MAIKADUA A SURAT KADAGITI TAGA-TESALONICA

1 Siak ni Pablo ket kaduak da Silvano* ken ni Timoteo.+ Nagsuratak iti kongregasion dagiti taga-Tesalonica a naikaykaysa iti Dios nga Amatayo ken iti Apo a ni Jesu-Kristo:

2 Adda koma kadakayo ti nagpaiduma a kinaimbag ken talna manipud iti Dios nga Ama ken iti Apo a ni Jesu-Kristo.

3 Kakabsat, kanayon nga obligadokami nga agyaman iti Dios para kadakayo. Maitutop daytoy ta bumilbileg iti kasta unay ti pammatiyo ken dumakdakkel ti ayat ti tunggal maysa kadakayo para iti amin.+ 4 Isu nga ipagpannakkeldakayo+ kadagiti kongregasion ti Dios gapu iti panagibtur ken pammatiyo iti amin a pannakaidadanes ken rigat a sagsagabaenyo.*+ 5 Pammaneknek daytoy a nalinteg ti panangukom ti Dios, isu a maikarikayo iti Pagarian ti Dios a dayta ti talaga a makagapu nga agsagsagabakayo.+

6 Nalinteg ti Dios isu a dusaennanto dagidiay mangparparigat kadakayo.+ 7 Ngem dakayo nga agsagsagaba iti rigat ket mabang-aranto a kaduami, inton maipalgak ni Apo Jesus+ manipud langit a kadua dagiti mannakabalin nga anghelna+ 8 iti gumilgil-ayab nga apuy, bayat a balsenna dagidiay saan a makaammo iti Dios ken dagidiay saan nga agtulnog iti naimbag a damag maipapan ken Apotayo a Jesus.+ 9 Dagitoy a mismo ket ukomento ti Apo. Dusaenna ida iti agnanayon a pannakadadael+ ket didanton makita ti nadayag a pigsana, 10 inton umay tapno maipadayag agraman dagiti nasantuan a kakaduana ken tapno iti dayta nga aldaw, isu ket itan-ok dagidiay addaan iti pammati kenkuana. Karamankayonto met kadakuada ta pinatiyo dagiti impakaammomi kadakayo.

11 Gapu iti dayta, kanayon nga ikarkararagandakayo, nga ibilangnakayo koma ti Diostayo a maikari iti panangayabna.+ Ket babaen ti pannakabalinna, naan-anay koma nga itungpalna ti amin a nasayaat a pakaragsakanna ken kompletuenna ti amin nga ar-aramidenyo gapu iti pammatiyo. 12 Iti kasta, ti nagan ni Apotayo a Jesus ket maipadayag kadakayo, ken maipadayagkayo a naikaykaysa kenkuana, maitunos iti nagpaiduma a kinaimbag ti Diostayo ken ni Apo Jesu-Kristo.

2 Ngem kakabsat, no maipapan iti kaadda ni Apotayo a Jesu-Kristo+ ken iti pannakaurnongtayo a sangsangkamaysa kenkuana,+ kiddawenmi 2 a saan koma a dagus a matikaw ti panunotyo no adda mangibaga a dimtengen ti aldaw ni Jehova.*+ Dikay madanagan uray no ibagada a ti mensahe ket naggapu iti Dios,*+ wenno ibasada kadakayo ti surat a kasla naggapu kadakami.

3 Awan koma ti mangallilaw* kadakayo iti aniaman a pamay-an, ta saanto nga umay dayta agingga a saan a dumteng nga umuna ti apostasia+ ket maipalgak ti tao ti kinakillo,+ ti anak ti pannakadadael.+ 4 Isu ket bumusbusor ken isaadna ti bagina a nangatngato ngem iti tunggal maawagan iti dios wenno banag a pagdaydayawan. Kas resultana, agtugaw iti templo ti Dios ket pagparparangenna iti publiko nga isu ket dios. 5 Saanyo aya a malagip nga idi agkakaduatayo, imbagbagak kadakayo dagitoy a banag?

6 Ket ammoyo itan no asino ti mangigawgawid, tapno isu ket maipalgak iti naikeddeng a tiempona. 7 Pudno, madaman nga agtigtignay daytoy a kinakillo,+ a maysa a misterio, ngem agtalinaed laeng a kasta agingga nga awanen daydiay mangigawgawid iti dayta. 8 Kalpasanna, talaga a maipalgakto daydiay nakillo, a dadaelento ni Apo Jesus babaen ti pannakabalin nga aggapu iti ngiwatna*+ ken pukawenna inton maipakaammo+ ti kaaddana. 9 Ngem gapuanan ni Satanas+ ti kaadda daydiay nakillo ket mangar-aramid iti adu a milagro, ulbod a pagilasinan, ken nakaskasdaaw a bambanag*+ 10 ken tunggal kita ti kinakillo tapno maallilaw+ dagidiay agturturong iti pannakadadael, kas pannusa kadakuada ta dida inayat ti kinapudno tapno maisalakanda koma. 11 Dayta ti makagapu nga ipalubos ti Dios a mayaw-awanda iti makaallilaw nga impluensia, tapno patienda ti kinaulbod.+ 12 Iti kasta, maukomda amin gapu ta dida namati iti kinapudno ngem nagragsakanda ti kinakillo.

