MAIKADUA A SURAT NI PEDRO

1 Siak ni Simon Pedro, adipen ken apostol ni Jesu-Kristo, nagsuratak kadagiti naaddaan iti pammati a kas kapateg iti adda kadakami* babaen ti kinalinteg ti Diostayo ken ti Manangisalakan kadatayo a ni Jesu-Kristo:

2 Manayonan koma kadakayo ti nagpaiduma a kinaimbag ken talna babaen ti umiso a pannakaammo+ iti Dios ken ni Jesus nga Apotayo, 3 ta impaay* kadatayo ti pannakabalin ti Dios ti amin a banag a makatulong iti biag ken debosion iti Dios babaen ti umiso a pannakaammo iti Daydiay nangayab kadatayo+ babaen ti dayag ken kinaimbagna. 4 Babaen kadagitoy a banag, impaayna* kadatayo dagiti napateg ken nakasaysayaat a kari,+ tapno babaen kadagitoy makiramankayo iti dayag ti Dios kas naespirituan a parsua,+ ta nalasatantayo ti panagrupsa ti lubong a resulta ti dakes a tarigagay.*

5 Gapu iti daytoy, ikagumaanyo+ nga inayon iti pammatiyo ti kinaimbag,+ iti kinaimbagyo ti pannakaammo,+ 6 iti pannakaammoyo ti panagteppel, iti panagteppelyo+ ti panagibtur, iti panagibturyo ti debosion iti Dios,+ 7 iti debosionyo iti Dios ti nainkabsatan nga ayat, iti nainkabsatan nga ayatyo ti ayat.+ 8 Ta no adda kadakayo dagitoy ken agliplippias, saankayo nga agbalin a di aktibo wenno di nabunga+ maipapan iti umiso a pannakaammo ken ni Apotayo a Jesu-Kristo.

9 Ta asinoman nga awanan kadagitoy a banag ket bulsek, nga ikidkidemna dagiti matana iti lawag,*+ ken nalipatannan ti pannakadalus dagiti nabayagen a basolna.+ 10 Gapuna, kakabsat, aramidenyo ti amin a kabaelanyo nga agtalinaed a matalek kas naayaban+ ken napili, ta no itultuloyyo nga aramiden dagitoy, saankayto a pulos mapaay.+ 11 Kinapudnona, kastoyto ti nadayag nga iseserrekyo* iti agnanayon a Pagarian+ ti Apo ken Manangisalakan kadatayo a ni Jesu-Kristo.+

12 Gapu iti daytoy, panggepko a kanayon nga ipalagip kadakayo dagitoy a banag, nupay ammoyo ida ken sititibker a naipasdekkayo iti kinapudno nga adda kadakayo. 13 Ngem ibilangko nga umiso, bayat nga addaak iti daytoy a tabernakulo,*+ a paregtaenkayo babaen kadagiti pammalagip,+ 14 ta ammok a bayat nga ar-aramidek dayta, asidegen a maikkat ti tabernakulok, kas inlawlawag met kaniak ni Apotayo a Jesu-Kristo.+ 15 Kanayon nga aramidek ti amin a kabaelak tapno inton pumanawak, malagipyo* dagitoy a banag.

16 Idi impakaammomi kadakayo ti pannakabalin ken kaadda ni Apotayo a Jesu-Kristo, saan a naibatay dayta iti ulbod nga estoria nga inimbento dagiti tattao, no di ket nakitami ti kinadayagna.+ 17 Ta inawatna iti Dios nga Ama ti dayaw ken dayag idi naibaga kenkuana dagitoy a sasao* babaen ti naisangsangayan a dayag: “Daytoy ti Anakko a dungdungnguek, a pakaragsakak.”+ 18 Wen, nangngegmi dagitoy a sasao manipud langit idi addakami idiay nasantuan a bantay a kaduana.

19 Isu nga ad-adda a kombinsidokami a matungpalto dagiti padto, ket umiso ti panangipamaysayo kadagita a kas iti lampara+ nga agsilsilnag iti kasipngetan (agingga a pumarbangon ken rummuar ti bituen ti agsapa+) kadagiti pusoyo. 20 Ta umuna iti amin, ammoyo nga awan ti padto iti Kasuratan nga agtaud iti bukod nga opinion ti asinoman. 21 Ta saan a naited ti padto babaen ti pagayatan ti tao,+ no di ket naggapu iti Dios ti imbaga dagiti tattao bayat a tigtignayen* ida ti nasantuan nga espiritu.+

