UMUNA A SURAT NI PEDRO

1 Siak ni Pedro, apostol+ ni Jesu-Kristo, nagsuratak kadagiti temporario a residente a naiwarawara iti Ponto, Galacia, Capadocia,+ Asia, ken Bitinia, kadagiti napili 2 sigun iti nasaksakbay a pannakaammo ti Dios nga Ama,+ a nangted iti espiritu tapno agbalinkayo a nasantuan,+ tapno agtulnogkayo ken madalusankayo babaen ti dara ni Jesu-Kristo:+

Nayonan koma kadakayo ti Dios ti nagpaiduma a kinaimbagna ken talna.

3 Maidaydayaw koma ti Dios ken Ama ni Jesu-Kristo nga Apotayo, ta gapu iti dakkel nga asina, nayanaktayo manen+ tapno maaddaantayo iti sibibiag a namnama+ babaen ti panagungar ni Jesu-Kristo,+ 4 nga agturong iti di agrupsa ken di narugitan ken di agkupas a tawid.+ Naisagana dayta idiay langit para kadakayo,+ 5 a salsalakniban ti pannakabalin ti Dios babaen ti pammatiyo iti pannakaisalakan a nakasagana a maipalgak iti maudi a tiempo. 6 Daytoy ti makagapu a naragsakkayo unay, nupay kasapulan nga agsagabakayo iti nagduduma a pakasuotan iti apagbiit,+ 7 tapno ti nasubok a pammatiyo,+ a napatpateg ngem iti balitok a madadael uray no nasubok* iti apuy, ket pakaigapuan ti dayaw ken dayag inton maipalgak ni Jesu-Kristo.+ 8 Inayatyo ti Kristo nupay saanyo a pulos nakita. Nupay saanyo a makita ita, impakitayo ti pammatiyo kenkuana ken nakaragragsakkayo, nga uray la saan a mailadawan ti rag-oyo, 9 ta ammoyo a maisalakankayo* gapu iti pammatiyo.+

10 Maipapan iti daytoy a pannakaisalakan, dagiti propeta a nagipadto iti nagpaiduma a kinaimbag para kadakayo ket napinget a nagdamdamag ken nagsukimat a naimbag.+ 11 Intultuloyda nga inadal no ania a tiempo wenno panawen ti tuktukoyen ti espiritu iti unegda maipapan ken Kristo+ ta nasakbay nga impakaammona dagiti panagsagaba ni Kristo+ ken ti nadayag a banag a sumaruno. 12 Naipalgak kadakuada nga agserserbida, saan nga iti bagida, no di ket kadakayo, mainaig iti imbagan kadakayo dagidiay nangipakaammo iti naimbag a damag babaen ti nasantuan nga espiritu a naibaon manipud langit.+ Tarigagayan unay a tarusan dagiti anghel dagitoy a banag.

13 Gapuna, isaganayo ti panunotyo para iti trabaho;+ usarenyo ti abilidadyo nga agpanunot;+ ipamaysayo ti namnamayo iti nagpaiduma a kinaimbag a maitedto kadakayo inton maipalgak ni Jesu-Kristo. 14 Kas natulnog nga annak, isardengyon ti agpaimpluensia* kadagiti dati a tarigagayyo idi ignorantekayo pay, 15 no di ket agbalinkayo a nasantuan iti amin a kababalinyo, kas iti Daydiay Nasantuan a nangayab kadakayo,+ 16 ta naisurat: “Masapul nga agbalinkayo a nasantuan, ta nasantuanak.”+

17 Ken no umawagkayo iti Ama a mangukom nga awan idumdumana+ sigun iti aramid ti tunggal maysa, agbutengkayo kenkuana+ bayat ti temporario a panagnaedyo ditoy lubong. 18 Ta ammoyo a saan a babaen ti madadael a bambanag a kas iti pirak wenno balitok a nawayawayaankayo*+ iti awan mamaayna a wagas ti panagbiagyo nga impatawid dagidi ammayo,* 19 no di ket babaen ti napateg a dara+ ni Kristo,+ kas iti dara ti kordero a nadalus ken awan depektona.+ 20 Pudno, isu ket napili babaen ti nasakbay a panangammo ti Dios sakbay ti panangrugi ti sangatauan,+ ngem maiparangarang iti maudi a tiempo maigapu kadakayo.+ 21 Babaen kenkuana, mamatikayo iti Dios+ a nangpagungar kenkuana+ ken nangted kenkuana iti dayag,+ tapno mamati ken agtalekkayo iti Dios.

