Maysa a Karit kadagiti Nagannak
Ti lubong saanen a lugar a nasayaat ti kababalinna a kas idi. Adda nakaad-adu a pakaammo a mainaig iti sekso. Iparang dagiti magasin dagiti babbai a kas gagangay nga ay-ayam a mailaklako kadagiti tiendaan ti groseria. Maysa a kanta a rock itan-okna ti panangrames ti maysa a babai babaen iti kaam-ammona. Pudno la unay, kas paneknekan ti makita ken mangngegan iti inaldaw, daytoy ket maysa nga imoral a lubong!
NAPALIIW ti propesor iti panagadal ti pamilia a ni Greer Litton Fox a “kadagiti 40 wenno ad-adu pay” nga ar-aramid a pannakidenna wenno maipagarup a panagdenna “a mabuya iti telebision manipud ala 1:30 agingga iti alas 11 t.r. iti inaldaw, kurang a 5 porsiento ti mangiraman kadagiti agassawa.” Gaput’ panangiparparegta ti media iti sekso, di met nakaskasdaaw a mabasa ti “nakaad-adu ken makadadael a nagbanagan iti panagsikog dagiti tin-edyer.”
Ngarud, para kadagiti nagannak nga agtarigagay iti kasayaatan para kadagiti annakda, maysa a karit ti mangpadakkel kadakuada iti daytoy imoral a lubong. Kaskasdi, daytoy dina kaipapanan nga amin nga agtutubo ket makidendenna. Ipalgak dagiti surbey a kagudua kadagiti babbai iti America nga agtawen iti 15-agingga-iti-19-napadasandan ti nakidenna, isu a mangpatalged a saan pay a napadasan ti kagudua ti nakidenna! Kasta met, uray pay dagidiay a napadasandan ti nakidenna tarigagayanda a saanda koma a nakidendenna. Nagsurat ti maysa iti mannurat iti benneg iti diario a ni Ann Landers:
“Ti pannakidennak ken Joe (ti immuna a nagrayuak) ket makaupay, gapuna a pinadasko manen ti nakidenna ken Mike, kalpasanna ken Neal, kalpasanna ken George. Diak ammo no aniat’ sapsapulek. Aniaman dayta, diak nasarakan dayta. Nagun-odak dagiti adu a minamaag a kapanunotan kadagiti magasin, drama ken sine. Saan a kasta ti pudpudno a biag.
“No makasaritak laeng dagiti agtutubo a mangbasbasa iti bennegyo, ibagak kadakuada a ti pannakidenna bayat a tin-edyer pay laeng dina solbaren dagiti parikut, ad-adu pay ti parnuayenna. Dina pagbalinen ti maysa a babai a maay-ayat, ipariknana nga isut’ makarimon. Ipakaammok a daytat’ di mamagbalin iti maysa a babai a ‘nataktakneng,’ daytat’ ad-adda a mangibabain kenkuana.
“No makasaritak laeng dagiti nagannak, iparegtak ti panangipaganetgetda kadagiti annakda iti panagraem iti bagi ken iti nangato a pagalagadan.”
Kinapudnona, dagiti agtutubo a nasinged kadagiti nagannakda ken makarikna a natalgedda iti pamiliada ken naimbag ti panagriknada kadagiti bagbagida mammano a matnagda iti imoralidad ngem dagidiay saan a nasinged. Ket adda maysa nga organisasion a nasurok nga uppat a milion a tattao iti sangalubongan a sadiay dagiti agtutubo matultulonganda a mangsalimetmet iti nangatngato a pagalagadan ngem ti kaaduan a masursurot itatta.
Agpapan pay kadagitoy a kinapudno, kasano a matulonganyo dagiti annakyo a mangsalaknib iti bagbagida manipud iti umad-adu nga imoralidad iti lubong itatta? Kasano a matulonganyo ida nga agbiag a naragragsak, nasaysayaat, ken nadaydayaw ti panagbiagda? Dayta ti tema dagiti sumaganad a dua nga artikulo.