2 Nupay kasta, adda met idi dagiti ulbod a propeta iti tengnga dagiti umili, a kas met iti kaaddanto dagiti ulbod a mannursuro iti tengngayo.+ Sililimed a mangpatauddanto kadagiti makadadael a sekta, ken tallikudandanto pay ketdi daydiay nanggatang kadakuada,+ nga agresulta iti alisto a pannakadadaelda a mismo. 2 Maysa pay, adunto ti mangtulad iti nakaal-alas a kababalinda,*+ ket malalaisto ti pudno a sursuro gapu kadakuada.+ 3 Siaagum a gundawayandakayto met babaen kadagiti ulbod a sasao. Ngem saan a maitantan ti pannakaukomda a nabayagen a naikeddeng,+ ken sigurado a madadaeldanto.+

4 Dinusa ti Dios dagiti anghel a nagbasol,+ ket intapuakna ida iti Tartaro,*+ a kinawaranna ida* iti nakaro a kinasipnget bayat nga ur-urayenda ti pannakaukomda.+ 5 Dinusana ti nagkauna a lubong,+ ngem insalakanna ni Noe, a nangikaskasaba iti kinalinteg,+ agraman ti pito pay a tattao+ idi linayusna ti lubong a napno iti dakes a tattao.+ 6 Dinusana met dagiti siudad ti Sodoma ken Gomorra babaen ti panangpadapona kadagita,+ kas pakdaar* iti mapasamak kadagiti dakes a tattao.+ 7 Ken insalakanna ti nalinteg a ni Lot,+ a nariribukan unay iti nakaal-alas a kababalin* dagiti dakes a tattao—​ 8 ta inaldaw nga agladladingit daytoy nalinteg a tao gapu kadagiti dakes nga aramid a makitkita ken mangmangngegna bayat nga agnanaed iti tengngada. 9 No kasta, ammo ni Jehova* no kasano nga isalakan iti pannubok dagiti tattao a mangipakpakita iti debosion kenkuana,+ ngem dadaelennanto dagiti nakillo a tattao iti aldaw ti panangukom,+ 10 nangnangruna dagidiay mangikagkagumaan a mangrugit iti bagi ti dadduma+ ken dagidiay mangum-umsi iti autoridad.*+

Nakaritda ken ipilitda ti kaykayatda, ket saanda a mabuteng nga agsao iti dakes kadagiti nadayag, 11 idinto ta dagiti anghel, uray no nabilbileg ken mannakabalinda, saanda nga ak-akusaran ida babaen ti makainsulto a sasao, gapu iti panagraemda ken* Jehova.*+ 12 Ngem dagitoy a tattao, kas kadagiti awan nakemna nga animal nga agtigtignay sigun iti nakaisigudanda ken nayanak tapno matiliw ken madadael, agsasaoda iti dakes maipapan kadagiti banag a saanda nga ammo.+ Madadaeldanto gapu iti bukodda a makadadael nga aramid, 13 nga agsagabadanto gapu iti dakes nga aramidda.

Ibilangda a naragsak ti agpapas iti nanam-ay a biag,+ uray iti aldaw. Isuda ket rugit ken mansa, a pagraragsakanda dagiti mangallilaw a sursuroda bayat a makipangpanganda kadakayo.+ 14 Napno ti matada iti pannakikamalala+ ken saanda a maliklikan ti agbasol, ken sulsulisogenda dagiti nakapuy.* Nasanay ti pusoda nga agagum. Nailunodda nga annak. 15 Nayaw-awanda idi pinanawanda ti nalinteg a dana. Sinurotda ti dana ni Balaam+ nga anak ni Beor, a maay-ayatan iti gunggona ti dakes nga aramid,+ 16 ngem natubngar gapu iti panangsukirna iti bilin.+ Ti di makasao nga asno nga addaan iti timek ti tao ti nanglapped iti minamaag nga aramid ti propeta.+

17 Mayarigda iti naatianan nga ubbog ken angep nga intayab ti napigsa a bagyo, ket agur-uray kadakuada ti nakaro a kinasipnget.+ 18 Ta ibagbagada ti bambanag a kasla napateg ngem awan serserbina. Sulsulisogenda dagiti tattao a kaisarsardengna pay laeng ti agaramid iti dakes+ babaen ti pananggargarida kadagiti tarigagay ti lasag+ ken kadagiti nakaal-alas a kababalin.* 19 Ikarkarida a mawayawayaanto dagidiay sumurot kadakuada, ngem adipenda a mismo iti basol;+ ta ti maparmek ti asinoman, agbalin nga adipenna.*+ 20 No insardengdan dagiti narugit nga aramid ti lubong+ babaen ti umiso a pannakaammo maipapan ken Jesu-Kristo nga Apo ken Manangisalakan kadatayo, ngem aramidenda manen dagiti banag nga insardengda, dakdakesen ti kasasaadda ngem idi damo.+ 21 Nasaysayaat la koman a saanda a naan-anay a naammuan ti dana ti kinalinteg ngem ti naammuanda dayta sa tallikudanda met laeng ti nasantuan a bilin nga inawatda.+ 22 Pimmudno kadakuada ti kuna ti proverbio: “Kinnan ti aso ti bukodna a sarua, ken nagtulid iti kapitakan ti nadigus a baboy.”+

