Tulong Agpaay Kadagiti Madandanagan nga Agtutubo

Idi naupay ti maysa a balasitang iti eskuelaan idiay New Jersey, E.U.A., sa nagtaray a rimmuar iti kuarto, isut’ sinurot ti maysa a kaklasena idiay girls’ room. “Idi nakagtengak kenkuana,” kinuna ti kaklasena, “isut’ agsangsangit ket imbagana kaniak ti dadduma a parikut ti pamiliana. Agdiborsion dagiti dadakkelna, ket imbagana nga isut’ marigatan a mangipamaysa iti panagadalna iti eskuelaan. Imbagana kaniak a kayatna ti pumanaw iti pagtaenganda.”

Imbaga ti kaklase iti madandanagan a balasitang a kayatna nga itugotan iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo. Iti sumaganad nga aldaw isut’ nangitugot, a sinirkuluanna agpaay iti gayyemna dagiti paulo ti kapitulo a kas ti “Apay a Rebbengko a ‘Dayawen ni Amak ken ni Inak’?,” “Apay a Nagsina da Tatang ken Nanang?,” “Kasanok a Mapagballigian ti Panangpilit dagiti Kapatadak?,” ken “Rebbeng Aya a Pumanawak iti Balay?”

“Idi intedko ti libro kenkuana,” kinuna ti kaklasena, “nakita ti dua a sabali pay a balasitang dayta ket nagusiosoda. Sinaludsodda no mabalin a maaddaanda met iti kopia. Isu nga inikkak ida ti saggaysada a kopia ti libro. Nakita ti dadduma nga ubbing iti klasek ti maysa kadagiti balasitang a manguk-ukag iti libro, ket kayatda amin a makita dayta. Naipasapasa ti libro iti klase buyogen ti anamong ti mannursuro.”

No kayatyo ti maaddaan iti kopia ti Dagiti Saludsod nga Iyimtuod ti Agtutubo​—Dagiti Sungbat nga Epektibo wenno maaddaan iti libre a panagadal ti Biblia iti pagtaenganyo, pangngaasiyo ta agsuratkayo iti Watch Tower, P.O. Box 2044, 1099 Manila, wenno iti maitutop a direksion a nailista iti panid 5.