SURAT NI SANTIAGO

1 Siak ni Santiago,+ adipen ti Dios ken ti Apo a ni Jesu-Kristo, nagsuratak iti 12 a tribu a naiwarawara:

Awatenyo ti kablaawko!

2 Kakabsatko, agragsakkayo no maipasangokayo iti nadumaduma a pakasuotan,+ 3 ta ammoyo a no aramidenyo daytoy, ti nasubok a pammatiyo pataudenna ti panagibtur.+ 4 Ngem bay-anyo nga itungpal ti panagibtur ti panggepna, tapno agbalinkayo a naan-anay ken awan pakababalawanna iti amin a banag, nga awan ti aniaman a pagkuranganyo.+

5 Isu a no agkurang iti sirib ti asinoman kadakayo, agtultuloy koma nga agdawat iti Dios,+ ta sipaparabur nga ikkanna ti amin ken saan a mangumsi,*+ ket maitedto dayta kenkuana.+ 6 Ngem agtultuloy koma nga agdawat buyogen ti pammati,+ a saan a pulos agduadua,+ ta ti agduadua ket kas iti dalluyon ti baybay nga idurduron ti angin ken mayallo-allon. 7 Kinapudnona, saan koma nga ekspektaren dayta a tao nga umawat iti aniaman manipud ken Jehova;* 8 ta saan a makapagdesision+ ken agbaliwbaliw ti amin a dalanna.

9 Ngem bay-am nga agragsak* ti napakumbaba a kabsat gapu iti pannakaitan-okna,+ 10 ken ti nabaknang gapu iti pannakaipababana,+ ta maawanto ti nabaknang a kas iti sabong iti tanap. 11 Ta no kasano a sumingising ti init a makasinit ti pudotna ken laylayenna ti mula, ket agregreg ti sabongna ken agpukaw ti napintas a langana, maawanto met ti nabaknang a tao bayat nga as-asikasuenna dagiti aramidna.+

12 Naragsak ti tao nga agtultuloy nga agibtur iti pakasuotan,+ ta no maaprobaran awatennanto ti korona ti biag,+ nga inkari ni Jehova* kadagidiay agtultuloy nga agayat Kenkuana.+ 13 No masubok ti maysa, saanna koma nga ibaga: “Subsubokennak ti Dios.” Ta saan a mabalin a masubok ti Dios iti dakes a bambanag, ken saanna met a suboken ti asinoman. 14 No di ket masubok ti tunggal maysa no maallukoy ken masulisog* iti bukodna a tarigagay.+ 15 Kalpasanna inton mayinawen ti tarigagay, mangyanak iti basol; sa inton naaramiden ti basol, mangyeg iti ipapatay.+

16 Dikay agpaallilaw, patpatgek a kakabsat. 17 Tunggal nasayaat ken perpekto a sagut ket naggapu iti ngato,+ manipud iti Ama dagiti lawag ti langit,+ a saan nga agbaliw a kas iti anniniwan.*+ 18 Pagayatanna a maaddatayo babaen ti sao ti kinapudno,+ tapno agbalintayo nga umuna a bungbunga dagiti parsuana.+

19 Ammuenyo daytoy, patpatgek a kakabsat: Masapul nga alisto a dumngeg ti tunggal maysa, nainayad nga agsao,+ nabannayat nga agpungtot,+ 20 ta ti pungtot ti tao ket saan a maitunos iti kinalinteg ti Dios.+ 21 Ikkatenyo ngarud ti amin a kinarugit ken tunggal pakakitaan iti kinadakes,*+ ken sipapakumbaba nga awatenyo ti pannakaimula kadakayo ti sao a makaisalakan kadakayo.*

