UMUNA A SURAT KADAGITI TAGA-TESALONICA

1 Siak ni Pablo ket kaduak da Silvano*+ ken ni Timoteo.+ Nagsuratak iti kongregasion dagiti taga-Tesalonica a naikaykaysa iti Dios nga Ama ken iti Apo a ni Jesu-Kristo:

Adda koma kadakayo ti nagpaiduma a kinaimbag ken talna.

2 Kanayon nga agyamyamankami iti Dios no dakamatendakayo amin kadagiti kararagmi,+ 3 ta kanayon a malaglagipmi ti aramidyo a maigapu iti pammatiyo, ti naayat a panagbannogyo, ken ti panagibturyo gapu iti namnamayo+ ken Apotayo a Jesu-Kristo iti sanguanan ti Dios ken Amatayo. 4 Kakabsat nga ay-ayaten ti Dios, ammomi ti panangpilina kadakayo, 5 ta inkaskasabami ti naimbag a damag kadakayo, saan laeng a babaen ti sasao, no di ket babaen ti pannakabalin ken nasantuan nga espiritu ken nabileg a panamati. Ammoyo no ania a kita ti tattao ti nagbalinanmi kadakayo para iti pagimbaganyo. 6 Ket tinuladdakami+ ken ti Apo,+ gapu ta inawatyo ti sao ti Dios, buyogen ti rag-o manipud iti nasantuan nga espiritu, uray no nagadu ti rigat+ a naipasango kadakayo, 7 tapno agbalinkayo nga ulidan iti amin a manamati idiay Macedonia ken Acaya.

8 Kinapudnona, saanyo laeng nga inwaras ti sao ni Jehova* idiay Macedonia ken Acaya, no di ket nagdinamag pay iti amin a lugar ti pammatiyo iti Dios,+ isu nga awanen ti maibagami. 9 Ta kanayon nga ipadpadamagda daydi damo a panagkikitatayo ken no kasano a tinallikudanyo dagiti idoloyo+ tapno agserbikayon iti sibibiag ken pudno a Dios. 10 Ipadpadamagda pay ti panangur-urayyo iti aggapu idiay langit+ nga Anakna a pinagungarna, awan sabali no di ni Jesus, a mangisalakan kadatayo iti um-umayen a pungtot.+

2 Kakabsat, sigurado nga ammoyo a saan a sayang ti isasarungkarmi kadakayo.+ 2 Ta nupay nagsagabakami nga umuna ken namaltrato idiay Filipos+ kas iti ammoyo, pinaturednakami* ti Diostayo tapno maipakaammomi kadakayo ti naimbag a damag ti Dios+ iti laksid ti nagkaro nga ibubusor.* 3 Ta ti pammagbagami ket saan a naggapu iti kamali a kapanunotan wenno iti dakes a motibo wenno iti panangallilaw, 4 no di ket gapu ta pinilinakami ti Dios a pakaitalkan ti naimbag a damag. Isu nga agsaokami tapno maparagsakmi ti Dios, a mangsuksukimat iti pusomi, saan a dagiti tattao.+

5 Kinapudnona, ammoyo a saankami a pulos nangpaspasablog wenno naginsisingpet gapu kadagiti naagum a motibo.+ Ti Dios ti saksi! 6 Dimi met kiniddaw kadakayo wenno iti dadduma a tattao nga idaydayawdakami, nupay mabalin koma nga aggastokayo iti dakkel para kadakami kas apostol ni Kristo.+ 7 Imbes ketdi, nagbalinkami a naalumamay kadakayo, a kas iti nadungngo a panangasikaso* ti agtagtagibi nga ina kadagiti annakna. 8 Gapu iti nadungngo a panagayatmi kadakayo, determinadokami* a nangipaay kadakayo, saan laeng a ti naimbag a damag ti Dios, no di pay ket ti mismo a biagmi,*+ gapu ta ay-ayatendakayo unay.+

