Manipud Managbasatayo

Kagat ti Uleg Kas propesional a herpetologo, rebbengek nga aywanan ken tamingen dagiti uleg ken ikkaten metten ti gitada. Amin dagiti artikulo a “Kayatyo Kadi ti Makakita iti Cobra?” (Marso 22, 1996), “Habu​—Uleg a Masapul a Raemen” (Hulio 8, 1996), ken “Agannadkayo! Nagitaak” (Agosto 22, 1996) ti nangipakita iti positibo a kababalin para kadagiti pinarsua ni Jehova. Nupay kasta, kayatko nga ipaganetget a saan a maisingasing a bedbedan dagiti nakagat iti uleg. Kaaduan a tattao dida kabaelan ti mangbedbed a siuumiso isu a napukolan ti dadduma gapu iti dayta! Ad-adda nga iparegtak a bendaan ti intero a gurong wenno takiag iti kairut a kaasping ti panangbenda iti napilay a pungngopunguan. Bayat nga agtalinaed ti gita iti aglawlaw ti nakagat a gurong wenno takiag, mamantiner ti suplay a dara a mamagtalinaed iti gurong wenno takiag a “sibibiag.”

P. R., Inglatera

Ti sumagmamano kadagiti nabiit pay a libro ti medisina umanamongda iti daytoy a punto, ket agyamankami iti managbasami para iti daytoy a panangilawlawag.​—ED.

Ti Raven Masakitak idi rimmuar ti artikulo a “Ti ‘Raven’​—Aniat’ Nakaidumaanna?” (Enero 8, 1997) Gistay awan ti mangpaisem idi kaniak. Ngem ti kinalaing ti raven pinagkatawanak. Idi agangay, nangisaganaak iti para eskuela a report maipapan kadagiti billit, nga inusarko dagiti impormasion kadagiti artikulo ti Agriingkayo! Nagngato ti nagun-odak a marka iti dayta!

J. B., Slovakia

Pakarigatan nga Agsursuro Pagyamanan kadagiti serye ti “Tulong Para Kadagiti Ubbing a Marigatan nga Agsursuro.” (Pebrero 22, 1997) Imatmatonak ti maysa a pribado nga eskuelaan ket adu ti impa-xerox-ko para kadagiti mannursurok. Imbasarko met dagiti pagiwarnak kadagiti impormasion nga adda iti magasinyo. Pagyamanan ti natimbeng a panangtamingyo kadagitoy a tema.

E. G., Honduras

Siak ti direktor ehekutibo ti kadakkelan a di agganansia nga organisasion iti nasion a siaaktibo a tumultulong kadagiti ubbing ken adulto nga addaan iti ADD. Makomendarankayo iti mannakipagrikna nga artikulo ti magasinyo maipapan iti Attention Deficit Hyperactivity Disorder (ADHD) ken Attention Deficit Disorder (ADD). Makabaldado dagitoy ken saksakit a masansan a di umiso ti pannakadeskribirda. Apresiarenmi ti panangbigbigyo a ti umiso a diagnosis ken dagiti napaneknekanen a panangagas ti madaman a mangpapaimbag iti adu nga indibidual nga agpatpatulong. Ti panangipaganetgetyo iti panagayat ken pannakaawat ti nagannak makaipaayda met iti napateg a mensahe.

L. R., Estados Unidos

Adda barok nga addaan iti ADHD, ket marigatanak a mangaklon nga isut’ saan la a mannakiapa nga ubing. Adu a makapasair a sasao ti naisawangen a kas iti, “Apay a dida disiplinaen?” Makapasair unay dagitoy a sasao agsipud ta kinapudnona adu a tiempo ti busbusbosek a mangdisiplina kenkuana. Sapay koma ta ti panangilawlawagyo iti daytoy a sakit ti tumulong kadagiti sabsabali a mangamiris a talaga nga adda parikut ket ad-adda pay koma a makaparegta ti sabsabali.

M. T., Estados Unidos

Madarepdepyo la koma no kasano a dakami, kas nagannak ti ubing a marigatan nga agsursuro, ti nangtagiragsak iti daytoy a ruar. Nangnangruna nga apresiarenmi ti panangdakamatyo no kasano nga apektaran daytoy dagiti nagannak ken umdasen ti dadagsen nga aw-awitenmi a makangngeg kadagiti makapasair a komento dagiti sabsabali.

J. C. ken B. C., Canada

Gayyem ti Dios Pagyamanan unay iti artikulo nga “Agimtuod Dagiti Agtutubo . . . Kasano nga Agbalinak a Gayyem ti Dios?” (Pebrero 22, 1997) Dakkel ti naitulongna kaniak. Mariknak a kontentoakon, ta maawatakon a ni Jehova ket gayyemko! Segseggaak unay ti artikulo no kasano a mataginayon daytoy a pannakigayyem.a

T. E., Italia

[Footnote]