Konsiensia, Apay a Riribukennak?
“TAKRUT a konsiensia, anian ti panangriribukmo kaniak!” Dagidiay a nalatak a sasao, nga inyebkas ni Ari Richard III iti estoria ni Shakespeare a kasta met laeng ti titulona, salaysayenna ti panagbabawi a tignayen ti konsiensia ti tao. Iti pudno a kabibiag ti konsiensia riniribukna ken binalbaliwanna ti biag dagiti adu.
Ti pannakabalin ti konsiensia ket inladawan ti nabiit pay a kaso ti maysa nga agtutubo nga Italiano. Ti trabahona kas maysa a guardia iramanna ti panangibiahe ti dadakkel a gatad ti kuarta. Nasayaat ti isuamin agingga a, maysa nga aldaw, isut’ nasulisog ket tinakawna ti maysa a sako a naglaon iti 300,000,000 lire [$185,000]. Agsipud ta dua ti kaduana iti trabaho ket dida matukoy no asino kadakuada ti nangala iti dayta, naikkatda amin a tallo iti trabaho.
Inlemmengna ti tinakawna a kuarta, a panggepna nga usaren dayta apaman nga agkalman ti damag maipapan iti panagtakaw. Ngem nangrugin ti di ninamnama a pannakatuok: Kankanayon a pampanunotenna ti pannakaikkat dagiti awan basolna a katrabahuanna. Isut’ di pagtalnaen ti konsiensiana iti uray apagkanito laeng. Di makaturog. Di makapangan. Isut’ narigaten a pakilangenan.
Kamaudiananna, gapu ta riningbawanen ti basol ken mariribuken, napan iti polis ket inyawatna ti tinakaw a kuarta. Imbagana kadakuada: “Kasta unay ti panagbabawik. Diakon makaibtur!” Kinunana pay: “Naim-imbag a mabaludak nga ammok a napudnoak ngem ti siwayawayaak a konkondenaren ti konsiensiak kas maysa nga agtatakaw.”
Ti konsiensia ket sagut ti Dios kadagiti amin a tao. Mabalin a pabasolenna wenno wayawayaannatayo. No denggentayo dayta, nalabit saluadannatayo nga agaramid iti biddut, a mangikalintegan iti dakes nga aramid. Gapuna imbes a ditay ikankano dagiti panangtignayna wenno busorentay dayta kas ti inaramid ni Ari Richard III iti estoria ni Shakespeare, ipateg ken saluadantay koma ti konsiensiatayo.—Roma 2:14, 15.
No kayatyo ti ad-adu pay nga impormasion maipapan iti Biblia ken dagiti praktikal a balakadna, pangngaasiyo ta makiumankayo kadagiti Saksi ni Jehova idiay Kingdom Hall iti lugaryo, wenno agsuratkayo iti kaasitgan a direksion a nailista iti panid 5.