9 Kakabsat, sigurado a malaglagipyo ti bannog ken rigatmi. Nagtrabahokami iti rabii ken aldaw, tapno saankami nga agbalin a dakkel a paggastuan ti asinoman kadakayo+ idi inkasabami kadakayo ti naimbag a damag ti Dios. 10 Dakayo ken ti Dios ti saksi, a nagbalinkami a napudno ken nalinteg ken awan pakababalawanmi kadakayo a manamati. 11 Talaga nga ammoyo a kanayon a binagbagaan ken liniwliwa ken pinarparegtami ti tunggal maysa kadakayo,+ a kas iti aramiden ti maysa nga ama+ kadagiti annakna, 12 tapno agtultuloykayo nga agbiag a makaay-ayo iti Dios+ a mangay-ayab kadakayo iti Pagarian+ ken dayagna.+

13 Kinaagpaysuanna, dayta ti rason a kanayon met nga agyamyamankami iti Dios.+ Ngamin, idi inawatyo ti sao ti Dios a nangngegyo kadakami, inawatyo dayta no ania a talaga dayta, saan a kas sao ti tattao no di ket kas sao ti Dios, a tumultulong met kadakayo a manamati. 14 Ta tinuladyo, kakabsat, ti ulidan dagiti kongregasion ti Dios idiay Judea a naikaykaysa ken Kristo Jesus, gapu ta sinagabayo iti ima dagiti kailianyo+ dagiti isu met laeng a sagsagabaenda iti ima dagiti Judio, 15 a nangpapatay uray pay ken Apo Jesus+ ken kadagiti propeta ken nangidadanes kadakami.+ Saanda met a parparagsaken ti Dios, no di ket ar-aramidenda ti pagdaksan ti amin a tattao, 16 bayat a padpadasenda a lapdan ti panangasabami kadagiti tattao kadagiti nasion tapno maisalakanda koma.+ Gapu iti dayta, kanayon a papaaduenda ti basolda. Ngem dimteng met laengen ti pungtotna kadakuada.+

17 Ngem idi naisinakami* kadakayo, kakabsat, iti apagbiit la a tiempo, (iti personal, saan nga iti puso), inkagumaanmi unay a makitadakayo a personal* tapno mapennek ti iliwmi. 18 Isu a kayatmi idi ti umay kadakayo, wen, siak ni Pablo, saan la a naminsan a pinadasko no di ket namindua; ngem linapdan ni Satanas ti dalanmi. 19 Ta ania aya ti namnama wenno rag-omi wenno korona nga ipagpannakkelmi iti sanguanan ni Apotayo a Jesus iti kaaddana? Kinaagpaysuanna, saan kadi a dakayo?+ 20 Talaga a dakayo ti dayag ken rag-omi.

3 Idi saanmin a mauray ti damag maipapan kadakayo, napanunotmi a nasaysayaat nga agbatiak idiay Atenas.+ 2 Imbaonmi ni Timoteo+ a kabsattayo ken ministro ti Dios* iti naimbag a damag maipapan iti Kristo, tapno patibkeren* ken liwliwaennakayo ket bumileg ti pammatiyo. 3 Iti kasta, awan koma kadakayo ti kumapuy* gapu kadagitoy a rigat. Ta ammoyo a ditay maliklikan dagiti kasta a panagsagaba.*+ 4 Ta idi agkakaduatayo, kanayon nga impakpakaunami nga aglak-amtayo iti rigat. Ket kas iti ammoyon, kasta ti napasamak.+ 5 Isu nga idi awanen ti maurayko a damag, imbaonko ni Timoteo tapno ammuenna ti kinamatalekyo,+ amangan no nasulisognakayon ti Mannulisog+ ket awanen ti serserbi ti panagbannogmi.

6 Ngem kasangsangpet ita ni Timoteo a naggapu dita.+ Nagsayaat ti impadamagna maipapan iti kinamatalek ken ayatyo. Kanayondakami gayam a malaglagip ken mail-iliwkayo kadakami a kas met iti riknami kadakayo. 7 Isu nga uray agsagsagaba* ken agrigrigatkami, kakabsat, naliwliwakami gapu kadakayo ken iti kinamatalekyo.+ 8 Ta mapapigsakami* no natibker ti pammatiyo iti Apo. 9 Ta kasanomi a maipakita ti panagyamanmi iti Dios gapu iti kasta unay a ragsakmi maigapu kadakayo? 10 Aldaw ken rabii a sipapasnek nga agpakpakaasikami agingga iti kabaelanmi tapno makitadakayo a personal* ken mapunnuanmi ti pagkurangan ti pammatiyo.+