22 Ita ta dinalusanyon ti bagiyo* babaen ti panagtulnogyo iti kinapudno a nagresulta iti saan a pammarang a nainkabsatan nga ayat,+ sipapasnek ken naimpusuan nga agiinnayatkayo.+ 23 Ta babaen ti sao ti sibibiag ken agnanayon a Dios,+ nayanakkayo manen+ saan a babaen ti agrupsa a bin-i, no di ket ti di agrupsa a bin-i.*+ 24 Ta “amin a lasag* ket kas iti ruot, ken ti amin a dayagna ket kas iti sabong iti tanap; malaylay ti ruot, ken agregreg ti sabong, 25 ngem agtalinaed iti agnanayon ti sasao ni Jehova.”*+ Daytoy a “sasao” ket isu ti naimbag a damag a naipakaammo kadakayo.+

2 Gapuna, ikkatenyo iti bagiyo ti amin a kinadakes+ ken panangallilaw ken panagpammarang ken apal ken amin a panangpadpadakes. 2 Kas kayyanak a maladaga,+ tarigagayanyo koma ti puro* a gatas a linaon ti sao ti Dios, tapno agmataengan ken maisalakankayo babaen dayta,+ 3 ta napadasanyon* ti asi ti Apo.

4 Gapu ta immasidegkayo kenkuana, ti sibibiag a bato a linaksid dagiti tattao+ ngem pinili ken napateg iti Dios,+ 5 dakayo kas sibibiag a batbato ket maibangbangon kas naespirituan a balay+ tapno agbalinkayo a nasantuan a papadi, iti kasta, maipaayyo dagiti naespirituan a daton+ a makaay-ayo iti Dios babaen ken Jesu-Kristo.+ 6 Ta kuna ti Kasuratan: “Mangisaadak idiay Sion iti napili a bato, napateg a pundasion ken bato a pasuli, ket saanto a mapaay* ti asinoman a mamati iti dayta.”+

7 Gapuna, isu ket napateg kadakayo, ta namatikayo kenkuana; ngem kadagidiay saan a mamati, “ti bato nga imbelleng dagiti agibangbangon+ ket nagbalin a kangrunaan a bato a pasuli”*+ 8 ken “bato a pakaitibkolan ken dakkel a bato a pakabasolan.”+ Maitibkolda ta suksukirenda ti sao. Daytoyto ti pagtungpalanda. 9 Ngem dakayo ket “napili nga ili, papadi nga ari, nasantuan a nasion,+ ili nga agbalin nga espesial a sanikua,+ tapno maipakaammoyo iti tunggal lugar dagiti naisangsangayan a kualidad”*+ ti Dios a nangayab kadakayo manipud iti sipnget nga agturong iti nakaskasdaaw a lawagna.+ 10 Ta saankayo idi nga ili, ngem dakayo ket ili ti Dios itan;+ awan idi ti naasian kadakayo, ngem itan naipaayankayo iti asi.+

11 Patpatgek a kakabsat, paregtaenkayo kas ganggannaet ken temporario a residente+ nga itultuloyyo a liklikan dagiti tarigagay ti lasag,+ a bumusbusor kadakayo.*+ 12 Pagtalinaedenyo ti nasayaat a kababalinyo iti tengnga dagiti nasion,+ tapno no akusarandakayo nga agar-aramid iti dakes, mabalin a makitada dagiti nasayaat nga aramidyo+ ket idaydayawda ti Dios iti aldaw a panagsukimatna.

13 Maigapu iti Apo, agpasakupkayo iti tunggal tao,*+ iti man ari+ a nangatngato ngem kadakayo 14 wenno kadagiti gobernador, a dinutokan ti ari a mangdusa kadagiti dakes a tattao ngem mangpadayaw kadagiti agaramid iti naimbag.+ 15 Ta pagayatan ti Dios nga aramidenyo ti naimbag tapno mapagulimekyo* ti minamaag a panagsasao dagiti di nainkalintegan a tattao.+ 16 Agbiagkayo kas nawaya a tattao,+ nga usarenyo ti wayawayayo, saan a kas pangabbong* iti dakes nga aramid,+ no di ket kas adipen ti Dios.+ 17 Raemenyo amin a kita ti tattao,+ ayatenyo ti amin a kakabsatyo,*+ agbutengkayo iti Dios,+ raemenyo ti ari.+

