Inikkan Dagiti Mannursuro ti Gundaway ti Panamarsua
Implastar ti maysa nga eskuelaan idiay Berlin, Alemania, iti maysa a nagdakkelan a diding ti maysa a lamina a mangiyanninaw no kasano a nagbalin a moderno a tao dagiti kas-songgo a parsua. Iti maysa nga aldaw nga isasangpetda idiay eskuelaan, nakita dagiti estudiante a ti lamina ket napintaan ti puraw. Aniat’ napasamak?
Maysa a 16-años nga estudiante nga agnagan Natalie, maysa kadagiti Saksi ni Jehova, ti nangdamag iti mannursurona ti biology no apay a ti laminat’ napinturaanen. Inlawlawag ti mannursuro nga isut’ inikkan ti maysa nga estudiante iti maysa a kopia ti Life—How Did It Get Here? By Evolution or by Creation? Kasta unay ti panangdayawna iti libro nga uray la nga impakitana dayta iti dadduma pay a mannursuro iti biology idiay eskuelaanda. Ti libro inallukoyna met ida.
Gapuna, inkeddeng dagiti mannursuro a pinturaan ti lamina, a kinunada, ‘tapno nasaksakbay a malapdan ti pannakakullaap ti panunot dagiti estudiante.’ Imbes a ti laeng teoria ti ebolusion ti isuroda, inkeddeng dagiti mannursuro nga isuroda met ti panamarsua, nga usaren ti material manipud ti Life—How Did It Get Here? By Evolution or by Creation?
Daytoy makaallukoy a publikasion ket impablaak dagiti Saksi ni Jehova a sangalubongan nga organisasion ti nasurok nga uppat a milion nga estudiante ti Biblia a naregget a tumulong kadagiti tattao a makasursuro iti ad-adu pay maipapan iti pangpanggep ti Dios. No kayatyo ti maaddaan iti kanayonan nga impormasion wenno libre a panagadal iti Biblia iti pagtaenganyo, pangngaasiyo ta agsuratkayo iti Watch Tower, P. O. Box 2044, 1099 Manila, wenno iti maitutop a direksion a nailista idiay panid 5.
[Ladawan iti panid 32]
Life—How did it get here? By evolution or by creation?