No Kasano a Naala ti Quiver Tree ti Naganna

KAADUAN a managbiahe iti nadagaang ken kalet-angan a paset ti makinabagatan nga Africa ti mabuyogan iti buya ti quiver tree. “Buyogen ti dumapo nga ukisna a nagaritan iti puraw . . . , daytat’ agtaktakder kadagiti katurturodan, natibker ken nadaeg. . . . Kasda la centurion ti nalipatanen a buyot, a nairuamen iti angin, init, waw, ken nakalamlam-ek a rabii.” Kastat’ panangiladawan ni Jon Manchip White kadagiti quiver tree iti librona a The Land God Made in Anger.

Kinapudnona, ti quiver tree ket maysa kadagiti 150 a kita ti aloe nga agtubtubo idiay makinabagatan nga Africa. Nupay addaan iti nasiit, natubbog a bulbulong, agtubtubo dayta kadagiti lugar a sadiay sagpaminsan laeng nga agtudo. Makalasat dayta babaen ti panangurnongna iti danum iti puonna. Tunggal Hunio ken Hulio, mabalin ngarud ti quiver tree nga ayaban dagiti kalugaranna a billit, alimbubuyog, ken baboon nga agpiesta iti nektar manipud iti naraniag a duyaw a sabsabongna.

Ngem apay a naawagan daytoy a kayo a quiver tree? Ngamin dagiti Bushmen, dagiti manangpartuat a mangnganup ken manangurnong iti makinabagatan nga Africa, inusarda dagiti sanga ti kayo kas bai dagiti panada. Dagitoy a nasariwawek nga imbentor inikkatda ti nalukneng a bugas ti sanga, ket no nagangon ti kayona, mabalinen nga usaren a bai. Gapuna napanaganan iti—quiver tree.