“Naragsakanda a Kas Ubbing”

Kasta ti panangdeskribir ti 32-anyos a ni Sergei, nga ama ti tallo nga ubbing, iti reaksion dagiti gagayyemna idi impakitana kadakuada ti libro a Life​—How Did It Get Here? By Evolution or by Creation? Ni Sergei, nga agindeg idiay Tatarstan, Russia, deskribirenna ti napasamak:

“Iti pangrugian binuyami dagiti ladawan ken binasami dagiti kapsion. Simmaruno dagiti napasnek a saludsod. Agkabannuag nga amma ken inna dagiti amin a gagayyemko . . . Makimisakam amin no Easter ken no adda buniag, ngem agpatingga ditan ti interesmi.

“Iti kasumbangirna, anian a panaginteresmi iti literaturayo! Ti namaris, nagpintas ti pannakadiseniona nga akkub ti libro dagus nga awisenna ti atension. No rugiamon ti agbasa, narigat nga isardeng dayta. Kayatmo nga iraman kadagiti kaarruba ti naammuam. Kasta met, mapnekka ken kontento kalpasan ti panangbasam ken panangisalaysaymo iti impormasion. Nakasarakkam met laengen iti makaparagsak, nainsiriban, ken makagunggona a banag a pagtutungtongan.

“Kinapudnona, agbibiagkami iti naespirituan a kinaungaong. Tunggal maysa pagtutungtonganda ti kuarta, dagiti parikut, pakadandanagan, ken intriga. Dagitoy a bambanag dangranna laeng ti puso. Kalpasan ti panangpampanunot kadakuada, dika makaturog a dagus, ket iti agsapa dika kayat ti mariing ken maipasango manen kadagiti nagadu a pakasikoran ti tao.”

Nalabit a kasta met ti rikriknayo ket maragsakankayto a maaddaan iti kopia daytoy makaay-ayo a publikasion nga impablaak dagiti Saksi ni Jehova, maysa nga internasional nga organisasion ti nasurok a lima a milion nga estudiante ti Biblia. No kayatyo ti maaddaan iti ad-adu pay nga impormasion wenno maysa a libre a panagadal iti Biblia iti pagtaengan, pangngaasiyo ta agsuratkayo iti Watch Tower, P.O. Box 2044, 1060 Manila, wenno iti maitutop a direksion a nailista iti panid 5.