Maysa a Lubong nga Awanan Gubat
TI MAKAPARAGSAK a padto iti Isaias kapitulo 2 ket pudno a matungtungpalen iti kaaldawantayo. Asidegen ti maysa a lubong nga awanan gubat. Minilionen a Saksi ni Jehova iti aglawlaw ti lubong ‘pinitpitdan dagiti kampilanda a pinagbalin a dingding ti arado ken dagiti pikada a pinagbalin a komkompay.’ Nupay naggapuda iti tunggal nasion ken kasasaad ti panagbiag, nasursuroda a parmeken ti aniaman a dati a panangidumduma ken gura, ket nasursuroda dagiti dalan ti Dios iti pudno a talna, ni Jehova. (Isaias 2:4) Gapu iti daytoy a managayat-talna a takder, napadasanda ti [naibalud] kadagiti kampo a pagbaludan a kadua dagiti Judio (1933-45).
Nupay kasano karaniag dagiti namnama maipaay iti masanguanan, saan a naraniag para kadagiti amin. Saanto nga urayen ni Jehova iti agnanayon dagiti amin a tao a mangpanday kadagiti kampilanda a pagbalinen a dingding ti arado. Addada dagidiay agkedked a mangaramid iti kasta. Awan duadua ti salmista maipapan iti pagtungpalan dagita: “Ta dagiti agaramid ti dakes magessatdanto, ngem dagidiay nga agpannuray iti APO—tawidendanto ti daga. Ta bassit pay a darikmat ket ti nadangkes maawanton; mingmingamto ti ayanna—ket awanton.” (Salmo 37:9, 10) Wen, iti asidegen a masanguanan, agtignayton ni Jehova, ‘pasardengenna dagiti gubat iti isuamin a daga.’—Salmo 46:9-11 (46:8-10, NW).
Ti isu met laeng a padto ni Jesus a nangited ti pagilasinan ti maudi nga al-aldaw intampokna met ti kaasideg ti pannakibiang ti Dios. Kinuna ni Jesus: “Dinto pay lumabas daytoy a kaputotan [ti kaputotan iti 1914 a nakasaksi ti panungpalan ‘ti pannakatungpal dagiti naituding a panawen’] maaramidton amin dagitoy a banag.” (Mateo 24:34; Lucas 21:24, NW) Asidegen a lumabas dayta a kaputotan. Wen, itan ti tiempo a panangikeddeng ti amin a sangatauan! Itan, kadagitoy maudi nga al-aldaw, wenno “panungpalan dagiti al-aldaw,” (JP) a masapul a pilientayo no ‘sumang-attayo iti bantay ni Jehova’ tapno ‘paisuro kadagiti dalanna’ wenno saan. Ngem kas nakitatayo itoy a salaysay, adut’ ramanen ti panangammo iti pudno a Dios, ‘ti pannakaisuro kadagiti dalanna, ti pannagna kadagiti danana.’ (Isaias 2:2, 3, NW, Ta) Ti panangaramid iti kasta saan laeng a basta panangbasa ti maysa a magasin wenno panagadal iti ababa a kurso. Ramanen dayta ti ad-adda pay a pannakaisuro a mangapektar iti isuamin a wagas ti panagbiag. Kayatyo kadi a maammuan ti ad-adu pay maipapan iti Dios ti talna?
Sisasagana dagiti Saksi ni Jehova a tumulong kadakayo a mangaramid iti kasta a napateg a panagsukimat. Paregtaendakayo a mangitultuloy a mangusig itoy a tema buyogen iti isuamin a kinapasnek, tapno mairamankayo met kadagidiay ‘sumang-at iti bantay ni Jehova, a paisuro kadagiti dalanna.’ Maipaay iti ad-adu pay a tulong, makiumankayo kadagiti Saksi ni Jehova iti maysa a Kingdom Hall nga asideg kadakayo, wenno agsurat kadagiti mangipabpablaak itoy a magasin. (Kitaenyo ti panid 4.)