kayatda nga agproblemaak bayat ti pannakaibaludko. 18 Ania ti resultana? Aginkukunada man wenno agpayso, maipakpakaammo ketdi ti maipapan ken Kristo, ket maragsakanak iti dayta. Kinapudnona, itultuloyko ti agrag-o, 19 ta ammok nga agresulta daytoy iti pannakaisalakanko babaen ti panagpakaasiyo+ ken ti tulong ti espiritu ni Jesu-Kristo.+ 20 Gapu iti gagarko nga agur-uray ken iti namnama, diakto pulos mabain, no di ket situturedak nga agsao* tapno kas iti kanayon a mapasamak, maipadayag ti Kristo gapu kaniak,* sibibiagak man wenno matayak.+

21 Ta no sibibiagak, agbiagak para ken Kristo,+ ket no matayak, pagimbagak dayta.+ 22 Ita, no agtultuloyak nga agbiag iti daytoy a bagi, ad-adu pay ti maaramidak para ken Kristo. Ngem diak ibaga no anianto ti piliek. 23 Diak ammo no ania ti piliek kadagitoy dua a banag, ta kayatko ti mawayawayaan ken makikadua ken Kristo,+ a sigurado nga adayo a nasaysayaat.+ 24 Ngem napatpateg nga agtultuloyak a sibibiag iti daytoy a bagi gapu kadakayo. 25 Gapuna, yantangay agtaltalekak iti daytoy, ammok nga agtalinaedak pay a sibibiag ken makikadua kadakayo amin tapno rumang-aykayo ken agrag-okayo iti pammatiyo, 26 tapno inton agsubliak kadakayo, lallalo a maragsakankayo gapu ta pasurotnakayo ni Kristo Jesus.

27 Isuna laeng ta agbiagkayo* iti pamay-an a maikari iti naimbag a damag maipapan iti Kristo,+ tapno uray no umayak ket makitakayo wenno no awanak, madamagko koma ken maammuak a natibkerkayo, agkakapanunotankayo,* agkaykaysakayo,*+ ken agdadanggaykayo a mangikagumaan nga agtalinaed ti pammatiyo iti naimbag a damag, 28 ken awan a pulos ti pagbutnganyo kadagiti kabusoryo. Daytoy a mismo ti pammaneknek a madadaeldanto,+ ngem maisalakankayonto;+ ket naggapu daytoy iti Dios. 29 Ta naited kadakayo ti pribilehio maigapu ken Kristo, saan laeng a tapno mamatikayo kenkuana, no di ket tapno agsagabakayo met maigapu kenkuana.+ 30 Ta maipaspasangokayo met iti rigat a nakitayo a nakaipasanguak,+ a nadamagyo a pakaipaspasanguak pay laeng.

2 No ngarud, adda aniaman a maipaayyo a pammaregta babaen ken Kristo, naayat a pangliwliwa, pannakaseknan iti sabsabali, nadungngo a panagayat, ken pannakipagrikna, 2 iranudyo dayta tapno maragsakanak unay ta agkakapanunotankayo, agiinnayatkayo, talaga nga agkaykaysakayo, ken agtutunos ti panunotyo.+ 3 Dikay agaramid iti aniaman gapu iti riri+ wenno kinapangas,+ no di ket agpakumbabakayo,* nga ibilangyo a nangatngato ti sabsabali ngem dakayo,+ 4 a sapulenyo dagiti pagimbagan ti dadduma,+ saan la a dagiti bukodyo a pagimbagan.+

5 Kanayon koma nga adda kadakayo ti panagpampanunot nga adda met ken Kristo Jesus,+ 6 a nupay kas iti Dios,*+ dina man la pinanunot a padasen ti makipada koma iti Dios.+ 7 Saan, no di ket insukona ti amin nga adda kenkuana ken nagbalin a kas adipen+ ken tao.*+ 8 Maysa pay, idi immay a kas tao,* nagpakumbaba ken nagtulnog agingga iti ipapatayna,+ wen, ipapatay iti kayo a pagtutuokan.*+ 9 Gapu iti daytoy, intan-ok ti Dios iti nangatngato a posision+ ken sipaparabur nga inikkanna iti nagan a nangatngato ngem iti aniaman a sabali a nagan,+ 10 tapno iti nagan ni Jesus, agparintumeng koma ti tunggal tumeng​—dagiti adda idiay langit ken dagiti adda ditoy daga ken dagiti adda iti uneg ti daga+​— 11 ken iyebkas koma ti amin a bigbigenda a ni Jesu-Kristo ket Apo+ a pakaitan-okan ti Dios nga Ama.

