SURAT KADAGITI TAGA-COLOSAS

1 Siak ni Pablo a maysa nga apostol ni Kristo Jesus babaen ti pagayatan ti Dios, ken kaduak ni Timoteo+ a kabsattayo. 2 Nagsuratak kadagiti nasantuan ken matalek a kakabsat a naikaykaysa ken Kristo dita Colosas:

Adda koma kadakayo ti nagpaiduma a kinaimbag ken talna manipud iti Dios nga Amatayo.

3 Kanayon nga agyamyamankami iti Dios nga Ama ni Jesu-Kristo nga Apotayo no ikararagandakayo, 4 ta nangngegmi ti pammatiyo ken Kristo Jesus ken ti ayatyo iti amin a nasantuan 5 gapu iti namnama nga agur-uray kadakayo idiay langit.+ Nangngegyo idin daytoy a namnama babaen ti mensahe ti kinapudno ti naimbag a damag 6 a naidanon kadakayo. No kasano nga agbungbunga ken agsaksaknap ti naimbag a damag iti intero a lubong,+ maar-aramid met dayta kadakayo manipud iti aldaw a nangngegyo ken naaddaankayo iti umiso a pannakaammo maipapan iti nagpaiduma a kinaimbag ti Dios a kas iti kinaagpayso dayta. 7 Dayta ti naammuanyo ken Epafras+ nga ay-ayatentayo ken padatayo nga adipen, a matalek a pannakabagimi nga agserserbi ken Kristo. 8 Impadamagna met kadakami ti ayatyo a maitunos iti espiritu ti Dios.

9 Isu a manipud idi nangngegmi dayta, saankami a pulos simmardeng a nangikarkararag kadakayo+ ken idawdawatmi a mapnokayo koma iti umiso a pannakaammo+ iti pagayatanna ken maaddaankayo iti pudno a sirib ken naespirituan a pannakaawat.+ 10 Iti kasta, makapagbiagkayo a makaay-ayo ken Jehova* tapno naan-anay a maparagsakyo bayat nga ar-aramidenyo ti tunggal nasayaat nga aramid ken umad-adu ti umiso a pannakaammoyo maipapan iti Dios;+ 11 ket ti nadayag a pannakabalinna+ ti mangted koma kadakayo iti amin a bileg a kasapulanyo tapno siraragsak ken siaanus a makapagibturkayo. 12 Agyamankayo iti Ama ta pinagbalinnakayo a kualipikado nga umawat iti tawid dagiti nasantuan+ nga adda iti lawag.

13 Insalakannatayo iti autoridad ti sipnget+ ken inyalisnatayo iti pagarian ti dungdungnguenna nga Anak, 14 a nangwayawaya kadatayo babaen ti subbot, kayatna a sawen, ti pannakapakawan dagiti basoltayo.+ 15 Isu ti ladawan ti di makita a Dios,+ ti inauna iti amin a parsua.+ 16 Ta babaen kenkuana, naparsua ti amin a dadduma pay a bambanag idiay langit ken ditoy daga, dagiti bambanag a makita ken saan a makita,+ trono man dagita wenno turay wenno gobierno wenno autoridad. Naparsua ti amin a dadduma pay a bambanag babaen kenkuana+ ken para kenkuana. 17 Isu ket adda metten sakbay ti amin a dadduma pay a bambanag,+ ken babaen kenkuana napaadda ti amin a dadduma pay a bambanag, 18 ket isu ti ulo ti bagi, kayatna a sawen, ti kongregasion.+ Isu ti pangrugian, ti inauna manipud kadagiti natay,+ iti kasta, isu daydiay umuna iti amin a bambanag; 19 ta naragsakan ti Dios nga isu ket agbalin a kompleto iti amin a banag,+ 20 ken maragsakan ti Dios a maikappia kenkuana ti amin a banag+ babaen ti darana+ a naibukbok iti kayo a pagtutuokan,* dagita man ket bambanag ditoy daga wenno bambanag idiay langit.

21 Kinaagpaysuanna, adayokayo idi iti Dios ken kabusornakayo ta dagiti laeng dakes nga aramid ti pampanunotenyo. 22 Ngem ita, inkappianakayon babaen ti ipapatay daydiay nangisakripisio iti pisikal a bagina, tapno makapagtakderkayo a nasantuan ken awanan iti pagkurangan ken awanan iti pakababalawan iti sanguananna,+ 23 no la ket ta agtalinaedkayo iti pammati,+ naipasdek iti pundasion+ ken natibker.+ Diyo ib-ibbatan ti namnama a naibatay iti daydiay naimbag a damag a nangngegyo ken naikaskasaba iti amin a parsua iti baba ti langit.+ Gapu iti daytoy a naimbag a damag, siak ni Pablo, nagbalinak a ministro.+

