Pagiwarnak a Maitutop iti Pakasapulan Itatta

Ti Pagwanawanan ken Agriingkayo!​—a nasurok a 58 milion a kopia ti maimalmaldit iti binulan iti nasurok a sangagasut a pagsasao​—ar-aramidendan dayta. Nagsurat ti maysa a manangapresiar a managbasa:

“Kasta unay ti panagyamanko iti panangipablaakyo kadagiti artikulo a mangtaming kadagiti pudno nga isyu a sangsanguen ti adu.” Kinunana pay:

“Bayat nga umad-adani ti panungpalan daytoy a lubong, kasapulan dagiti tattao ti pannakipagrikna, pannakaawat, ken pannakatarus a tumulong kadakuada a mangparmek kadagiti parikutda. Ad-adda a tamtamingenen ti magasin a Pagwanawanan ken Agriingkayo! dagiti rason no apay a pasaray a di agballigi ti tattao a mangparmek kadagiti parikutda . . .

“Kayat ti kaaduan ti mangaramid iti umiso, ngem masansan a makigubgubalda iti pannakapaay, basol, negatibo a rikrikna, panagamak, nababa a panagraem iti bagi, nakapuy a nakairuaman a panagpampanunot, ken ti pannakarikna nga awan gawayda a tumulong iti bagida met laeng. Tultulongan dagiti artikuloyo ti adu a mangkontrol manen iti biag ken rikriknada. . . .

“Kayatko ti agyaman kadakayo nangnangruna iti Enero 22, 1994 nga Agriingkayo! maipapan iti ‘Komunikasion ti Agassawa.’ Imbes a mangitukon kadagiti makauma a sasao maipapan iti kinapateg ti komunikasion, sukisokenyo dagiti rason no apay a dagiti lallaki ken babbai dida agkinnaawatan. Babaen ti panangtulong iti kagudua ti populasion a makaawat iti kagudua, nakaaramidkayo iti dakkel a serbisio iti sangatauan ken iti inted-Dios nga institusion ti panagasawa.”

No kayatyo ti kopia Ti Pagwanawanan ken Agriingkayo! a maipatulod iti pagtaenganyo, pangngaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista iti panid 5.