“Dayta ti Kaunaan a Libro a Nabasana”

Dagiti Saksi ni Jehova idiay Ukraine masansan a makisaritada kadagidiay agur-uray iti tren. Maysa a babai a nangipakita iti interes iti Biblia ti naikkan iti maysa a kopia Ti Librok dagiti Estoria ti Biblia, maysa a publikasion a nakaad-adu ti inusarna a retrato nga agsasaganad ti pannakaurnosna iti historia ti Biblia.

Kalpasanna, iti dayta met laeng nga estasion, ti babai nakitana manen ti Saksi ket nagyaman kenkuana gapu iti libro, nga inlawlawagna: “Ti barok dina kayat nga adalen dagiti librona idiay eskuelaan. Manmano a basaenna ida. Ngem idi intedko kenkuana ti libro nga Estoria ti Biblia, nakitana dagiti retrato ket napalalo ti tarigagayna a mangbasa iti dayta. Binasana ti intero a libro iti agarup dua a lawas. Dayta ti kaunaan a libro a nabasana. Ngem kangrunaanna, naragsakan a nakaam-ammo iti Dios. Ket siak a mismo maragragsakanak a makakita kadagitoy a panagbalbaliwna. Pangngaasim ta ikkannak iti ad-adu pay a basaen.”

Ti sabali pay a babai nakatakder iti asideg ket nangngegna daytoy nga estoria. Kiniddawna no mabalin a makagun-od iti kopia Ti Librok dagiti Estoria ti Biblia. Mabalinyo met ti gumun-od iti maysa a kopia daytoy a 256-panid a libro wenno maaddaan iti sumarungkar iti pagtaenganyo a mangisalaysay kadakayo iti kinapateg ti edukasion iti Biblia, babaen ti panagsuratyo iti Watch Tower, P.O. Box 2044, 1060 Manila, wenno iti direksion a kaasitgan kadakayo a nailista iti panid 5.