Makadadael a Layus iti Australia
PANUNOTENYO laengen ti maysa a layus a nanglapunos iti maysa a lugar a kas iti kadakkel iti Gran Britania, Francia, ken Alemania a nagtitipon. Bueno, daytat’ napasamak idi napan a tawen idiay Queensland, Australia. Ti Charleville, maysa nga ili iti asideg ti tengnga iti lugar ti didigra, masapul a maiyakar. Tallo ribo nga umili ti natipontipon kadagiti tolda iti nangangato a lugar iti lokal nga eropuerto. Dadduma ti masapul a maalaw manipud kadagiti tuktok ti atep babaen iti helicopter.
Maysa a bassit a grupo dagiti 35 a tattao a mainaig iti Kongregasion dagiti Saksi ni Jehova iti Charleville ti nagkamang iti maysa a Saksi a ti sanikuana ket adda iti nangato a lugar a 10 kilometros iti ruar ti ili. Daytoy ti nagbalin a pagpunduanda a mangtulong kadagiti napukawan iti pagtaengan.
Sipapartak, rinugian dagiti Saksi ti mangipaay iti tulong. Idiay Dalby, 550 kilometros ti kaadayuna, maysa a grupo dagiti boluntario ti naporma a mangdalus kadagiti nalayus a pagtaengan. Idiay Roma, 270 kilometros ti kaadayuna, nagkolekta dagiti Saksi kadagiti taraon ken dagiti dadduma a suplay a pangemerhensia, kas kadagiti ules ken kawes. Kalpasan ti pananglikmut ti eroplano iti lugar tapno ikeddeng ti dadael, immayen dagiti boluntario—nasurok a sangagasut ti bilangda.
Dineskribirda ti lugar ti didigra a kas “di mailadawan.” Lima a centimetro a pitak ken arinsaed ti nanggabur iti isuamin. Dagiti nadaddadael a muebles naiwarada kadagiti kuarto, nadadael dagiti alpombra, natinep dagiti aplayans a de koriente, nabaliktad dagiti kotse. Adda iti isuamin a lugar ti angot ti agruprupsan a taraon, naopran a kayo, ken adda rugit iti isuamin a lugar.
Nangrugin a nagtrabaho dagiti boluntario. Iti Sabado, Abril 28, maysa laeng a lawas kalpasan ti layus, dagiti pagtaengan ken paraangan dagiti Saksi idiay Charleville nadalus ken mararaem manen ti itsurada. Saan laeng a panagdalus ti kasapulan, nupay kasta. Ti grupo dagiti boluntario rinugianda nga insubli ti koriente kadagiti pagtaengan ken tinarimaanda dagiti kotse ken dagiti aplayans iti pagtaengan. Dagiti managikabil kadagiti alpombra nangikabilda kadagiti baro nga alpombra; dagiti managaramid kadagiti estante nangibangonda kadagiti baro nga estante; dagiti karpintero, pintor, ken tubero nagtarimaanda.
Ti resulta: Dua a lawas kalpasan ti layus, amin dagiti Saksi nagsublidan kadagiti natarimaan a pagtaenganda. Dagiti boluntario saanda, nupay kasta, a linimitaran ti panangtulongda kadagiti padada a Saksi. Idi maysa a grupo ti nangdalus ti pagtaengan ti maysa a Katoliko, maulit-ulit nga inyebkasna ti pannakasdaawna.
Idiay Brisbane naidaydayaw dagiti Saksi iti radio gapu iti trabahoda bayat ti layus. Ket idiay Charleville, adu nga umili ti nasdaaw a makakita no kasanot’ kapartak dagiti Saksi nga agtignay. Maysa a lalaki a dati a bumusbusor kadakuada ti nangngegan a nagkuna: “Ket adda pay laeng [turedtayo] a mangpapanaw kadakuada kadagiti ruangantayo.”