Ammoyo Kadi ti Im-imdengan dagiti Annakyo?
Ti 15-años nga anak a babai ti mannurat a ni Kandy Stroud kinunana, “Masapul a denggem daytoy, Nanang!” Ngem kinunana pay, “Ngem dika denggen dagiti sasaona.” Pinatokarna ti kanta ti maysa a nalatak a managkanta ti rock. Nagimdeng ti inana, ket iti rabaw dagiti kompas nangngegna dagiti sasao. Ti kanta ket maipapan iti maysa a babai a seksual nga ab-abusuenna ti bagina iti lobby ti maysa nga otel.
Ni Kandy Stroud, iti panagsuratna iti Newsweek, intuloyna a kinuna: “Dagiti nakababbaba a seksual a sasao ti kanta a kas itoy . . . ti mangbukel iti musika a taraon a maipakpakan kadagiti minilion nga ubbing idiay konsierto, kadagiti album, kadagiti radio ken MTV [maysa a kable ti TV a ti patpatokarenna ket musika a rock idiay Estados Unidos].”
Kinunana pay: “Kas agpada a naganak ken musiko maseknanak kadagiti adu a hit a kankanta a mabalin a maawagan laeng a porn rock, ken maipapan iti awan mamaayna, nailadawan ken awan bayadna a seksualidad a nangpunnon kadagiti allon ti angin ken maipaspastrek iti pagtaengantayo.”
Kas naganak, maseknankayo aya maipapan iti kita ti musika a mangim-impluensia kadagiti annakyo wenno ti kita ti musika a pilpilien dagiti annakyo? Apay a napateg dayta? Agsipud ta ibagana ti panagrasrason ti anakyo ken no ania ti nakaisaadan ti pusona. Kas impadamag ti Newsweek, ni Dr. Joseph Novello, direktor iti programa ti droga, inimtuodna dagiti pasiente a tin-edyer maipapan iti kaykayatda a musika. “Dayta man ti sataniko, seksual wenno naipamaysa iti droga—adda ibagana kenkuana maipapan iti pampanunot ti ubing.”
Nasukimatyo kadin ti kapanunotan ti anakyo? Ammoyo kadi ti kita ti musika nga im-imdenganna iti pagtaengan wenno iti sadinoman? No kunaenyo a ti musika saan a makapabileg, kasano ti panangtamingyo iti dayta a banag? Babaen iti dogmatiko a pananglais wenno naannad a panagrason ken disiplina? Namalakad ni apostol Pablo: “Dakayo nga amma, manen, dikay ruroden dagiti annakyo, no di ket isuroyo ida, babalawenyo ida, a maiyannurot iti Nakristianuan a panangpadakkel.”—Efeso 6:4, The New English Bible.
Addada umdas a nadumaduma a musika a mabalin a masarakan ti maysa a makaay-ayo a musika nga addaan nadalus a sasao. Mabalin a dadduma ti mabalin a mangbaliw iti pagayatanda iti musika, ngem manipud iti Nakristianuan a panangmatmat dayta ket gagangay a paset iti ‘panangikawes iti baro a personalidad.’ Babaen iti umiso a tarigagay ken pakatignayan, daytat’ maaramidan.—Efeso 4:20-24.