Timmulong ti Agriingkayo! a Nangispal iti Biag

Bayat nga ur-urayen ti maysa kadagiti Saksi ni Jehova idiay Ecuador a mairingpas ti mekaniko a tarimaanen ti kotsena, imbaga ti asawa ti mekaniko iti Saksi a madanagan iti tagibina a ni Byron. Agkarakombulsion iti maminlima wenno mamin-innem iti kada lawas, ket saan a kabaelan nga i-diagnose dagiti doktor ti sakit. Naipan payen ni Byron kadagiti espesialista idiay Quito, ti kabesera a siudad.

“Bayat a makipatpatangak iti ina,” inlawlawag ti Saksi, “nakitak ti maysa a trabahador a mangpimpintura iti kotse, ket nalagipko ti maysa nga artikulo iti Agriingkayo! maipapan iti pannakasabidong iti bulí. Nadakamat ti artikulo a panagkombulsion ti maysa kadagiti sintoma ti pannakasabidong iti bulí. Imbagak iti babai nga ipakitakto kenkuana ti artikulo.”

Idi nabasan dagiti dadakkel ni Byron ti artikulo, impaeksamenda ti anakda iti pannakasabidong iti bulí. Natakuatan a nangato ti tukad ti bulí iti dara ni Byron. Ti panangagas ken pananglapped iti kanayonan pay a pannakaisarang iti bulí ti nagresulta iti nakaskasdaaw nga iyiimbag ti salun-at ni Byron. “Iti napalabas nga uppat a bulan, di pulos nagkombulsion,” kinuna ti Saksi. “Sipud idi, nakisaritan ti ama iti adu a doktor maipapan iti sakit, ket kanayon a padayawanna ti Agriingkayo! iti panangispalna iti biag ti anakna. Ita, dadduma kadagitoy a doktor ti agbasbasan iti Agriingkayo!”

Siguradomi a magunggonaankayto met a mangbasa iti Agriingkayo! No kayatyo ti umawat iti maysa a kopia wenno adda sumarungkar iti pagtaenganyo tapno ilawlawag ti Biblia kadakayo, pangngaasiyo ta agsuratkayo iti Watch Tower, P.O. Box 2044, 1099 Manila wenno iti maitutop a direksion a nailista iti panid 5.