18 Agpasakup koma dagiti adipen kadagiti amoda buyogen ti naan-anay a panagraem,+ saan laeng a kadagiti naimbag ken nainkalintegan no di ket uray kadagiti narigat nga ay-aywen. 19 Ta makaay-ayo iti Dios no ibturan ti maysa a tao ti rigat* ken agsagaba iti di kinahustisia gapu iti nadalus a konsiensiana iti imatang ti Dios.+ 20 Ta ania ti pagimbaganna no ibturanyo ti pannakakabkabilyo gapu ta nagbasolkayo?+ Ngem no ibturanyo ti panagsagabayo gapu ta inaramidyo ti naimbag, makaay-ayo dayta iti Dios.+

21 Kinapudnona, daytoy ti makagapu a naayabankayo, ta nagsagaba a mismo ni Kristo para kadakayo,+ a nangibati iti ulidan tapno surotenyo a naimbag dagiti addangna.+ 22 Saan a nagbasol,+ ken awan met ti imbagana a panangallilaw.+ 23 Idi nain-insulto,*+ saanna a sinubadan iti insulto.*+ Idi agsagsagaba,+ saan a nagipangta, no di ket intalekna ti bagina iti Daydiay mangukom+ a sililinteg. 24 Inawitna a mismo dagiti basoltayo+ babaen ti ipapatayna iti poste,*+ tapno mataytayo* iti basol ngem agbiagtayo iti kinalinteg. Ken “napaimbagkayo babaen kadagiti sugatna.”+ 25 Ta kaslakayo idi karnero a nayaw-awan,+ ngem nakasublikayo itan iti pastor+ ken manangaywan iti kararuayo.*

3 Kasta met, dakayo nga assawa a babbai, agpasakupkayo kadagiti assawayo,+ tapno no adda dagidiay saan a natulnog iti sao, maallukoyda babaen ti kababalinyo uray dikay agsao,+ 2 ta makitada ti nasayaat a kababalinyo+ agraman ti nauneg a panagraemyo. 3 Ti koma arkosyo ket saan a ti makinruar​—ti panagsallapid iti buok ken ti panagusar kadagiti balitok nga arkos+ wenno ti napintas a bado—​ 4 no di ket ti makin-uneg a kinatao ti puso, ti di madadael nga arkos, kayatna a sawen, ti naulimek ken naalumamay nga espiritu,+ a nakapatpateg iti imatang ti Dios. 5 Ta kastoy ti panagarkos dagiti nasantuan a babbai idi un-unana a nangnamnama iti Dios, a nagpasakupda kadagiti assawada, 6 kas iti panagtulnog ni Sara ken ni Abraham, nga inawaganna iti apo.+ Maibilangkayo a kas annakna no itultuloyyo nga aramiden ti naimbag ken dikay agbuteng.+

7 Kasta met, dakayo nga assawa a lallaki, itultuloyyo ti makipagnaed kadakuada maitunos iti pannakaammo.* Padayawanyo+ dagiti babbai ta nakapkapuyda a kas iti narasi a pagkargaan, ken makipagtawidda met kadakayo+ iti nagpaiduma a sagut a biag, tapno saan a malapdan dagiti kararagyo.

8 Kamaudiananna, addaankayo koma amin iti nagkaykaysa a panunot,*+ simpatia, nainkabsatan nga ayat, nadungngo a pannakipagrikna,+ ken kinapakumbaba.+ 9 Diyo subadan ti panangdangran iti panangdangran+ wenno insulto iti insulto.+ Imbes ketdi, subadanyo iti bendision,+ ta naayabankayo a mangaramid iti dayta, tapno umawatkayo iti bendision.

10 Ta “asinoman a mangayat iti biag ken makakita iti naimbag nga al-aldaw masapul a medmedanna ti dilana nga agsao iti dakes+ ken ti bibigna a mangallilaw. 11 Adaywanna koma ti dakes+ ket agaramid iti naimbag;+ sapulenna koma ti kappia ken surotenna dayta.+ 12 Ta nakaturong dagiti mata ni Jehova* kadagiti nalinteg, ken denggen dagiti lapayagna ti panagpakaasida,+ ngem busoren ti rupa ni Jehova* dagidiay agar-aramid iti dakes.”+

