Sinonto ti Agtawid iti Daga?

SINUNGBATAN ni Jesus daytoy a saludsod iti Sermonna iti Bantay: ‘Dagiti naemma tawidendanto ti daga.’ Adu a siglo pay a nasaksakbay kinuna ni salmista David: “Dagiti naemma tawidendanto ti daga.” Maipapan ken Jehova a mismo kinunana: “Ti daga intedna kadagiti annak dagiti tattao.”​—Mateo 5:5; Salmo 37:11; 115:16.

Idi pinarsua ni Jehova ti tao, Isu ti nangikabil kenkuana a mangaywan iti daga. Isu ti nangkomision kenkuana a “mangtalon ken mangaywan iti dayta.” (Genesis 2:15) Imbes ketdi, minulitan ken dinadadael ti tao dayta. Impadto ti Apocalipsis 11:18 nga isunto ken isu laeng ti makapasardeng iti dayta. Ti Dios “iyegnanto iti pannakadadael dagidiay a mangdaddadael ti daga.” Saan a dumdumngeg ti tao no umkis ti kinapintas ti daga nga agprotesta, ngem isut’ dumngeg a naimbag no agarasaas ti kuarta.​—1 Timoteo 6:10.

Ngem ti kuarta ket maysa met a kamaudianan a biktima. Maysa nga editorial iti U.S.News & World Report ti nagimtuod iti maysa a napateg a saludsod:

“Siasino itatta dagiti realista? Iti adun a tawtawen, dagiti maseknan nga umili maipapan iti ar-aramidentayo iti planetatayo ti nalalais a kas idealista, mananggargari iti panagamak ken dagiti mannakibiang a managaramid iti naimbag. Ita kellaaten a naglawag nga umiso dagiti ‘di praktikal’ a managdandanag maipapan ti acid rain, ti panagreggaay ti salaknib ti ozone ti daga ken ti sangalubongan a panagbalbaliw ti klima manipud iti polusion ti atmospera gapu iti carbon dioxide, ti epekto a greenhouse (ti panagtalinaed ti pudot manipud iti silnag ti init iti rabaw ti daga gapu iti kaadda ti carbon dioxide iti atmospera).

“Kadagitoy amin a tallo a kaso, agbayadtayonto ken dagiti annaktayo ti nangina gapu iti panagpampanunot dagiti maipagarup a praktikal a tattao. Ti ‘kinarealistikoda’ ti nanglapped iti panangtimbeng iti polusion a mabalin nga aggataden iti minilion iti daydi a tiempo, ngem itan mapaspasanguantayo iti gatad a di mabilang a binilion a maipaay iti din mabalbaliwan a nagbanaganna a mabalin a mangpataudto ti sangalubongan a didigra.”

Dagidiay a mabalin a nakaaramid koma iti maysa a banag maipapan iti dayta nakabambannayatda ket pinekpekda dagiti pitakada bayat a dagiti tattao agsakitda ken matayda. Ket ar-aramidenda pay laeng dayta. Ti innem a ribo a tawenen a historia ti tao ti nangpaneknek a pudno ti Biblia, no kunaenna: “O Jehova, ammok a ti dalan ti tao saan nga agtaud kenkuana met laeng. Saan nga agtaud iti tao a magna ti panangiturong kadagiti addangna.”​—Jeremias 10:23.

Ti Dios ipaayna iti tao ti panangiwanwan a kasapulanna: “Ti saom ti pagsilawan kadagiti saksakak, ket silaw iti danak.” (Salmo 119:105) Dayta ti mangiturong iti kinaragsak: “Siak, ni Jehova a Diosmo, Daydiay mangisuro kenka a maipaay iti gunggonam, Daydiay mangiturong kenka iti dalan a papanam koma. O no dinengngegmo koma dagiti bilbilinko! Iti kasta ti talnam kas koma iti maysa a karayan, ken ti kinalintegmo kas la koma daldalluyon ti baybay.”​—Isaias 48:17, 18.

Ngem ti kaaduan iti sangatauan awananda iti kinaemma a mangawat iti nadiosan a panangiwanwan ket iti kasta apitenda dagiti gunggonana. Masapul nga ipakaammoda ti panagwaywayasda, masapul nga ipilitda ti panangala iti dalan nga agturong iti pannakadadael. Dagiti laeng naemma ti makasarak “ti dalan nga agturong iti biag.”​—Mateo 7:13, 14.

Dagiti tattao itatta nagbalindan a di maikari. Umuna mulitanda ti bagbagida met laeng iti moral, ket kalpasanna mulitanda a literal ti daga. Isu daytoy pannakamulit iti moral ti mamagbalin kadakuada a di maikari iti imatang ti Dios nga agtawid ti daga. Ti sumaganad nga artikulo mangipaay kadagiti dua nga ulidan iti no kasano a ti imoralidad dagiti tattao ti nangmulit iti kasta unay iti daga ta napapanawda iti dayta. Dagitoy a dua a kaso agsublida iti kadaanan a historia.