Anianto ti Masanguanantayo ken kadagiti Annaktayo?
TI MAYSA a pamilia di mabalin nga aggasto iti ad-adu ngem ti masapulanna ket kaskasdi agtalinaed a natalged ti pinansial a kasasaadna. Ti maysa a nasion dina mabalin ti aggasto iti nasursurok ngem ti mapastrekna ket kaskasdi a rumang-ay pay laeng; wenno ditay met mabalin nga itultuloy ti aglablabes a panangusartayo iti aglawlawtayo. Ditay mabalin a sayangen iti ad-adu a daga ngem ti mabalin a mapataud, mangpataud iti ad-adu a carbon dioxide ngem ti mabalin nga usaren dagiti mulmula, mangpukan ti ad-adu a kayo ngem ti maisukattayo, rugitan ti angin ken danum ngem ti kabaelan nga isubli ti daga. Dagiti pagkurangan iti aglawlaw, kas kadagiti nasional a pagkurangan, sapulennanto ti pannakikuenta. Dagitoy mabayadandanto, iti kuarta man ken internasional a panagtitinnulong wenno kadagiti biag—biagtayo ken biag dagiti annaktayo.
Ti moderno a teknolohia pinagbalinna a posible ti pannakadadael iti daga. Dayta ti mabalin a mausar a manglapped iti dayta. Ngem apay a saan? Gapu iti ayat ti kuarta. Aggatad dayta iti binilion. Saan a makita dayta ti lubong—wenno gapu iti kinaagumna dinanto makita dayta—iti labes ti di agbayag a materialistiko a tartarigagayna. Agsipud ta agkedked nga agbayad iti kuarta, dayta agbayadto iti pannakapukaw iti makinrabaw a dagana, pannakapukaw dagiti kabakiranna, pannakapukaw dagiti agik-ikut iti daga a pilana, maaddaan iti nabara nga atmospera, nasabidongan a danum, umad-adu a sakit, pannakapukaw ti natauan a biag. Ket tapno mataginayonna ti kuartana, daytoy a lubong ilaklakona ti masanguanan dagiti annakna.
Mariingto kadi iti umiso a tiempo? Awan ti panginanamaan iti sungbat iti historia, ngem mapangnamnamaan ti sungbat ti Dios. Kuna ni Jehova a Dios a mismo a makibiangto ket “dadaelenna dagidiay mangdaddadael iti daga.” (Apocalipsis 11:18) Ikkatennanto manipud ditoy daga dagidiay mangdaddadael iti aglawlawda ken iti kinapintasna, ta pinarsuana dayta a makataginayon iti biag ken napintas. “Ti langit isu ti tronok, ket ti daga ti pagbatayan dagiti saksakak,” kunana, ket: “Aramidekto ti disso dagiti saksakak a nagloriaan.”—Isaias 66:1; 60:13.
Pinarsuana dayta a pagnaedan dagiti tattao nga agayat iti kinalinteg—ket daytanto, dagiti minilion a nagbiag idi napalabas, dagiti minilion nga agbibiag itan, ken dagiti minilion nga annak a maipasngayto pay. Daytoy inlanadna iti Saona, ti Biblia, ket mabasayo dayta a mismo idiay Isaias 45:18 ken Juan 5:28, 29.
Kalpasanna, babaen ti panangtaripato dagidiay a mangay-ayat iti dayta, ti daga pasubliennanto ti kinapintasna isu nga impaay ti Namarsuatayo iti dayta. Iti kasta dagiti nalinteg a tattao ken dagiti annakda maaddaandanto iti masanguanan, maysa a nadayag a masanguanan: “Ta bassit pay a darikmat, ket ti nadangkes maawanton; wen, mingmingamto a sigaganetget ti ayanna, ket awanton. Ngem dagiti naemma tawidendanto ti daga, ket maay-ayatandanto iti kinaruay ti talna. Ti sililinteg tawidennanto ti daga ket agtaengto kenkuana nga agnanayon.”—Salmo 37:10, 11, 29.
Ket saandanton a matay? Ket saandanton a matay! “Ket ti Dios met laeng addanto kadakuada a Diosda. Ket punasennanto ti amin a lulua kadagiti matada; ket awanton ni patay, ket awanto metten ti sasaibbek, wenno sangsangit, wenno rigrigat. Dagiti immuna a bambanag napalabasdan.” (Apocalipsis 21:3, 4) Nakasaysayaat unay aya dayta a kasla di nakakapapati? Saan, daytoy agdama a dakes a sistema dakes unayen tapno agtalinaed.—Daniel 2:44.
Ngem dakayo ken dagiti annakyo mataginayonkayo. Pinagbalin ti Dios a posible dayta babaen iti daton ti Anakna. Ti panangammo ken ni Jehova ken iti Anakna kaipapanannanto ti biag nga agnanayon para kadakayo ken kadagiti annakyo—biag iti baro a lubong a sadiay agtaengto ti kinalinteg. (Juan 3:16; 17:3; 2 Pedro 3:13) Daytoy ti mabalin a masanguananyonto ken kadagiti annakyo. Pudno man dayta kadakayo wenno saan ket agpannuray kadakayo.