13 Ngem kanayon nga obligadokami nga agyaman iti Dios gapu kadakayo, kakabsat nga ay-ayaten ni Jehova.* Ta manipud idi damo, pinilinakayo ti Dios+ tapno maisalakankayo. Pinagbalinnakayo a nasantuan+ babaen ti espirituna gapu ta adda pammatiyo iti kinapudno. 14 Inayabannakayo babaen ti naimbag a damag nga ipakpakaammomi, tapno magun-odanyo ti kinadayag ni Apotayo a Jesu-Kristo.+ 15 No kasta ngarud, kakabsat, agtakderkayo a sititibker+ ket itultuloyyo a suroten dagiti tradision a naisuro kadakayo,+ babaen man ti naisao a mensahe wenno babaen ti suratmi. 16 Kasta met, sapay koma ta ni Apotayo a Jesu-Kristo a mismo ken ti Dios nga Amatayo, a nangayat kadatayo+ ken nangted iti agnanayon a liwliwa ken nasayaat a namnama+ babaen ti nagpaiduma a kinaimbagna, 17 ti mangliwliwa kadagiti pusoyo ken mangpatibker* kadakayo tapno kanayon a nasayaat ti maaramid ken maisaoyo.

3 Kamaudiananna, kakabsat, itultuloydakami nga ikararagan,+ tapno agtultuloy koma ti napartak a panagsaknap ti sao ni Jehova*+ ken maipadayag a kas iti pannakaipadayagna kadakayo, 2 ken tapno maisalakankami koma kadagiti mangdangran ken dakes a tattao,+ ta saan nga amin a tattao ket addaan iti pammati.+ 3 Ngem matalek ti Apo, ket patibkerennakayto ken salaknibannakayto iti daydiay managdakdakes. 4 Maysa pay, gapu ta pasurotnatayo ti Apo, agtalekkami kadakayo. Ammomi a tungtungpalenyo ken itultuloyyo a tungpalen dagiti instruksionmi. 5 Sapay koma ta itultuloy ti Apo nga idalan a sibaballigi ti pusoyo tapno ayatenyo ti Dios+ ken agibturkayo+ para iti Kristo.

6 Kakabsat, iti nagan ni Apo Jesu-Kristo, mangtedkami kadagiti instruksion nga adaywanyo ti tunggal kabsat nga agbibiag a nagulo+ ken saan a mangsursurot iti tradision* nga inawatyo* kadakami.+ 7 Ta ammoyo a mismo no kasano ti masapul a panangtuladyo kadakami+ ta saankami a nagtignay a nagulo, 8 wenno saankami a nagkiddaw iti libre* a makan.+ Ngem nagtrabaho ken nagbannogkami iti aldaw ken rabii tapno saan nga aggasto iti dakkel ti asinoman kadakayo.+ 9 Saan a gapu ta awan ti kalinteganmi nga umawat,+ no di ket kayatmi ti agbalin nga ulidan tapno tuladendakami.+ 10 Kinapudnona, idi agkakaduatayo, kanayon nga imbilbilinmi kadakayo: “Saan a rumbeng a mangan ti asinoman a dina kayat ti agtrabaho.”+ 11 Ta nadamagmi nga adda kadakayo dagiti agbibiag a nagulo,+ a dida pulos agtrabtrabaho no di ket makibibiangda iti dida rumbeng a pakibiangan.+ 12 Iti nagan ni Apo Jesu-Kristo, ibilin ken ibalakadmi kadagita a tattao nga agtrabahoda a sitatalna ken kanenda ti mismo a nagbannoganda.+

13 Ngem dakayo, kakabsat, dikay sumuko nga agaramid iti naimbag. 14 Ngem no adda asinoman a saan nga agtulnog iti imbagami iti daytoy a surat, pagtalinaedenyo a namarkaan daytoy a tao ken isardengyo ti makilangen kenkuana,+ tapno agbain. 15 Ngem diyo ibilang kas kabusor, no di ket itultuloyyo a bagbagaan+ a kas kabsat.

16 Sapay koma ta ti Apo ti talna ket ikkannakayo iti talna iti amin a tiempo ken iti amin a kasasaad.+ Adda koma ti Apo kadakayo amin.

17 Awatenyo ti pakomusta nga insurat daytoy kabsatyo a ni Pablo.+ Kastoy ti panagsuratko iti amin a suratko.

18 Maadda koma kadakayo amin ti nagpaiduma a kinaimbag ni Apotayo a Jesu-Kristo.