12 Patpatgek a kakabsat, kas iti kanayon a panagtulnogyo idi addaak kadakayo, ken lalo ita ta awanak kadakayo, itultuloyyo nga ikagumaan nga itrabaho ti bukodyo a pannakaisalakan nga addaan iti buteng ken panagpigerger. 13 Ta ti Dios ti mangpabpabileg kadakayo, nga ipapaayna kadakayo ti tarigagay ken ti pannakabalin a mangaramid iti amin a banag a pakaragsakanna. 14 Itultuloyyo nga aramiden ti amin a banag a saankayo nga agtanabutob+ ken makiriri,+ 15 tapno awan koma ti pakababalawanyo ken nadaluskayo nga annak ti Dios,+ ket awan ti pakapilawanyo iti tengnga ti nakillo ken nakadakdakes a henerasion,+ a pagsilsilnaganyo kas silsilaw iti lubong,+ 16 ken kanayon a siiirut a petpetanyo ti sao ti biag.+ Iti kasta, adda rasonko nga agrag-o iti aldaw ni Kristo, ta ammok a saan a sayang ti panagtarayko ken panagtrabahok a naimbag. 17 Ngem maragsakanak ken makipagrag-oak kadakayo amin uray no kaslaak daton nga inumen a maibukbok+ iti rabaw ti daton+ babaen ti pannakitinnulongko iti nasantuan a panagserbi,* ta ti pammatiyo ti nangtignay kadakayo a mangaramid iti daytoy. 18 Masapul met nga agragsakkayo ken makipagrag-okayo kaniak.

19 No pagayatan ni Apo Jesus, maibaonko koma kadakayo ni Timoteo+ iti mabiit, tapno maparegtaak no adda madamagko maipapan kadakayo. 20 Ta awan ti sabali a maibaonko nga addaan iti kababalin a kas kenkuana a napaypayso a mangasikaso kadagiti pakaseknanyo. 21 Ta ti birbiroken ti dadduma ket dagiti bukodda a pagimbagan, saan a dagiti pagsayaatan ni Jesu-Kristo. 22 Ngem ammoyo a pinaneknekanna a maikari, a kas man la iti anak+ a kadua ni amana, isu ket kaduak a nagserbi iti pannakaisaknap ti naimbag a damag. 23 Gapuna, isu ti namnamaek nga ibaon apaman a maammuak ti mapasamak kaniak. 24 Kinapudnona, agtalekak a no pagayatan ti Apo, umayakto met kadakayo iti kabiitan a panawen.+

25 Ngem ita, masapul nga ibaonko pay laeng ni Epafrodito a kabsattayo, katrabahuak, padak a soldado, mensaheroyo, ken mangas-asikaso kadagiti kasapulak,+ 26 ta kailiwnakayo amin a makita ken malidliday unay gapu ta nadamagyo a nagsakit. 27 Agpayso a nagsakit a gistay natay; ngem kinaasian ti Dios. Kinapudnona, saan la a naasian kenkuana, naasian met kaniak tapno saan nga agsasaruno ti panagladingitko. 28 Isu nga apuradoak unay a mangibaon kenkuana tapno maragsakankayo manen inton makitayo ket maksayan met ti danagko. 29 Awatenyo ngarud isuna a kas iti nakayugalianyo a panangabrasa kadagiti adalan ti Apo, ken itultuloyyo nga ipateg dagiti kasta a kita ti tattao,+ 30 ta gistay natay para iti trabaho ni Kristo,* nga inrisgona ti biagna* tapno makapagserbi kaniak, a diyo maaramid gapu ta awankayo ditoy.+

3 Kamaudiananna, kakabsatko, itultuloyyo ti agrag-o gapu iti Apo.+ Diak mauma a mangisurat kadakayo iti isu met la a bambanag tapno maprotektarankayo.

