Lansangan nga Emmy Zehden​—Ti Pakasaritaan iti Likudan ti Nagan

IDI Mayo 1992, maysa a lansangan idiay siudad ti Berlin, Alemania, ti naipanagan ken ni Emmy Zehden, maysa kadagiti Saksi ni Jehova.

Naipasngay ni Emmy idi 1900. Nakiasawa iti Judio a negosiante a ni Richard Zehden, a natay iti kampo konsentrasion ti Auschwitz kabayatan ti rehimen dagiti Nazi. Adda ampon da Richard ken Emmy, ni Horst Schmidt. Ni Horst ken ti dua a dadduma pay nga agtutubo a Saksi ni Jehova ti napilitan nga aglemmeng idi naayabanda nga agserbi iti militar.

Inlemmeng ni Emmy ni Horst ken ti dua a kakaduana. Nupay kasta, nasukalanda idi agangay. Isuda amin nga uppat ket nasentensiaan iti ipapatay​—ti tallo a lallaki gapu iti panagkitakitda nga agserbi iti militar ken ni Emmy gaput’ panangilemmengna kadakuada. Naputolan ti dua a kakadua ni Horst. Nagpetision ni Emmy agpaay iti pammakawan, ngem napaidaman. Naputolan idiay Plötzensee sadi Berlin idi Hunio 9, 1944.a Nalasatan ni Horst Schmidt ti panangidadanes dagiti Nazi ket idi agangay nangasawa iti maysa a Saksi a nakalasat iti kampo konsentrasion.

Idi Mayo 7, 1992, maysa a lansangan idiay Berlin ti naipanagan ken ni Emmy Zehden. Iti diskurso nga imbitla ti maysa nga opisial ti Alemania, isut’ napadayawan iti bilegna ken nadakamat kas maysa nga ehemplo ti adu kadagiti ‘nalipatan a biktima’ ti gubat.

[Footnote]