11 Sapay koma ta mangaramid a mismo ti Dios ken Amatayo ken ni Apo Jesus iti pamay-an a makaumaykami kadakayo. 12 Maysa pay, parang-ayennakayo koma ti Apo, wen, punnuennakayo koma iti ayat iti maysa ken maysa+ ken iti amin, kas iti ar-aramidenmi kadakayo. 13 Iti kasta, mapatibkerna ti pusoyo, ken mapagbalinnakayo nga awan pakababalawanna ken nasantuan iti sanguanan ti Dios+ ken Amatayo iti kaadda ni Apotayo a Jesus+ ken ti amin a nasantuan nga agserserbi kenkuana.

4 Kamaudiananna, kakabsat, agbibiagkayo iti pamay-an a makaparagsak iti Dios+ kas iti insuromi kadakayo. Ngem iti nagan ni Apo Jesus, kiddawen ken ipakaasimi kadakayo nga itultuloyyo ken ad-adda pay nga aramidenyo dayta. 2 Ta ammoyo dagiti instruksion* nga intedmi kadakayo babaen ken Apo Jesus.

3 Ta daytoy ti pagayatan ti Dios a masapul nga agbalinkayo a nasantuan+ ken adaywanyo ti seksual nga immoralidad.*+ 4 Masapul nga ammo ti tunggal maysa kadakayo a kontrolen ti mismo a bagina*+ tapno agbalinkayo a nasantuan+ ken nadayaw. 5 Diyo tultuladen dagiti nasion a di makaam-ammo iti Dios,+ a dida makontrol ti kinarasukda iti sekso ta saanda a mapmapnek.+ 6 Awan koma ti mangaramid iti di umiso ken manggundaway iti kapammatianna maipapan iti daytoy a banag. Ta mangyeg ni Jehova* iti pannusa kadagitoy amin a basol, kas iti impakpakauna ken nalawag nga impakdaarmi met kadakayo. 7 Ta inayabannatayo ti Dios nga agbalin a nasantuan, saan nga agbalin a narugit.+ 8 Isu a ti tao a di mangikankano iti daytoy ket saan a tao ti dina ikankano, no di ket ti Dios,+ a mangmangted kadakayo iti nasantuan nga espirituna.+

9 Ngem no maipapan iti nainkabsatan nga ayat,+ saanen a masapul a suratandakayo pay, ta sinursuruannakayo ti Dios nga agiinnayat.+ 10 Kinapudnona, kasta ti ar-aramidenyo iti amin a kakabsat iti intero a Macedonia. Ngem iparparegtami, kakabsat, nga itultuloyyo nga ad-adda pay nga aramiden dayta. 11 Ikagumaanyo ti agbiag a natalna+ ken asikasuenyo ti bukodyo nga aramid+ ken agtrabahokayo,+ kas iti imbilinmi kadakayo, 12 tapno makita dagiti di manamati a desente ti panagbiagyo+ ken saankayo nga agkurang iti aniaman.

13 Kanayonanna, kakabsat, dimi kayat nga agbalinkayo nga ignorante* maipapan kadagiti matmaturog ken patay,+ tapno saankayo nga agladingit a kas iti dadduma nga awanan namnama.+ 14 Ta no mamatitayo a ni Jesus ket natay ken napagungar,+ pagungarento met ti Dios dagidiay naturog ken patay tapno maikaykaysada ken Jesus.+ 15 Ta daytoy ti ibagami kadakayo maibatay iti sao ni Jehova,* a datayo a sibibiag bayat ti kaadda ti Apo ket ditayto pulos un-unaan dagidiay naturogen ken patay. 16 Ta bumabanto ti Apo manipud langit nga agbilbilin, iti timek ti arkanghel+ ken nakaiggem iti trumpeta ti Dios. Ti umunanto a mapagungar ket dagiti natay a naikaykaysa ken Kristo.+ 17 Kalpasanna, datayo a sibibiag pay laeng ket maipangatonto kadagiti ulep a kaduada+ tapno sabatentayo ti Apo iti ngato.+ Iti kasta, kanayon a kaduatayton ti Apo.+ 18 Isu nga itultuloyyo a liwliwaen ti maysa ken maysa kadagitoy a sasao.

