Manipud Managbasatayo
Panagpakuttong Idi damo a nakitak ti artikulo iti bilang a Mayo 22, 1989, maipapan iti panagpakuttong, intantanko ti panangbasa iti dayta iti sumagmamano a lawas. Ngamin, kaaduan iti panagbiagko nalukmegak. Bueno, kabasbasak pay laeng dayta ket naparegtaak iti kasta unay, magagaran pay, a mangiyugali iti nagsayaatan, naayat a singasing. Ti pannakipagriknayo, pannakaawatyo, ken ti naayat a pannakaseknanyo ket maapresiar unay.
L. B., Estados Unidos
Agyamanak iti kasta unay maipaay iti artikulo maipapan iti panagpakuttong. (Mayo 22, 1989) Saanak a narawet ngem adda adu a metaboliko a parparikutko a mamagbalin a nalukmeg kaniak. Mariknak kaaduanna a kaslaak karkarna. Diak kayat nga ipatodak dagiti tattao, a pagarupenda a ti laeng ar-aramidek isu ti mangan. Pagyamanan ti panangitudoyo a saan nga amin a nalukmeg ket narawet. Ammok nga ay-ayatennak ni Jehova ken maawatannak ket awatennak nupay ania ti itsurak. Basta tarigagayak laeng a dagiti tattao ket ad-adda koma a naayat ken mannakaawatda.
P. R., Estados Unidos
Nanipud idi nabasak ti artikuloyo, rinugiak ti maysa a programa iti panagehersisio ket ikagkagumaak ti saan unay nga agbussog iti rabii. Nakapukawakon iti pito wenno walo a libra ket mariknak a nakaskasdaaw. Agyamanak iti kasta unay!
G. V., Pederal a Republika iti Alemania
Saan nga amin makapadas kadagiti mabiit a resulta. Para kadagiti dadduma nga indibidual, ti panagpakuttong ket narigat a pannakidangadang a makasapul iti adu a panangikagumaan, determinasion, ken suporta—saan a ti panangbabalaw.—ED.
Dakdakes Pay Ngem Aids Nasairak a naimbag iti artikulo a “Banag a Dakdakes Pay Ngem Aids.” (Abril 22, 1989) Impalagip ti artikulo kaniak ti kasasaadko. Siak nakaaramidak met kadagiti bambanag a makarimon ken Jehova a Dios. Bayat a basbasaek dayta, makaluaak. Nangrugin a nabigbigko a no awan ni Jehova, kasla agnanaedka iti maysa a planeta nga awan danum! Ad-adda pay nga ikagumaak ti panangaramid iti makaay-ayo iti imatang ti Dios.
I. A., Estados Unidos
Panangpili iti Karera Agyamanak iti adu a maipaay iti artikulo nga, “Ania a Karera ti Piliek?” (Mayo 8, 1989) Kayatko ti agadal iti maysa nga unibersidad ngem masapul ti panangidianko iti arapaapko gapu kadagiti nadumaduma a parparikut. Kabayatanna rinugiak ti nakipagadal iti Biblia kadagiti Saksi ni Jehova. Kinapudnona ti artikuloyo tinulongannak iti kasta unay. Diakon agbabbabawi. Addaanakon iti paset-tiempo a trabaho ket agserserbiakon kas amin-tiempo nga ebanghelisador. Pagarupek nga awanen ti karera nga ad-adda a makapnek.
A. P., Italia
Dagiti Milagro ken Sirmata Kankanayonak a managbasa iti Agriingkayo! Nupay kasta, mariknak a nalipatanyo dagiti adu a puntos maipapan iti Lourdes. (Marso 8, 1989) Bumisbisitaakon iti Lourdes iti 18 a tawtawen, ket nupay no diak nakakita kadagiti milagro ken sirmata, addada dagiti dadduma a gunggona. Kadagiti adu daytat’ makapariing, ken kadagiti ad-adu pay daytat’ gubuayan ti panangiturong kadagiti biagda. Ti ibibisita idiay Lourdes ket saan a panangsapsapul kadagiti milagro. Daytat’ pannakabigbig iti bilin ni Jesus nga: “Ayatenyo ti maysa ken maysa.” Aniaman a lugar a makaipaawat kadagiti adu a tattao iti daytoy ket saan nga agbalin a dakes.
R. K., Britania
Dagiti templo kadagiti luglugar a kas iti Lourdes ken Fátima ket ipatpateg dagiti adu a napasnek a Katoliko, ket apresiarenmi a naimbag dagiti riknada. Ti artikulomi impakitana, nupay kasta, a ti panangidayaw kadagita a luglugar ket nairamut iti kinaulbod ken maikontra iti Kasuratan. Ket nupay no dagita a luglugar mabalin a dakkel ti pakaawisan, masapul a laglagipentayo a kinuna ni Jesu-Kristo a “dagiti pudno a managdaydayaw” saanda a daydayawen ti aniaman a partikular a lgar no di ket “dayawenda ti Ama iti espiritu ken kinapudno.”—Juan 4:21-23.—ED.