13 Kinapudnona, asino ti mangdangran kadakayo no naregtakayo nga agaramid iti naimbag?+ 14 Ngem uray no agsagabakayo maigapu iti kinalinteg, naragsakkayo.+ Nupay kasta, diyo pagbutngan ti pagbutbutnganda,* dikay met madanagan.+ 15 Bigbigenyo ketdi iti pusoyo a ti Kristo ket nasantuan ken Apo, a kanayon a nakasaganakayo a mangidepensa iti asinoman nga agdamag kadakayo maipapan iti namnamayo, ngem aramidenyo dayta buyogen ti kinaalumamay+ ken nauneg a panagraem.+

16 Taginayonenyo ti nasayaat a konsiensia,+ tapno uray ania ti ibaga dagiti tattao maibusor kadakayo, mabainanda+ gapu iti nasayaat a kababalinyo kas pasurot ni Kristo.+ 17 Ta nasaysayaat nga agsagabakayo gapu ta agar-aramidkayo iti naimbag,+ no pagayatan ti Dios nga ipalubos dayta, ngem iti agar-aramidkayo iti dakes.+ 18 Ta naminsan laeng a natay ni Kristo gapu kadagiti basol,+ maysa a nalinteg a tao para kadagiti nakillo,+ tapno maiturongnakayo iti Dios.+ Napapatay iti lasag+ ngem napagbiag iti espiritu.+ 19 Iti kastoy a kasasaad, napan ken nangasaba kadagiti espiritu a nakabalud,+ 20 a nagsukir idi kaaldawan ni Noe.+ Siaanus a nagur-uray ti Dios,* bayat a maibangbangon ti daong,+ a babaen iti dayta, naisalakan iti danum ti manmano laeng a tattao, walo a kararua.*+

21 Ti bautismo, a katupag daytoy, ti mangisalakan met kadakayo ita (saan a babaen ti panangikkat iti rugit ti lasag, no di ket ti panagkiddaw iti Dios iti nasayaat a konsiensia),+ babaen ti panagungar ni Jesu-Kristo. 22 Isu ket adda iti makannawan ti Dios,+ ta napan idiay langit, ket naipasakup kenkuana dagiti anghel ken autoridad ken pannakabalin.+

4 Gapu ta nagsagaba ni Kristo iti lasag,+ tuladenyo ti panagpampanunotna;* ta ti tao a nagsagaba iti lasag insardengnan ti agbasol,+ 2 tapno iti nabatbati a panagbiagna iti lasag, maaramidna ti pagayatan ti Dios+ imbes a ti tarigagay ti tao.+ 3 Ta ti tiempo a naglabas ket umanayen a panagaramidyo iti pagayatan dagiti tattao iti lubong,+ kas kadagiti nakaal-alas a kababalin,* di makontrol nga immoral a tarigagay, panagbarbartek, nalabes a panagragragsak,* nalabes a panaginum iti arak, ken makarimon nga idolatria.+ 4 Masmasdaawda ta insardengyon ti makiraman iti dakes a panagbiagda, isu a dakes ti ibagbagada maipapan kadakayo.+ 5 Ngem makikuentanto dagitoy a tattao iti daydiay nakasagana a mangukom kadagiti sibibiag ken kadagiti natay.+ 6 Kinapudnona, daytoy ti makagapu a naipakaammo met ti naimbag a damag kadagiti natay,+ tapno uray naukomda iti lasag no iti panangmatmat ti tao, agbiagda koma maitunos iti espiritu no iti panangmatmat ti Dios.

7 Ngem asidegen ti panungpalan ti amin a banag. Gapuna, nasimbeng koma ti panunotyo,+ ken naridamkayo* iti panagkararag.+ 8 Kangrunaan iti amin, nauneg koma ti ayatyo iti maysa ken maysa,+ ta ti ayat abbonganna ti adu a basol.+ 9 Padagusenyo koma ti maysa ken maysa nga awanan panagtanabutob.+ 10 Sigun iti sagut nga inawat ti tunggal maysa, usarenyo dayta nga agserbi iti maysa ken maysa kas nasayaat nga adipen ti nagpaiduma a kinaimbag ti Dios a nayebkas iti nadumaduma a pamay-an.+ 11 No adda asinoman nga agsao, ibagana koma ti sagrado a mensahe ti Dios; no adda asinoman nga agserbi, aramidenna koma dayta sigun iti bileg nga ipapaay ti Dios;+ tapno maidaydayaw ti Dios iti amin a banag+ babaen ken Jesu-Kristo. Kukuana ti dayag ken ti pannakabalin iti agnanayon nga awan inggana. Amen.

