Kasanot’ Panangmatmatyo Kadagiti Tattao iti Sabali a Rasa?

“Dagiti kalbo iti America, kas kadagiti dinamiko a kalbo iti Europa, isu dagiti managtrabaho a klase nga agtutubo nga Aryan.

Kabusormi ti kapitalista ken dagiti awan mamaayna a komunista a mangdaddadael iti rasami nga Aryan. . . . Ti rasa a Judio nga agpampannuray laeng iti padada ti kangrunaan a parikutmi.”

KASTAT’ kunaen ti maysa a polieto manipud iti gang dagiti kalbo idiay Chicago. Dagitoy nga agtutubo a nangkuskus kadagiti uloda, a mangisuot kadagiti kawes a pakailasinan dagiti butangero a naburdaan iti swastikas, idayawda ti kinaranggas, denggenda dagiti ‘nabibileg [a musika] dagiti puraw,’ ket laisenda dagiti Judio, negro, ken dadduma pay a minoridad.

Ti pangulo iti gang a maawagan Romantic Violence imbagana iti asamblea dagiti puraw a papangulo iti rasa a ti grupona “kaipapananna iti gubat,” ket kinunana pay: “Naranggasak a tao. Pagay-ayatko ti rasa a puraw, ket no ay-ayatem ti maysa a banag sikat’ kadadaksan a tao ditoy daga.”

Bayat ti pannakapukaw dagiti movimiento, mammano laeng dagiti kalbo. Nakalablabes dagiti panangmatmatda. Mammano laeng a tattao itatta ti sipapanayag ti kinapanatikona ken agresibo iti panangmatmatda. Ket kaskasdi, adut’ nalimed a manggurgura kadagiti tattao iti sabali a rasa ket dida agtalek kadakuada. Iti intero a lubong, maukom dagiti tattao sigun panagtaldiap ti matada wenno iti kolor ti kudilda. Adda kadi aniaman a pangibatayan itoy? Adda kadi nainkasigudan a mental wenno nagdudumaan iti rikrikna kadagiti rasa? Tapno masungbatan dagitoy a salsaludsod, masapul nga usigentayo nga umuna dagiti nadumaduma a panangmatmat iti rasa a timmaud bayat dagiti adun a siglo.