5 Kakabsat, saanen a masapul a maisurat kadakayo ti maipapan kadagiti tiempo ken panawen. 2 Ta talaga nga ammoyon nga umay ti aldaw ni Jehova*+ iti eksakto a tiempo, kas iti mannanakaw iti rabii.+ 3 Inton ibagbagada: “Talna ken talged!” pagammuan ta dumtengto ti kellaat a pannakadadaelda,+ kas iti panagpasikal ti masikog, ket didanto pulos makalisi. 4 Ngem awankayo iti sipnget, kakabsat, isu a dikayto makigtot iti dayta nga aldaw a kas iti pannakabigla dagiti mannanakaw no aglawagen, 5 ta aminkayo ket annak ti lawag ken annak ti aldaw.+ Awantayo iti rabii wenno iti sipnget.+

6 Isu a saantay koma a maturog a kas iti ar-aramiden ti dadduma,+ no di ket agtalinaedtayo a siririing+ ken sipupuot.+ 7 Ta dagidiay maturog, maturogda iti rabii, ket dagidiay agbartek, nabartekda iti rabii.+ 8 Ngem datayo nga adda iti aldaw, agtalinaedtayo koma a sipupuot ket isuottayo ti proteksion ti barukong nga isu ti pammati ken ayat agraman ti namnama ti pannakaisalakan a kas helmet+ 9 ta saannatayo a pinili ti Dios tapno aglak-am iti pungtotna, no di ket tapno maisalakan+ babaen ken Apotayo a Jesu-Kristo. 10 Natay para kadatayo,+ tapno uray no siririingtayo wenno matmaturogtayo,* agbiagtayo koma a maikaykaysa kenkuana.+ 11 Gapuna, itultuloyyo ti agpipinnaregta* ken agpipinnabileg+ a kas iti agdama nga ar-aramidenyo.

12 Kiddawenmi kadakayo, kakabsat, nga ipakitayo ti respeto kadagidiay agbambannog para kadakayo ken mangidadaulo kadakayo iti panagserbi iti Apo ken mangbalbalakad kadakayo; 13 ken ipakitayo kadakuada ti naisangsangayan a konsiderasion ken ayat gapu iti trabahoda.+ Agbalinkayo a mannakikappia iti sabsabali.+ 14 Ngem balakadandakayo, kakabsat, a pakdaaranyo* dagiti nagulo,+ liwliwaenyo dagiti malidliday,* patibkerenyo dagiti nakapuy, agbalinkayo a naanus iti amin a tao.+ 15 Siguraduenyo nga awan kadakayo ti agibales iti dakes nga inaramid ti sabali,+ no di ket kanayon nga aramidenyo ti naimbag iti sabsabali ken iti amin.+

16 Kanayon nga agragsakkayo.+ 17 Itultuloyyo ti agkararag.+ 18 Agyamankayo gapu iti amin a banag.+ Daytoy ti pagayatan ti Dios kadakayo a pasurot ni Kristo Jesus. 19 Diyo iddepen ti apuy ti espiritu.+ 20 Diyo laisen dagiti padto.+ 21 Siguraduenyo ti amin a banag;+ kumpetkayo a siiirut iti nasayaat. 22 Adaywanyo ti tunggal kita ti kinadakes.+

23 Sapay koma ta ti Dios ti talna ket pagbalinennakayo a naan-anay a nasantuan iti panagserbiyo kenkuana. Ken sapay koma ta ti intero nga espiritu ken kararua* ken bagiyo ket agtalinaed a nasalun-at ken awan pakababalawanna iti kaadda ni Apotayo a Jesu-Kristo.+ 24 Matalek daydiay mangay-ayab kadakayo, ket sigurado nga aramidennanto dayta.

25 Kakabsat, itultuloydakami nga ikararagan.+

26 Kablaawanyo ti amin a kakabsat iti nasantuan nga agep.

27 Iti nagan ti Apo, ibilinko kadakayo nga ibasayo daytoy a surat iti amin a kakabsat.+

28 Adda koma kadakayo ti nagpaiduma a kinaimbag ni Apotayo a Jesu-Kristo.