“Iyadaninakayo ken Kristo”

DAYTA man ti kunada maipapan iti maysa a libro a nabiit pay nga impablaak dagiti Saksi ni Jehova, Ti Katan-okan a Tao a Nagbiag Pay Laeng. Kinuna ti maysa a babai manipud Francia: “Nupay no kankanayon a dakkel ti panangapresiarko kadagiti publikasion ti Watch Tower Society, awan pay a pulos ti libro a nangapektar iti kasta unay kaniak.” Iti maysa a surat iti sanga nga opisina ti Sosiedad idiay Francia, inlawlawagna:

“Daytoy a nalawat’ saklawenna a pakasaritaan ti biag ni Kristo ti nangtignay kaniak a mangayat iti makaay-ayo a personalidadna nga ad-adda pay. Naammuak met dagiti napateg a paset iti panagbiagna, nupay no namin-adun a daras a nabasak dagiti salaysay ti Ebanghelio. Kadagiti pinanid ti libro, agbibiagtayo iti naganat a kanito ti panagbiag ni Kristo, a makitatayo ti panangngaasi ken anusna, ngem maingel ken natibker.

“Makatignay a nangnangruna dagiti maudi a kapitulo. Uray la a diak magawidanen dagiti luak bayat ti panangpanunotko a ti kapatgan a parsua iti intero nga uniberso situtulok a nagsagaba iti sidong dagiti dakes nga ahente ti Diablo. Anian a nakabilbileg nga ulidan! Kunaek nga itan nasingsingedakon iti ‘Agnanayon nga Amatayo,’ wen, iti agturturayen nga Aritayo.”—Isaias 9:6.

Dagiti Saksi ni Jehova ket maysa nga internasional nga organisasion a nasurok nga uppat a milion nga estudiante ti Biblia, a mamatida amin a ni Jesu-Kristo saan laeng nga isu ti katan-okan pay laeng a tao a nagbiag no di ket ti kakaisuna a pamay-an a pakagun-odan dagiti tao iti biag nga agnanayon.—Aramid 4:12.

No kayatyo ti ad-adu pay nga impormasion wenno ti libre a panagadal iti Biblia iti pagtaengan, pangngaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista iti panid 5.