Sadinot’ Nangalaan ni Moises ti Impormasion nga Inramanna iti Genesis?
Amin dagiti impormasion a linaon ti libro ti Genesis mainaigda kadagiti pasamak a napasamak sakbay ti pannakaipasngay ni Moises. Mabalin a direkta nga impaltiing ti Dios dayta. Nalawag ngarud nga adda immawat iti impormasion a mainaig kadagiti pasamak sakbay a naparsua ti tao babaen dayta a pamay-an, ni Moises man dayta wenno maysa a nagbiag sakbay ni Moises. (Genesis 1:1-27; 2:7, 8) Nupay kasta, daytoy nga impormasion ken dagiti dadduma a detalye, mabalin a direkta a naibaga ken Moises. Gapu iti kapaut ti biag ti tao idi a tiempo, mabalin a naiyallatiw ti impormasion manipud ken Adan agingga ken Moises babaen iti lima laeng a tao, da Matusalem, Sem, Isaac, Levi, ken Amram. Ti maikatlo a pamusposan ket mabalin a nagun-odan ni Moises ti adu kadagiti impormasion iti Genesis manipud kadagiti adda idin a sursurat wenno dokumento. Idi maika-18 a siglo, ti eskolar nga Olandes a ni Campegius Vitringa kastoy ti kapanunotanna, nga imbatayna ti konklusionna iti masansan (namin-sangapulo a daras) a maiyebkas a sasao idiay Genesis (iti KJ) a “dagitoy dagiti kaputotan ni,” ken naminsan a “daytoy ti libro dagiti kaputotan ni.” (Genesis 2:4; 5:1; 6:9; 10:1; 11:10, 27; 25:12, 19; 36:1, 9; 37:2) Iti daytoy a sasao ti sao a Hebreo nga agpaay iti “kaputotan” ket toh·le·dhohthʹ, ket ad-adda a maitutop a maipatarus a “pakasaritaan” wenno “nagtaudan.” Kas pangarigan, ti “kaputotan dagiti langlangit ken ti daga” ket saan a maitutop, ngem ti “pakasaritaan dagiti langlangit ken ti daga” ket addaan kaipapanan. (Genesis 2:4) Maitunos iti daytoy, ti Aleman nga Elberfelder, ti Pranses a Crampon, ken ti Kastila a Bover-Cantera aminda inusarda ti termino a “pakasaritaan,” a kas ti New World Translation. Awan duadua a no kasano a dagiti tao itatta interesadoda iti umiso a rekord ti historia, kasta met idi punganay.
Gapu kadagitoy a rason, ni Vitringa ken dagiti dadduma nanipud idi naawatanda ti tunggal pannakausar iti toh·le·dhohthʹ nga adda iti Genesis a tuktukoyenna ti naisuraten a historikal a dokumento nga ikut ni Moises ken nagpannurayanna iti kaaduan nga impormasion nga insuratna iti Genesis. Patienda a dagiti tao a nainaganan a direkta kadagita a ‘pakasaritaan’ (da Adan, Noe, dagiti annak a lallaki ni Noe, Sem, Terah, Ismael, Isaac, Esau, ken Jacob) mabalin nga isuda ti nagsurat wenno dati a makinkukua kadagidiay a naisurat a dokumento. Siempre, daytoy dina pay laeng mailawlawag no kasano a naikutan ni Moises dagitoy a dokumento. Kasta met dina mailawlawag no apay a dagiti dokumento a nagun-odan kadagiti tao a di matalek a managdaydayaw ni Jehova (kas kada Ismael ken Esau) ket rumbeng a gubuayan iti adu nga impormasion a nausar. Mabalin ngarud a ti ebkas a “Daytoy ti pakasaritaan iti” ket basta pangrugian laeng a sasao a mangilasin a kadarato kadagiti nadumaduma a paset iti isuamin nga atiddog a historia. Idiligyo ti panangusar ni Mateo iti umasping a sasao a mangirugi iti salaysayna iti Ebanghelio.—Mateo 1:1.
Ngarud, awan ti magtengan a masinunuo a konklusion, maipapan iti mismo a gubuayan iti impormasion nga insuratna. Imbes a babaen iti maysa laeng a pamay-an kadagiti naisalaysayen, mabalin nga inawatna ti impormasion babaen kadagiti tallo a pamay-an, daddumat’ babaen iti direkta a pannakapaltiing, daddumat’ babaen iti pannakaibaga kenkuana a mismo, daddumat’ babaen kadagiti naisurat a dokumento. Ti napateg ket inwanwan ni Jehova a Dios ni mammadto a Moises isut’ gapuna a nagsurat babaen iti panangipaltiing ti Dios.—2 Pedro 1:21.
Ti material ket agserbi a naipaltiing a giya dagiti masanguanan a kaputotan. Masapul a maibasa dayta kadagiti tao kadagiti masansan nga okasion (Deuteronomio 31:10-12; 2 Ar-ari 23:2, 3; Nehemias 8:2, 3, 18), ket manggun-od dagiti ari ti Israel iti pammilin manipud iti dayta.—Deuteronomio 17:18, 19.