Maysa nga Aldaw a Namagbalbaliw iti Biagna
KINUNA ti maysa nga agtutubo a babai a taga Arizona, E.U.A., nga isut’ mannakimisa idi ngem naupay iti relihion. Kamaudiananna, inkararagna iti Dios: “Pulos a diak mapanen iti aniaman a simbaan. Ikagumaak ti agbiag iti wagas nga ammok a kasayaatan, ken ikarkarigatak ti agbalin a nasayaat a tao.”
Inlawlawag ti babai ti napasamak idi agangay: “Nagtelepono ni ikitko ket kinunana nga umayto iti lugarko tapno tabunuanna ti maysa nga aldaw nga espesial nga asamblea dagiti Saksi ni Jehova. Dinamagna no mabalinna agraman dagiti kasinsinko ti umyan iti apartmentko. Sa dinamagna: ‘Kayatmo kadi ti kumuyog kadakami?’ Malagipko ti insungbatko: ‘Apay a saan? Awan met ti napateg unay nga aramidek.’ Gistay napukawen idi ti interesko iti relihion.
“Kanayon a maibaga idi kaniak nga agannadak kadagiti Saksi ni Jehova. Isu a kabayatan ti asamblea, malagipko a nagpaliiwak a naimbag. Kaskasdi, awan ti misterio maipapan iti naikuna nga orihinal a panggep ti Dios a maadda ti paraiso a daga sa di nagbaliw ti panggep ti Dios. Nagtugawak sadiay buyogen daytoy nasged a rikna bayat a pinaliiwko dagiti pamilia nga agkakatugaw ken mangipakpakita iti espiritu ti panagkaykaysa. Indumogko ti ulok ken siuulimek a dinamagko iti Dios: ‘Daytoy kadi ti kinapudno? Daytoy kadi ti nabayagen a sapsapulek?’
“Idi agawidkamin iti dayta nga aldaw, nakitak dagiti tattao nga agiinnarakup ken agiinnagek kas pammakada buyogen ti naisem a ruprupa. Makitak kadagiti rupada nga awan ti aniaman a panagduadua iti panunot ken pusoda maipapan iti pammatida ken iti kinasiasino ni Jehova ken no ania ti naaramidanna kadakuada. Manipud iti daytan nga aldaw, rinugiak ti timmabuno iti Kingdom Hall dagiti Saksi ni Jehova ket diak pulos simmardeng sipud idin. Iti simmuno nga aldaw ti espesial nga asamblea, idi 1988, insimbolok iti publiko ti dedikasionko ken Jehova babaen ti pannakabautisar iti danum ken nagbalin a paset daytoy nagsayaat a pamilia.”
No kayatyo a masursuro ti ad-adu pay maipapan iti patpatien ken ar-aramiden dagiti Saksi ni Jehova, pangngaasiyo ta makiumankayo kadakuada iti Kingdom Hall-da, wenno agsuratkayo iti kaasitgan a direksion a nailista iti panid 5.
[Ladawan iti panid 32]
Maysa a nasged a rikna ti pamilia ti maadda kadagiti dadakkel a panagtataripnong dagiti Saksi ni Jehova, kas makita ditoy Russia