12 Patpatgek a kakabsat, diyo koma pakasdaawan dagiti mapaspasaranyo a nakaro* a pakasuotan,+ a kas man la adda karkarna a banag a mapaspasaranyo. 13 Imbes ketdi, itultuloyyo ti agragsak+ iti panagsagabayo a kas iti panagsagaba ti Kristo,+ tapno agragsak ken agrag-okayo met inton maipalgak ti dayagna.+ 14 Naragsakkayo no malalaiskayo* gapu iti nagan ni Kristo,+ ta adda kadakayo ti nadayag nga espiritu, wen, ti espiritu ti Dios.

15 Nupay kasta, awan koma kadakayo ti agsagaba kas maysa a mammapatay wenno mannanakaw wenno managdakdakes wenno mannakibiang iti sabsabali.+ 16 Ngem no adda agsagaba kas maysa a Kristiano, saan koma a mabain,+ no di ket itultuloyna nga idaydayaw ti Dios bayat nga aw-awitenna daytoy a nagan. 17 Ta daytoy ti naikeddeng a tiempo a panangrugi ti panangukom, ket mangrugi dayta iti balay ti Dios.+ No datayo ti pangrugianna,+ anianto ngarud ti pagbanagan dagiti saan nga agtulnog iti naimbag a damag maipapan iti Dios?+ 18 “No narigat a maisalakan ti nalinteg a tao, anianto ngarud ti mapasamak iti dakes a tao ken iti managbasol?”+ 19 Gapuna, dagidiay agsagsagaba maitunos iti pagayatan ti Dios, itultuloyda koma nga italek ti bagida* iti matalek a Namarsua bayat nga ar-aramidenda ti naimbag.+

5 Gapuna, kas maysa met a panglakayen, a nakakita kadagiti panagsagaba ti Kristo ken makiramanto iti dayag a maipalgak,+ ipakaasik* kadakayo a panglakayen: 2 Ipastoranyo ti arban ti Dios+ a naitalek kadakayo, nga agserbikayo kas manangaywan,* saan a mapilpilit, no di ket aramidenyo a situtulok iti sanguanan ti Dios;+ saan a gapu iti panagayat iti naagum a gunggona,+ no di ket sigagagar; 3 a saanyo nga iturayan dagidiay kukua ti Dios,+ no di ket agbalinkayo nga ulidan iti arban.+ 4 Inton maiparang ti panguluen a pastor,+ awatenyonto ti nadayag a korona a di agkupas.+

5 Kasta met, dakayo nga ub-ubing a lallaki, agpasakupkayo kadagiti lallakay.*+ Ngem ikawesyo* amin ti kinapakumbaba* iti pannakilangenyo iti maysa ken maysa, ta busoren ti Dios dagidiay natangsit, ngem ikkanna iti nagpaiduma a kinaimbag dagidiay napakumbaba.+

6 Agpakumbabakayo ngarud iti mannakabalin nga ima ti Dios, tapno itan-oknakayto iti naikeddeng a tiempo,+ 7 bayat nga ipalladawyo kenkuana ti amin a pakadanaganyo,*+ ta ipatpategnakayo.+ 8 Usarenyo ti abilidadyo nga agpanunot, agbantaykayo!+ Ti kabusoryo, ti Diablo, ket agsursursor a kasla leon a ngumerngernger, nga agsapsapul iti alun-onenna.+ 9 Ngem busorenyo+ babaen ti natibker a pammati, ta ammoyo a kasta met laeng ti sagsagabaen ti amin a kakabsatyo* ditoy lubong.+ 10 Ngem kalpasan a nagsagabakayo iti apagbiit, ti Dios a napno iti nagpaiduma a kinaimbag, a nangayab kadakayo iti agnanayon a kinadayagna+ a maikaykaysa ken Kristo, turposennanto a mismo ti panagsanayyo. Patibkerennakayto,+ papigsaennakayto,+ ikabilnakayto iti natibker a pundasion. 11 Adda kenkuana ti pannakabalin iti agnanayon. Amen.

12 Babaen ken Silvano,*+ nga imbilangko a matalek a kabsat, nagsuratak kadakayo iti sumagmamano a sasao tapno paregtaenkayo ken ipatalgedko a daytoy ti pudno a nagpaiduma a kinaimbag ti Dios. Agtakderkayo a sititibker. 13 Daydiay adda ditoy Babilonia, a napili a kas kadakayo, pakpakomustaannakayo, kasta met ni Marcos+ nga anakko. 14 Agkikinnablaawkayo iti agep ti ayat.

Maadda koma ti talna kadakayo amin a naikaykaysa ken Kristo.