Banag a Kasapulan Dagiti Agtutubo Ita

Kinuna ti 14-años a balasitang idiay New Jersey, E.U.A., nga idi kattapog daytoy a tawen masapul a mangisurat iti report no “Apay nga Agkusit Dagiti Estudiante iti Eksamen.” Intugotna idiay eskuelaan ti librona a Dagiti Saludsod nga Iyimtuod ti Agtutubo​—Dagiti Sungbat nga Epektibo tapno agsirarak. Pinidut ti maysa a kaklasena dayta ket rinugianna a binasa dagiti paulo iti paset a Dagiti Linaonna, kas iti “Ti Sekso ken dagiti Moral” ken “Panagkuyogkuyog, Ayat, ken ti Di Kasekso.”

“Mabalin kadi a kukuakon daytoy a libro?” kiniddaw ti kaklasena.

“Inlawlawagko a kopiak daytoy,” kinuna ti estudiante, “ngem kunak nga itugotakto ti maysa. Idi intugotak, nakita ti sabali a kaklasek ti libro ket kiniddawna a mangalaak met ti maysa para kenkuana. Di nagbayag kalpasanna nangitugotak iti sangapulo a libro a Dagiti Saludsod nga Iyimtuod ti Agtutubo agpaay kadagiti estudiante nga agtarigagay iti kopia.”

Matarusan ti 14-años nga estudiante a napateg ti maaddaan iti libro. Kinunana: “Pudno a kasapulantayo daytoy a publikasion agsipud ta kas agtutubo nakarikrikut dagitoy nga al-aldaw.”

No kayatyo ti maaddaan iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo wenno kayatyo nga adda sumarungkar iti pagtaenganyo a mangisalaysay iti kinapateg ti edukasion iti Biblia, pangngaasiyo ta agsuratkayo iti Watch Tower, P.O. Box 2044, 1099 Manila, wenno iti direksion a kaasitgan kadakayo a nailista iti panid 5.