22 Nupay kasta, agbalinkayo a managtungpal iti sao,+ imbes a managdengngeg laeng, nga al-allilawenyo ti bagiyo iti ulbod a panagrasrason. 23 Ta no ti asinoman ket managdengngeg iti sao ngem saan a managtungpal,+ kayariganna ti maysa a tao a kitkitaenna ti rupana* iti sarming. 24 Ta kitaenna ti bagina ngem inton pumanawen, dagus a malipatanna ti langana. 25 Ngem ti mangsukimat iti perpekto a linteg+ a mangiturong iti wayawaya ken agtultuloy iti dayta ket agbalin a managtungpal iti sao imbes a mananglilipat a managdengngeg; ket naragsakto iti aramidenna.+

26 No ipagarup ti asinoman a daydayawenna ti Dios* ngem saanna a medmedan* ti dilana,+ al-allilawenna ti pusona, ket awan serserbi ti panagdaydayawna. 27 Daytoy ti pamay-an ti panagdaydayaw* a nadalus ken awan rugitna iti panangmatmat ti Dios ken Amatayo: ti panangasikaso kadagiti agrigrigat+ nga ulila+ ken balo a babbai,+ ken ti panagtalinaed ti maysa nga awanan rugit iti lubong.+

2 Kakabsatko, apay nga adda pabpaboranyo+ bayat nga ipakpakitayo ti pammatiyo iti nadayag nga Apotayo a ni Jesu-Kristo? 2 Ta no adda tao a sumrek iti taripnongyo a nakasingsing iti balitok ken nakabado iti napintas, ngem adda met sumrek a napanglaw a narugit ti badona, 3 paboranyo kadi daydiay napintas ti badona sa ibagayo, “Agtugawka ditoy nasayaat a puesto,” ngem ibagayo iti daydiay napanglaw, “Agtakderka lattan,” wenno, “Agdalupisakka lattan”?+ 4 No kasta, saan kadi nga adda dagiti tattao nga idumdumayo iti nagbabaetanyo,+ ket saan kadi a nagbalinkayo nga ukom a dakes ti panagdesisionna?+

5 Dumngegkayo, patpatgek a kakabsat. Saan kadi a pinili ti Dios dagidiay ibilang ti lubong a napanglaw tapno agbalinda a nabaknang gapu iti pammatida+ ken tawidenda ti Pagarian, nga inkarina kadagidiay agayat kenkuana?+ 6 Ngem imbabainyo ti napanglaw a tao. Saan kadi a dagiti nabaknang ti nangirurumen+ ken nangipan kadakayo kadagiti korte? 7 Saan kadi a pinadpadakesda ti nasayaat a nagan nga ireprepresentaryo? 8 Ita, no tungpalenyo ti linteg ti ari sigun iti kasuratan, “Masapul nga ayatem ti kaarrubam a kas iti bagim,”+ naimbag ti ar-aramidenyo. 9 Ngem no itultuloyyo ti mangipakita iti paboritismo,+ agbasbasolkayo, ket sinentensiaannakayo* ti linteg kas nakabasol.+

10 No adda asinoman a mangtungpal iti intero a Linteg ngem sukirenna ti uray maysa a bilin, sinukirnan ti intero a Linteg.+ 11 Ta daydiay nangibaga, “Dika makikamalala,”+ kinunana met, “Dika pumatay.”+ Ita, no dika makikamalala ngem pumatayka, sinukirmon ti linteg. 12 Itultuloyyo ti agsao ken agtignay a kas kadagidiay maukomto maitunos iti linteg dagiti nawaya a tattao.*+ 13 Ta daydiay saan a mangngaasi maukomto nga awanan asi.+ Natantan-ok ti asi ngem ti panangukom.

14 Ania ti pagimbaganna, kakabsatko, no ibaga ti maysa nga adda pammatina ngem awanan met iti aramid?+ Maisalakan kadi gapu iti dayta a pammati?+ 15 No awan bado* ti asinoman a kabsat a lalaki wenno babai ken kurang ti taraonna iti maysa nga aldaw, 16 ngem ibaga ti maysa kadakayo, “Sapay koma ta nasayaat ti kasasaadyo; agpapudot ken agbussogkayo,” ngem saanyo met nga ited ti kasapulanda, ania koma ti pagimbagan dayta?+ 17 Kasta met ti pammati, natay no awan aramidna.+