3 Patpatgek a kakabsat, daytoyen ti maikadua a suratko kadakayo, a kas iti immuna, kayatko a riingen ti abilidadyo nga agpanunot babaen ti pammalagip,+ 2 tapno malagipyo koma ti sasao nga imbaga* dagiti nasantuan a propeta ken ti bilin ti Apo ken Manangisalakan kadatayo babaen kadagiti apostolyo. 3 Umuna iti amin, ammuenyo nga iti maudi nga al-aldaw addanto dagiti tattao a manguyaw iti naimbag, nga aramidenda ti bukodda a tarigagay+ 4 ken ibagbagada: “Ayan ti naikari a kaaddana?+ Manipud idi aldaw a natay dagidi ammami, saan a nagbaliw ti amin a banag manipud idi naparsua ti lubong.”+

5 Ta igaggagarada a lipaten a nabayagen nga adda ti langit ken ti daga a sititibker a naisaad iti tengnga ti danum babaen ti sao ti Dios;+ 6 ket dagitoy ti nangdadael kadagiti tattao idi a tiempo, idi nalayus ti intero a daga.+ 7 Ngem babaen iti dayta met laeng a sao, naisagana a madadael ti langit ken ti daga babaen ti apuy agingga iti aldaw ti panangukom ken iti pannakadadael dagiti dakes a tattao.+

8 Ngem diyo koma ipalubos a malipatanyo daytoy, patpatgek a kakabsat, a ti maysa nga aldaw ken Jehova* ket kasla sangaribu a tawen ken ti sangaribu a tawen ket kasla maysa nga aldaw.+ 9 Saan nga itantan ni Jehova* a tungpalen ti karina,+ kas ipagarup ti dadduma a tattao. Ngem an-anusannakayo ta saanna a kayat a madadael ti asinoman no di ket kayatna nga agbabawi ti amin.+ 10 Ngem umayto ti aldaw ni Jehova*+ a kas iti mannanakaw,+ ket aglabasto ti langit+ buyogen ti daranudor,* ken marunawto dagiti elemento ta nakapudpudotda, ket matakuatanto ti daga ken dagiti aramid iti dayta.+

11 Gapu ta kastoyto ti pannakarunaw ti amin a banag, panunotenyo no ania a kita ti tao ti rumbeng a pagbalinanyo. Nasantuan koma dagiti kababalinyo ken ipakitayo kadagiti aramidyo ti debosionyo iti Dios, 12 bayat nga ur-urayen ken laglagipenyo* ti kaadda ti aldaw ni Jehova,*+ a madadaelto ti langit+ iti apuy ken malunagto dagiti elemento gapu iti nakaro a pudot! 13 Ngem adda baro a langit ken baro a daga nga ur-urayentayo kas inkarina,+ ket kadagitoy nga agtaeng ti kinalinteg.+

14 Gapuna, patpatgek a kakabsat, gapu ta ur-urayenyo dagitoy a banag, aramidenyo ti amin a kabaelanyo tapno iti kamaudiananna, masarakannakayo nga awanan iti rugit ken mansa ken addaan iti talna.+ 15 Kasta met, ibilangyo ti kinaanus ti Apotayo kas pannakaisalakan, kas iti insurat met kadakayo ti patpatgentayo a kabsat a ni Pablo maitunos iti sirib a naited kenkuana,+ 16 a dinakamatna dagitoy a banag iti amin a suratna. Nupay kasta, narigat a maawatan ti dadduma kadagita, ket dagitoy ti tirtiritiren dagiti ignorante* ken nakapuy ti pammatina, a kas iti ar-aramidenda iti dadduma a paset ti Kasuratan, nga agresulta iti pannakadadaelda.

17 Gapuna, patpatgek a kakabsat, gapu ta nasaksakbay nga ammoyon daytoy, agannadkayo tapno saandakayo a mayaw-awan dagiti dakes a tattao babaen ti biddutda ket kumapuy ti pammatiyo.*+ 18 Saan, no di ket itultuloyyo ti umawat iti ad-adu pay a nagpaiduma a kinaimbag ken pannakaammo maipapan iti Apo ken Manangisalakan kadatayo a ni Jesu-Kristo. Maadda koma kenkuana ti dayag ita ken iti agnanayon. Amen.