24 Maragragsakanak uray no agsagsagabaak gapu kadakayo,+ ket mariknak a masapul nga agtultuloy ti panagrigatko kas paset ti bagi ti Kristo ta pagimbaganto daytoy ti bagina,+ nga isu ti kongregasion.+ 25 Nagbalinak a ministro daytoy a kongregasion ta inikkannak ti Dios iti responsabilidad+ para iti pagimbaganyo tapno naan-anay a maikasabak ti sao ti Dios, 26 ti sagrado a palimed+ a nailimed kadagiti napalabas a sistema ti bambanag*+ ken kadagiti naglabas a henerasion. Ngem ita, naipalgak daytan kadagiti nasantuan a tattaona.+ 27 Naragsakan ti Dios a nangipakaammo kadakuada iti awan kapadana a kinabaknang daytoy a sagrado a palimed,+ a maipakpakaammo kadagiti nasion, nga isu ti Kristo a naikaykaysa kadakayo, kayatna a sawen, ti namnamayo a maipadayagkayo a kaduana.+ 28 Isu daydiay ipakpakaammomi. Bagbagaanmi ti amin a tattao ken isursuromi kadakuada ti pudno a sirib, tapno mayasidegmi iti Dios ti amin a tattao kas nataengan a naikaykaysa ken Kristo.+ 29 Gapu iti daytoy a panggep, talaga nga aggaggagetak ken ikagkagumaak ti agtrabaho, babaen ti pannakabalinna a mangpabpabileg kaniak.+

2 Kayatko a maawatanyo no kasano kadakkel ti rigatko maigapu kadakayo ken kadagidiay adda idiay Laodicea+ ken iti amin a saan a personal a nakakita kaniak.* 2 Iti kasta, maliwliwa koma ti pusoda+ ken agkaykaysada iti ayat+ tapno maaddaanda iti amin a kinabaknang a resulta ti nalawag ken sigurado a pannakaawatda agraman ti umiso a pannakaammo maipapan ken Kristo, ti sagrado a palimed ti Dios.+ 3 Amin nga agkakapateg a sirib ken pannakaammo ket naidulin a naimbag kenkuana.+ 4 Ibagbagak daytoy tapno awan koma ti mangallilaw kadakayo babaen kadagiti makaguyugoy nga argumento. 5 Nupay awanak dita a kaduayo, pampanunotenkayo.* Maragragsakanak a makaammo a naurnoskayo+ ken natibker ti pammatiyo ken Kristo.+

6 Gapu ta inakseptaryon ni Kristo Jesus nga Apo, itultuloyyo ngarud ti agbiag a naikaykaysa kenkuana. 7 Kas iti naisuro kadakayo, masapul a nairamut ken naibangonkayo kenkuana,+ ken masapul a natibker ti pammatiyo.+ Kanayon met nga agyamankayo.+

8 Agannadkayo tapno awan ti asinoman a mangsilo* kadakayo babaen ti pilosopia ken ulbod a panagrasrason+ a maitunos iti tradision ti tattao, ken iti pagdamdamuan a bambanag iti lubong ken saan a maitunos ken Kristo; 9 ta naan-anay nga adda kenkuana ti amin a kualidad ti Dios.+ 10 Kompletokayon iti amin babaen kenkuana, daydiay ulo ti amin a gobierno ken autoridad.+ 11 Babaen ti relasionyo kenkuana, nakugitkayo met iti pannakakugit a saan a tao ti nangaramid babaen ti panangiwaksiyo iti pagayatan ti managbasol a bagiyo.+ Dayta ti pannakakugit dagiti pasurot ti Kristo.+ 12 Ta naitabonkayo a kaduana iti pannakabautisarna,+ ken gapu iti relasionyo kenkuana, napagungarkayo met+ gapu iti pammatiyo iti milagro ti Dios a nangpagungar kenkuana.+

13 Kanayonanna, nupay nataykayo kadagiti basolyo ken iti di nakugit a kasasaadyo, pinagbiagnakayo ti Dios a naikaykaysa ken Kristo.+ Siaasi a pinakawanna ti amin a basoltayo+ 14 ken binurana* ti dokumento+ a buklen dagiti bilin+ ken naisurat a maikontra kadatayo.+ Inikkatna dayta babaen ti panangilansana iti kayo a pagtutuokan.*+ 15 Babaen iti dayta,* linabusanna dagiti gobierno ken autoridad ken impabuyana ida iti publiko,+ ket imparadana ida a pakakitaan a naparmekna ida.

