Panangapresiar Kadagiti Managbuteng-Dios a Nagannak
Dagiti nagannak a kasta unay ti panangikagumaanda a mangpadakkel kadagiti annakda tapno agbalin a manakem ken managbuteng-Dios a nataengan ket maikari iti panagyaman no naballigi dagiti panagreggetda. Maragsakanda met no iyebkas dagiti annakda ti panangipateg iti nasayaat a pannakapadakkelda.
Ti sumaganad ket maysa a surat nga impatulod ti maysa nga anak ken ni baketna, kalpasan ti panagkallaysada, iti nagannakna:
“Patgenmi a Tatang ken Nanang:
“Ania ngata ti umuna nga ibagami? Irugimi babaen ti kasta unay a panangapresiarmi iti panagayat, panangandingay, ken kinamanagparaburyo idi aldaw ti panagkallaysami. Pudno a naisangsangayan daydi nga aldaw, ket maipateg unay ti kaaddayo. Kasta pay met, a di imdas dayta ta tinulongandakami iti panagbalin ti honeymoon-mi a makaparagsak unay. Amin dagita ket kanayonan a pammaneknek nga anian a nagsayaat, naayat, nainkalintegan, ken naragsakkayo a nagannak ken kanayonkayo a kasta sipud pay laeng idi!
“Ammoyo kadin no apay a nakapagtalinaedak iti nailet ken akikid a dalan ti biag? Gapu ta malaksid iti panagayatko ken Jehova a Dios, kankanayon nga adda dakkel a panagraemko kadakayo. Kasta unay daytoy a panagraem a kakuyog ti disiplinayo, pinagbalinnak a manakem iti panangaramid kadagiti bambanag ken pangngeddeng. Talaga a nagpannuray ti balligi ti biagko iti panangaramid ti pagayatan ti Dios nangnangruna iti natunos nga ayat ken disiplinayo kaniak ken ti manayon a debosionyo ken Jehova ken ti organisasionna.
“No lagipek amin a kapadasak idi kinaubingko ken pagtitiponek ida, iyebkasda a nupay diak malagip amin nga imbagayo, malagipko ti nagsayaat a kababalinyo, nangnangruna ti panagayatyo iti sabsabali ken ni Jehova.
“Ing-ingungotendakayo unay.
“Ti anakyo ken ti manugangyo,
“L. ken W.”