Talaga Kadi a “Finch” Daytoy?
NALATAK dagiti finch iti intero a lubong. Agnanaedda iti amin a kontinente malaksid idiay nalamiis nga Antarctica. Adda agnanaed a finch uray kadagiti adu nga isla ti taaw. Ket masansan a napintasda. Usigenyo kas pagarigan ti American goldfinch. “Ad-adda a papintasen[da] ti tay-ak babaen iti napatak, duyaw ken nangisit a marisda . . . , ti agkarasuek a panagtayabda kadagiti arigna katurturodan ken kapanagan ti law-ang, ken ti makaay-ayo nga unida!”—Book of North American Birds.
Nupay kasta, adda maysa a finch nga awan kaaspingna gapu iti naisangsangayan a kinapintasna—ti lima-pulgada a Gouldian weaverfinch, a masarakan idiay makin-amianan nga Australia, nangruna kadagiti tay-ak ti eucalyptus. Iti pagilianyo, mabalin a masarakanyo ti sumagmamano kadakuada a nakatangkal. Kuna ti maysa nga encyclopedia: “Daytoy a panangtiliw ti maysa a makagapu iti irarasayda kadagiti kallabes a tawen.”
Dagiti finch ket addaan sippit a nadisenio ti unegda a mangsippit ken mangukis iti bukbukel. “Mapisi ti tunggal bukel iti maysa nga espesial a likkaong iti sikigan ti ngadas ken rumeken ti makimbaba a pangal. Maikkat ti ukis babaen ti tulong ti dila, a mangiruar iti bukel, nga isuntot’ alimonenna.” (Birds: Their Life, Their Ways, Their World) Para iti Gouldian finch, nupay kasta, “imbes a tuktokenna [dagiti bukel] manipud iti daga, agtayab ketdi a mapan iti yan ti mula sana guyoden dagiti bukel, wenno tuktokenna dagiti bukel bayat a nakabatay iti asideg a sanga.”—The Illustrated Encyclopedia of Birds.
No bilang makakitakayto iti maysa a Gouldian finch, sapay koma ta magutugotkayo nga agyaman a nakakita iti kasta a napintas a panamarsua iti kasta a bassit a billit.
[Ladawan iti panid 31]
Gouldian finch
[Ladawan iti panid 31]
American goldfinch