18 Nupay kasta, no adda mangibaga: “Adda pammatim, ngem adda aramidko. Ipakitam kaniak ti pammatim nga awan aramidna, ket ipakitak kenka ti pammatik nga adda aramidna.” 19 Patiem kadi nga adda maymaysa a Dios? Naimbag dayta. Mamati ken agpigerger met uray dagiti demonio.+ 20 Ngem ammom kadi, O maag a tao, nga awan serserbi ti pammati nga awan aramidna? 21 Saan kadi a naideklara a nalinteg ni Abraham nga amatayo babaen ti aramidna idi indatonna ni Isaac nga anakna iti altar?+ 22 Makitam a napakuyogan ti pammatina iti aramid ken nagbalin a naan-anay ti pammatina gapu iti aramidna,+ 23 ket natungpal ti kuna ti kasuratan: “Namati ni Abraham ken Jehova,* ket naibilang kas nalinteg,”+ ken naawagan kas gayyem ni Jehova.*+

24 Matarusanyo a maideklara a nalinteg ti maysa a tao babaen kadagiti aramid, saan a babaen ti pammati laeng. 25 Iti kasta met laeng a pamay-an, saan kadi a naideklara met a nalinteg ni Rahab a balangkantis babaen kadagiti aramid, idi pinadagusna dagiti mensahero ken pinaruarna ida iti sabali a dalan?+ 26 Kinapudnona, no kasano a natay ti bagi nga awanan espiritu,*+ natay met ti pammati nga awanan aramid.+

3 Kakabsatko, masapul a saan nga adu kadakayo ti agbalin a mannursuro, ta ammoyo a nadagdagsento* ti pannakaukomtayo.+ 2 Ta mamin-adu a maitibkoltayo* amin.+ No adda asinoman a saan a maitibkol iti sao, perpekto dayta a tao, ta makontrolna ti intero a bagina. 3 No ikkantayo iti rienda ti ngiwat dagiti kabalio tapno agtulnogda kadatayo, maiturongtayo met ti intero a bagida. 4 Kitaenyo met dagiti barko: Uray no nagdadakkelda ken idurduron dagiti napigsa nga angin, maiturong dagita babaen ti nakabasbassit a timon iti kayat a pangiturongan ti tao a mangkonkontrol iti dayta.

5 Kasta met, ti dila ket bassit a paset ti bagi, ngem kabaelanna ti agpangas iti kasta unay. Kitaenyo no kasano nga uramen ti bassit nga apuy ti nalawa a kabakiran! 6 Ti dila ket maysa nga apuy.+ Iti amin a paset ti bagitayo, ti dila ti napno iti kinadakes, ta rugitanna ti intero a bagi+ ken uramenna ti intero a panagbiag,* a rubroban dayta ti Gehenna.* 7 Ta mapaamo ken napaamon ti tao ti tunggal kita ti atap nga animal ken billit ken reptilia* ken parsua iti baybay. 8 Ngem awan ti tao a makapaamo iti dila. Nasukir ken makadangran dayta, napno iti makapapatay a sabidong.+ 9 Us-usarentayo dayta a mangidaydayaw ken Jehova,* ti Ama, ngem us-usarentayo met a mangilunod kadagiti tattao a naparsua a “kaladladawan ti Dios.”+ 10 Rummuar ti bendision ken lunod iti isu met laeng a ngiwat.

Kakabsatko, saan nga umiso daytoy a mapaspasamak.+ 11 Mangpataud kadi ti ubbog iti nasam-it ken napait a danum? 12 Kakabsatko, agbunga kadi ti kayo a higos iti olibo, wenno agbunga kadi ti puon ti ubas iti higos?+ Uray ti naapgad a danum saan met a makapataud iti nasam-it a danum.