16 Gapuna, diyo ipalubos nga adda mangukom kadakayo maipapan iti kanen ken inumenyo+ wenno selebraranyo a piesta wenno baro a bulan+ wenno sabbath.+ 17 Dagita a bambanag ket anniniwan ti bambanag nga umay,+ ngem ti agpaypayso ket ti Kristo.+ 18 Adda dagiti tattao nga agimpapakumbaba ken agdaydayaw kadagiti anghel, ngem diyo ipalubos a lapdanda ti pananggun-odyo iti gunggona.+ Ipappapilitda dagiti bambanag a nakitada.* Agtangtangsitda nga awan gapgapuna ta managbasol ti panagpampanunotda. 19 Saanda a sumursurot iti ulo,+ daydiay mangsupsuplay iti kasapulan ti intero a bagi ken mamagkokonektar a siuurnos kadagiti susuop ken pennet ken mangpadpadakkel babaen ti pannakabalin ti Dios.+

20 No nataykayo a naikaykaysa ken Kristo maipapan kadagiti pagdamdamuan a bambanag iti lubong,+ apay nga agbibiagkayo a kasla pasetnakayo pay laeng ti lubong babaen ti panangsurotyo kadagiti bilin:+ 21 “Diyo iggaman, wenno ramanan, wenno sagiden,” 22 a tumuktukoy iti bambanag a maawan inton maibusen, yantangay dagitoy ket bilin ken sursuro dagiti tattao?+ 23 Nupay kasla nainsiriban dagita, dagiti mangar-aramid kadagita pilpilienda ti bukodda a pamay-an ti panagdaydayaw. Parparigatenda ti bagida ta agimpapakumbabada.+ Ngem awan ti maitulong dagita iti pananglaban kadagiti tarigagay ti managbasol a bagida.

3 Ngem no napagbiagkayo a naikaykaysa iti Kristo,+ itultuloyyo a sapulen dagiti bambanag idiay ngato, a sadiay a nakatugaw ti Kristo iti makannawan ti Dios.+ 2 Isentroyo dagiti panunotyo kadagiti bambanag idiay ngato,+ saan a kadagiti bambanag ditoy daga.+ 3 Ta nataykayo, ket naidulin ti biagyo a naikaykaysa ken Kristo maitunos iti pagayatan ti Dios. 4 Inton maipalgak ti Kristo a biagtayo,+ kaduanakayo met a maipalgak iti pannakaipadayagna.+

5 Patayenyo ngarud dagiti paset ti bagiyo+ nga adda ditoy daga no maipapan iti seksual nga immoralidad,* kinarugit, saan a makontrol a kinarasuk iti sekso,+ makapasakit a tarigagay, ken kinaagum, a dayta ket idolatria. 6 Gapu kadagita, um-umay ti pungtot ti Dios. 7 Kasta met idi ti ar-aramidenyo* iti dati a kabibiagyo.*+ 8 Ngem masapul itan nga ikkatenyo kadakayo amin dagitoy a banag: pungtot, unget, kinadakes,+ nasakit a panagsasao,*+ ken naalas a sasao+ iti ngiwatyo. 9 Dikay agiinnulbod.+ Uksobenyo ti daan a personalidad*+ agraman dagiti aramidna, 10 ket ikawesyo ti baro a personalidad,+ a mapabpabaro babaen ti umiso a pannakaammo maitunos iti ladawan Daydiay nangparsua iti dayta.+ 11 Iti baro a personalidad, agpapada ti amin a Griego ken Judio, nakugit ken di nakugit, ganggannaet ken Escita,* adipen ken siwayawaya a tao; ngem ni Kristo ti isuamin ken adda iti isuamin.+

12 Yantangay pinilinakayo ti Dios,+ nasantuan ken maay-ayat, ikawesyo ti nadungngo a panagayat ken pannakipagrikna,+ kinaimbag, kinapakumbaba,*+ kinaalumamay,+ ken kinaanus.+ 13 Itultuloyyo ti agiinnanus ken situtulok nga agpipinnakawan+ uray no adda pangibatayan ti maysa nga agreklamo maibusor iti sabali.+ Kas iti situtulok a panangpakawan kadakayo ni Jehova,* kasta met ti aramidenyo.+ 14 Ngem malaksid kadagitoy amin a banag, ikawesyo ti ayat,+ ta dayta ket perpekto a singgalut ti panagkaykaysa.+

15 Ipalubosyo a ti talna ti Kristo ti agari kadagiti pusoyo,*+ ta naayabankayo tapno agkakappiakayo ken agbalinkayo a maymaysa a bagi. Kasta met nga ipakitayo a managyamankayo. 16 Bay-anyo a mapnokayo iti sao ti Kristo tapno agbalinkayo a masirib. Itultuloyyo ti agsisinnuro ken agpipinnaregta* babaen kadagiti salmo,+ panangidaydayaw iti Dios, naespirituan a kankanta a nakanta buyogen ti panagyaman,* ken naimpusuan a kantaanyo ni Jehova.*+ 17 Aniaman nga aramidenyo iti sao wenno aramid, aramidenyo ti amin iti nagan ni Apo Jesus, ket baeten kenkuana, agyamankayo iti Dios nga Ama.+