2 Agannadkayo kadagiti aso; agannadkayo kadagiti agar-aramid iti dakes; agannadkayo kadagiti mangiparparegta iti panagkugit.*+ 3 Ta datayo ti pudpudno a nakugit,+ gapu ta mangipapaaytayo iti sagrado a panagserbi babaen ti espiritu ti Dios ken ipagpampannakkeltayo ni Kristo Jesus+ ken ditay ibatay ti panagtalektayo iti pagtaltalkan dagiti tattao, 4 nupay adda pangibatayak nga agtalek kadagita.

No adda sabali a tao a mangipagarup nga adda pangibatayanna nga agtalek kadagita, lallalo pay kaniak: 5 ta nakugitak iti maikawalo nga aldaw,+ nagtaudak iti nasion ti Israel, iti tribu ni Benjamin, maysaak a Hebreo a nayanak manipud kadagiti Hebreo;+ no maipapan iti linteg, maysaak a Fariseo;+ 6 no maipapan iti regta, indadanesko ti kongregasion;+ no maipapan iti kinalinteg a naibatay iti linteg, pinaneknekak nga awan ti pakababalawak. 7 Ngem dagiti nakapatpateg idi kaniak ket ibilangkon nga awan serserbina* gapu iti Kristo.+ 8 Ibilangko payen nga awan serserbi ti amin a banag gapu iti di maartapan a pateg ti pannakaammo maipapan ken Apo Jesu-Kristo. Maigapu kenkuana, tinallikudak ti amin a banag ken imbilangko dagita kas adu a basura tapno magun-odko ni Kristo 9 ken maikaykaysaak kenkuana, saan a gapu ta nalintegak ta sursurotek ti Linteg, no di ket nalintegak gapu iti pammatik+ ken Kristo,+ a dayta ti ibilang ti Dios a kinalinteg maibatay iti pammati.+ 10 Panggepko a maam-ammo isuna ken maawatak ti pannakabalin ti pannakapagungarna+ ken makipagsagabaak kenkuana,+ a situtulokak a matay a kas kenkuana,+ 11 tapno makitak, no posible, a mapagungarak a nasapsapa.+

12 Saan a gapu ta naawatkon dayta wenno napagbalinakon a perpekto, no di ket agporporsegiak+ tapno makitak no magun-odak met ti panggep a pinilinak* ni Kristo Jesus.+ 13 Kakabsat, saanko nga ibilang a nagun-odakon dayta; ngem daytoy ti sigurado: Liplipatek ti bambanag iti likudak+ ken ikagkagumaak a gun-oden ti bambanag iti sanguanak,+ 14 ar-aramidek ti amin a kabaelak tapno magun-odak ti gunggona+ a panangayab ti Dios kaniak idiay langit+ babaen ken Kristo Jesus. 15 Gapuna, daytoy a panagpampanunot ket maadda koma kadatayo a nataengan.+ Ngem no sabali ti panagpampanunotyo, isuronto ti Dios kadakayo ti umiso a panagpampanunot. 16 Ngem aniaman ti nagrang-ayantayon, itultuloytayo ti naurnos a panangsurot iti dayta iti isu met la a pamay-an.

17 Kakabsat, agkaykaysakayo a mangtulad kaniak,+ ken kitaenyo dagidiay mangsursurot iti ulidan nga impakitami kadakayo. 18 Ta adu dagiti manglalais iti ipapatay ti Kristo iti kayo a pagtutuokan.* Masansan idi a dakamatek ida, ngem ita, agsangsangitak a mangdakamat manen kadakuada. 19 Pannakadadael ti tungpalda. Ti tianda ti diosda, pagtangsitda ti bambanag a masapul nga ibainda koma, ken ti bambanag ditoy daga ti pampanunotenda.+ 20 Ngem makipagilitayo+ idiay langit,+ ken magagarantayo a mangur-uray iti mangisalakan nga aggapu sadiay a ni Apo Jesu-Kristo,+ 21 a mangbalbaliwto iti nakapuy a bagitayo tapno agbalin a kas* iti nadayag a bagina,+ ken mangusarto iti dakkel a pannakabalinna a mangituray iti amin a banag.+

4 Kabayatanna, patpatgek a kakabsat, dungdungnguek ken il-iliwek, dakayo a rag-ok ken koronak,+ agtakderkayo a sititibker+ kas iti imbagak idin kadakayo kas pasurot ti Apo.