13 Asino ti masirib ken mannakaawat kadakayo? Ipakitana koma babaen ti nasayaat a kababalinna dagiti aramid a napakuyogan iti kinaalumamay a resulta ti sirib. 14 Ngem no adda iti pusoyo ti nakaro nga imon+ ken pannakiriri,*+ dikay agpangas+ ken agulbod maibusor iti kinapudno. 15 Saan a daytoy ti sirib manipud ngato, no di ket nailubongan,+ inaanimal, dinedemonio. 16 Ta ti imon ken panagririri* ket mangpataud iti gulo ken tunggal dakes a banag.+

17 Ngem ti sirib manipud ngato ket umuna iti amin, nadalus,+ kalpasanna, mannakikappia,+ nainkalintegan,+ nakasagana nga agtulnog, napno iti asi ken nasayaat nga ar-aramid,+ awan pabpaboranna,+ saan nga agpampammarang.+ 18 Kanayonanna, maimula ti bunga ti kinalinteg iti natalna a kasasaad+ para* kadagiti makikapkappia.+

4 Nagtaudan ti panaggugubat ken panagaapayo? Saan aya a nagtaudda kadagiti tarigagay ti lasagyo a mangkontra kadagiti naimbag a tarigagay iti unegyo?*+ 2 Tarigagayanyo ti maysa a banag ngem saanyo a maala. Itultuloyyo ti pumatay ken agagum, ngem awan ti magun-odyo. Itultuloyyo ti agaapa ken aggugubat.+ Awanankayo ta saankayo a dumawdawat. 3 Uray no dumawatkayo, awan ti maited kadakayo ta dakes ti panggepyo nga agdawat, ta usarenyo dayta kadagiti tarigagay ti lasagyo.

4 Dakayo a mannakikamalala,* diyo aya ammo a ti pannakigayyem iti lubong ket pannakibusor iti Dios? Asinoman ngarud a kayatna ti makigayyem iti lubong pagbalbalinenna ti bagina a kabusor ti Dios.+ 5 Wenno ipagarupyo kadi nga awan gapgapuna a kinuna ti kasuratan: “Gapu iti tendensia nga umapal, adda ugalitayo nga agtarigagay iti nadumaduma a banag”?+ 6 Nupay kasta, nabilbileg ti intedna a nagpaiduma a kinaimbag. Isu a kinuna ti kasuratan: “Busoren ti Dios dagidiay natangsit,+ ngem ikkanna iti nagpaiduma a kinaimbag dagidiay napakumbaba.”+

7 Gapuna, agpasakupkayo iti Dios;+ ngem busorenyo ti Diablo,+ ket panawannakayto.+ 8 Umasidegkayo iti Dios, ket umasidegto kadakayo.+ Dalusanyo ti imayo, dakayo a managbasol,+ ken ti pusoyo,+ dakayo a di makapagdesision. 9 Agladingit ken agleddaang ken agsangitkayo.+ Agbalin koma a panagleddaang ti panagkatawayo, ken panagliday ti panagragsakyo. 10 Agpakumbabakayo iti imatang ni Jehova,*+ ket itan-oknakayto.+

11 Isardengyo ti agsao maikontra iti maysa ken maysa, kakabsat.+ Asinoman nga agsao maikontra iti maysa a kabsat wenno mangukom iti kabsatna ket agsasao maikontra iti linteg ken uk-ukomenna ti linteg. No ngarud ukomem ti linteg, dimo tungtungpalen ti linteg no di ket maysaka nga ukom. 12 Maymaysa ti nangted iti linteg ken Ukom,+ daydiay makabael a mangisalakan ken mangdadael.+ Ngem sika, asinoka a mangukom iti kaarrubam?+

13 Umaykayo, dakayo a mangibagbaga: “Mapankami ita wenno inton bigat iti daydiay a siudad sa agyankami sadiay iti makatawen, ket agnegosiokaminto ken agganansiakami,”+ 14 idinto ta diyo ammo no ania ti biagyo inton bigat.+ Ta maysakayo nga angep nga agparang iti apagbiit sa agpukaw.+ 15 Imbes ketdi, ibagayo koma: “No pagayatan ni Jehova,*+ agbiagkami ket aramidenmi daytoy wenno dayta.” 16 Ngem ipannakkelyo ti nalabes a kinapangasyo. Naan-anay a dakes ti kasta a panagpangas. 17 Gapuna, no ammo ti maysa ti agaramid iti umiso ngem saanna nga aramiden, isu ket agbasbasol.+

