Dagiti Misterioso a Lawag—Sadinot’ Paggapuanda?

DAGITI makin-amianan ken makin-abagatan a lawag, wenno dagiti aurora, ket gubuayan iti panagsiddaaw dagiti tattao nga agnanaed kadagiti paset iti daga a pakakitaan kadagitoy, gagangay iti asideg ti geomagnetic poles iti amianan ken abagatan. Mapapati itan nga iti uneg ti daga, agpangato ken matnag dagiti narunaw a metal ken matiritirda bayat ti panagrikos ti daga. Daytoy pataudenna dagiti koriente a mangtignay iti magnetiko a tay-ak nga apag-isu a maibatog iti agrikrikos a daga. Adda makita nga epekto dagiti partikulo ti radiasion a makagteng iti daga manipud iti init gapu kadagitoy a magnetiko a tay-ak. Ngem nakarkaro pay ti epektona no adu a partikulo ti aggapu iti naraniag unay a silnag ti init a maigapu kadagiti sunspot. Adu a partikulo ti lapdan ti magnetiko a tay-ak ti daga. Matignay dagiti atomo iti atmospera dagiti lugar iti aglawlaw dagitoy a magnetiko a polo ket pataudenda dagiti makita a lawag a nagduduma a kolor. Mapataud dagiti kolor no tignayen daytoy nga enerhia manipud iti init dagiti atomo ti oksihena ken nitrohena ket pataudenda dagiti makita a lawag iti wavelength a nalabaga/berde/lila. Kaaduan kadagiti aurora ket berde ti kolorda, ket kadagiti dadduma a lugar nalabaga ken lila. Kadagiti makin-amianan a paset ti daga, dagitoy a lawag maawaganda aurora borealis, (Latin, makin-amianan a baggak) ket kadagiti makin-abagatan, dagitoy maawaganda aurora australis (makin-abagatan a baggak).

“Ti langlangit ipalawagda ti dayag ti Dios,” kuna ti kadaanan a salmista. (Salmo 19:1) No kayatyo a maammuan ti ad-adu pay maipapan ti Namarsua iti langlangit, pangngaasiyo ta makiumankayo laeng kadagiti Saksi ni Jehova iti lugaryo, wenno agsurat kadagiti manangipablaak itoy a magasin.—Kitaenyo ti panid 5

[Picture Credit Line iti panid 32]

Ladawan ti NASA