2 Bagbagaak da Euodia ken Sintique nga agkapanunotanda koma kas pasurot ti Apo.+ 3 Wen, kiddawek met kenka, kas napudno a katrabahuan,* itultuloymo a tulongan dagitoy a babbai a nagregget* a timmulong kaniak iti pannakaisaknap ti naimbag a damag, agraman ni Clemente ken ti dadduma pay a katrabahuak, a dagiti naganda ket adda iti libro ti biag.+

4 Kanayon nga agragsakkayo gapu iti Apo. Ulitek, Agragsakkayo!+ 5 Maammuan koma ti amin a tattao a nainkalintegankayo.+ Asidegen ti Apo. 6 Dikay madanagan iti aniaman,+ no di ket ipakaammoyo koma iti Dios ti amin a kiddawyo babaen ti kararag ken panagpakaasi, agraman panagyaman;+ 7 ket ti talna+ ti Dios a mangartap iti amin a pannakaawat salaknibannanto ti puso+ ken isipyo* babaen ken Kristo Jesus.

8 Kamaudiananna kakabsat, aniaman a bambanag a pudno, aniaman a bambanag a napateg,* aniaman a bambanag a nalinteg, aniaman a bambanag a nadalus,* aniaman a bambanag a maay-ayat, aniaman a bambanag a nasayaat ti pakasarsaritaanda, aniaman a bambanag a naimbag, ken aniaman a bambanag a maidaydayaw, itultuloyyo nga utoben* dagitoy a banag.+ 9 Dagiti bambanag a naadalyo, inawatyo, nangngegyo, ken nakitayo kaniak, aramidenyo dagitoy+ ket addanto kadakayo ti Dios ti talna.

10 Nakaragragsakak met laengen iti Apo ta pampanunotenyo manen ita ti pagimbagak.+ Nupay maseknankayo idi kaniak, awan ti gundawayyo a nangipakita iti dayta. 11 Saanko nga ibagbaga daytoy gapu ta agkasapulanak, ta nasursurok ti agbalin a kontento* aniaman ti kasasaadko.+ 12 Ammok no kasano ti agbiag iti bassit+ ken iti adu. Nasursurok ti sekreto ti panagbalin a kontento iti amin a banag ken kasasaad, mabmabsogak man wenno mabisbisinak, aduanak man wenno agkurkurang ti kasapulak. 13 Ta adda pigsak a mangsango iti amin a banag gapu iti daydiay mangpabpabileg kaniak.+

14 Ngem nagsayaat ti inaramidyo a panangtulong kaniak kadagiti rigatko. 15 Kinapudnona, dakayo a taga-Filipos, ammoyo met a kalpasan a naammuanyo ti naimbag a damag ken idi pimmanawak idiay Macedonia, awan ti kongregasion a timmulong kaniak ken immawat iti tulongko no di laeng dakayo;+ 16 ta bayat nga addaak idi idiay Tesalonica, saan la a naminsan a pinatulodandak iti kasapulak no di ket namindua. 17 Saan a gapu ta kayatko laeng ti maregaluan, no di ket kayatko nga ad-adu pay a nasayaat nga aramid ti mainayon kadagiti ar-aramidenyo iti sanguanan ti Dios. 18 Ngem adda amin a kasapulak ken agsobsobra pay. Kompleton dagiti kasapulak, ita ta naawatkon dagiti impaw-ityo ken Epafrodito,+ a kas iti nabanglo+ ken makaay-ayo a daton nga awaten ti Dios. 19 Babaen ken Kristo Jesus, naan-anay nga itedto met ti Diosko ti amin a kasapulanyo+ sigun iti aglaplapusanan a kinabaknangna. 20 Maited koma iti Dios ken Amatayo ti dayag iti agnanayon nga awan inggana. Amen.

21 Idanonyo dagiti pakomustak iti tunggal nasantuan a naikaykaysa ken Kristo Jesus. Pakpakomustaandakayo dagiti kakabsat a kaduak ditoy. 22 Amin a nasantuan ngem nangnangruna dagidiay adda iti sangakabbalayan ni Cesar+ ti mangpakpakomusta kadakayo.

23 Adda koma kadakayo ti nagpaiduma a kinaimbag ni Apo Jesu-Kristo gapu iti nasayaat a kababalin nga ipakpakitayo.