5 Dumngegkayo ita, dakayo a nabaknang, sangitan ken anug-oganyo dagiti rigat a mapasaranyonto.+ 2 Narunoten ti kinabaknangyo, ken kinnanen ti insekto dagiti badoyo.+ 3 Naglatin ti balitok ken pirakyo, ket ti latida ti agserbinto a pammaneknek maibusor kadakayo ken ibusendanto ti lasagyo. Kaslanto iti apuy dagiti naurnongyo iti maudi nga al-aldaw.+ 4 Agsangsangit dagiti trabahador a nagani kadagiti talonyo ta saanyo a tinangdanan ida, ket nangngeg ni Jehova* a panguluen dagiti armada ti panagpatulong dagiti paraani.+ 5 Nanam-ay ti panagbiagyo ken puro ragragsak ti inaramidyo ditoy daga. Pinalukmegyo ti pusoyo para iti aldaw ti panagparti.+ 6 Sinentensiaanyo, pinapatayyo daydiay nalinteg. Saan kadi a busbusorennakayo?

7 Agan-anuskayo koma, kakabsat, agingga iti kaadda ti Apo.+ Ur-urayen ti mannalon ti napateg a bunga ti daga, nga agan-anus agingga nga umay ti nasapa a tudo ken ti naladaw a tudo.+ 8 Agan-anuskayo met;+ patibkerenyo ti pusoyo, ta asidegen ti kaadda ti Apo.+

9 Dikay agtanabutob* iti maysa ken maysa, kakabsat, tapno saankay a maukom.+ Nakatakder ti Ukom iti sanguanan dagiti ridaw. 10 Kakabsat, tuladenyo dagiti propeta a nagsao iti nagan ni Jehova,*+ a nagsagaba iti dakes+ ken nagan-anusda.+ 11 Ibilangtayo a naragsak* dagidiay nakapagibtur.+ Nadamagyo ti panagibtur ni Job+ ken nakitayo ti resulta nga impaay ni Jehova,*+ a ni Jehova* ket nadungngo unay* ken naasi.+

12 Kangrunaanna, kakabsatko, isardengyo ti agsapata, babaen man ti langit wenno daga wenno sabali pay a kari. No di ket ti koma ibagayo a “Wen” ket wen, ken ti “Saan” ket saan,+ tapno saankayto a maukom.

13 Adda kadi agrigrigat kadakayo? Agtultuloy koma nga agkararag.+ Adda kadi maragragsakan? Agkanta koma kadagiti salmo.+ 14 Adda kadi masakit kadakayo? Ayabanna koma dagiti panglakayen+ iti kongregasion, ket ikararaganda, a sapsapuanda iti lana+ iti nagan ni Jehova.* 15 Ket ti kararag a nabuyogan iti pammati paimbagennanto ti masakit,* ket ibangonto ni Jehova.* Kasta met, no nakabasol, mapakawanto.

16 Gapuna, ipudnoyo dagiti basolyo+ iti maysa ken maysa ket ikararaganyo ti maysa ken maysa, tapno umimbagkayo. Ti panagpakaasi ti nalinteg a tao ket nabileg ti epektona.*+ 17 Addaan ni Elias iti rikna a kas kadatayo, ngem idi sipapasnek nga inkararagna a saan nga agtudo, saan a nagtudo iti daga iti tallo a tawen ken innem a bulan.+ 18 Idi nagkararag manen, nagtudo ti langit ket nangted iti bunga ti daga.+

19 Kakabsatko, no adda kadakayo ti nayadayo iti kinapudno ket pasublien ti sabali, 20 ammona a daydiay tumulong iti managbasol nga agbabawi iti kamalina+ ket isalsalakanna* iti ipapatay, ken tultulonganna a mapakawan iti adu a basolna.+