Di Umiso a Resita ti Moderno a Teknolohia
NO MAYSA a doktor ti agkuna a ti panangresitana ipalgakna nga addaanka iti sakit, mabalinmo kadi a masigurado a ti resitana ket umiso? Maysa a report nga impablaak ti pagiwarnak iti Canada a The Globe and Mail kunaenna a saan a kanayon a kasta! “Dagiti panagadal a mangidildilig kadagiti nasarakan iti autopsia iti makagapu iti ipapatay nga impadamag ti doktor ket biddut iti 10 agingga iti 30 a por siento.” Daytoy ket pudno nupay no adda ti nakaad-adu a nangato ti teknolohiana a pangresita nga alikamen. Makapainteres, ni Dr. T. F. McElligott, presidente iti Canadian Association of Pathologist, pagarupenna a ti nalabes a panagtalek kadagita nga alikamen ket paset iti parikut.
“Adda ti kasta unay a moderno a panangiladawan iti panangresita itan,” kinunana, “adu kadagiti adda iti klinika ti makarikna nga awanen ti adu unay a maammuan iti autopsia, gapuna a saandan a dawdawaten dayta.” Impakaammona, “pagarupek a saan nga umiso daytoy a panangipagarup.” Ti pagiwarnak inturongna met ti atension iti sumagmamano a nabiit pay a panagadal a nangipalgak nga “agarup 20 por siento kadagiti makapapatay a sakit ti agtultuloy a di umiso ti pannakaresitana.”
Kas pangarigan, iti maysa a mangisursuro nga ospital iti unibersidad iti Estados Unidos, maysa a 30-tawen a panagadal kadagiti autopsia “ti nakasarak nga, imbes a paaduenna ti intero a kinaumiso dagiti resita, ti panagpannuray kadagiti nangato a teknolohia a panangsukimat . . . ti pudno a nangipaay iti di umiso a panangresita kadagiti dadduma a kaso.” Kasta met, iti maysa nga ospital iti Winnipeg, Canada, 13 porsiento kadagiti autopsia a naaramid idi 1983 “ti nakasarak iti maysa a kangrunaan a di umiso a pannakaresita a, no nailasin koma dayta sakbay ti ipapatay, dayta ti mabalin a nagbanag koma iti at-atiddog a biag para iti pasiente wenno posible a maimbagan.”
Iti sabali pay nga ospital ti Winnipeg, ti panagadal iti autopsia dagiti 200 a bangkay ti “nagkuna a 24 por siento ti nakasarak kadagiti makagapu ti ipapatay a saksakit ngem ti naresita. Iti 10 por siento, ti nagbanagan mabalin a naiduma koma no umiso ti panangresita a naaramid sakbay ti ipapatay.” Gapu kadagitoy a makapasiddaaw a kinapudno, nainsiriban para kadagiti tattao nga addaan iti serioso a parikut iti salun-at ti mangsapul saan laeng a ti maymaysa a kapanunotan manipud kadagiti sinaggaysa a mangngagas.