18 Assawa a babbai, agpasakupkayo kadagiti lallakayyo,+ kas iti rumbeng nga aramiden dagiti pasurot ti Apo. 19 Assawa a lallaki, itultuloyyo nga ayaten dagiti babbaketyo+ ken diyo ida pagungtan iti nakaro.*+ 20 Annak, agtulnogkayo kadagiti nagannakyo iti amin a banag,+ ta makaparagsak unay daytoy iti Apo. 21 Amma, diyo sursuronen* dagiti annakyo,+ tapno saanda a maupay. 22 Dakayo nga adipen, agtulnogkayo iti amin a banag kadagiti tattao* nga amoyo,+ saan laeng a no makitkitadakayo tapno maparagsakyo ti tattao,* no di ket naimpusuan ken nabuyogan iti panagbuteng ken Jehova.* 23 Aniaman ti ar-aramidenyo, aramidenyo dayta iti amin a kararua* para ken Jehova,*+ ket saan a para iti tattao, 24 ta ammoyo a mangtedto ni Jehova* iti tawid kas gunggonayo.+ Agpaadipenkayo iti Apo a ni Kristo. 25 Sigurado a madusanto daydiay agar-aramid iti dakes gapu iti inaramidna,+ ta saan a mangidumduma ti Dios.+

4 Dakayo nga amo, tratuenyo dagiti adipenyo iti nalinteg ken patas a pamay-an, ta ammoyo nga adda met Apoyo idiay langit.+

2 Itultuloyyo ti agkararag,+ agtalinaedkayo a siririing maipapan iti dayta, ken agbalinkayo a managyaman.+ 3 Kabayatanna, ikararagandakami met,+ tapno ikkannakami koma ti Dios iti gundaway a mangipakaammo iti sao ken iti sagrado a palimed maipapan iti Kristo, a dayta ti makagapu a nakabaludak,+ 4 ken tapno nalawag ti panangipakaammok iti dayta a kas iti rumbeng nga aramidek.

5 Itultuloyyo ti agbalin a masirib iti pannakikaduayo kadagiti saan a manamati, nga usarenyo ti tiempoyo iti kasayaatan a pamay-an.*+ 6 Kanayon koma a makaay-ayo ti sasaoyo, ken natemplaan iti asin,+ tapno ammoyo no kasano ti rumbeng a panangsungbatyo iti tunggal tao.+

7 Ibaganto kadakayo ni Tiquico,+ a dungdungnguek a kabsat ken matalek a ministro ken padak nga adipen iti Apo, ti amin a damag maipapan kaniak. 8 Ibaonko kadakayo tapno maammuanyo ti kasasaadmi ken maliwliwanakayo. 9 Kaduana ni Onesimo,+ a matalek ken dungdungnguek a kabsatko, a kalugaranyo; ipakaammodanto kadakayo ti amin a mapaspasamak ditoy.

10 Pakpakomustaannakayo ni Aristarco+ a padak a balud, ken ni Marcos+ a kasinsin ni Bernabe (isu daydiay imbilinko a sarabuenyo+ no umay kadakayo,) 11 ken ni Jesus a maaw-awagan Justo, a karaman kadagiti nakugit. Isuda laeng ti katrabahuak para iti Pagarian ti Dios, ken mangmangted kaniak iti kasta unay a liwliwa.* 12 Pakpakomustaannakayo ti kaduayo a ni Epafras,+ a maysa nga adipen ni Kristo Jesus. Kanayon a sipapasnek nga ikarkararagannakayo tapno agbalinkayo metten a nataengan ken agbalin a natibker ti panamatiyo iti amin a pagayatan ti Dios. 13 Paneknekak nga agbambannog unay para kadakayo ken kadagiti adda idiay Laodicea ken Hierapolis.

14 Pakpakomustaannakayo ni Lucas+ a dungdungnguen a doktor, ken kasta met ni Demas.+ 15 Idanonyo ti pakomustak kadagiti kakabsat idiay Laodicea ken ni Nimfa ken iti kongregasion nga adda iti balayna.+ 16 Ket inton naibasan kadakayo daytoy a surat, iyurnosyo a maibasa+ met iti kongregasion dagiti taga-Laodicea ken ibasayo met daydiay naggapu idiay Laodicea. 17 Ibagayo met ken ni Arquipo:+ “Aramidem ti amin a kabaelam a mangitungpal iti ministerio nga inawatmo iti Apo.”

18 Awatenyo ti pakomusta nga insurat daytoy kabsatyo a ni Pablo.+ Laglagipenyo a maysaak a balud.+ Adda koma kadakayo ti nagpaiduma a kinaimbag ti Dios.