Pakasarakantay Kadagiti Sungbat?

Umad-adu a tattao ti marirriribukan kadagiti parikut ken narikut a saludsod a maipaspasango kadakuada ita. Kasano ti rumbeng a panangmatmattayo iti panagulbod? Umiso kadi ti panagsugal? Ti ngay panangay-ayam iti espiritismo? Kasano ti rumbeng a panangmatmattayo iti panangiregreg? Dakes kadi ti agbartek wenno ti panagdenna ti tattao a di pay nagkasar?

Nagadu dagiti saludsod. Ket saan laeng a ti biagtayo ti apektaranda no di pay ket ti biag dagiti patpatgentayo. Tarigagayan dagiti tattao ti sungbat a pakagunggonaanda. Nagsurat iti Watch Tower Society ti maysa kadagita a tattao, a taga Mississippi, idiay Estados Unidos:

“Iti likudan ti libroyo a napauluan Ti Sekreto ti Kinaragsak iti Pamilia, nakitak ti nayimprenta a saludsod a mangyim-imtuod no kayatko ti ad-adu nga impormasion wenno libre a panagadal iti Biblia iti pagtaengan. Talaga a kayatko!

“Nanipud idi kalgaw ti 1995, basbasaek ken ad-adalekon ti Bibliak. Ikagkagumaak unay a tarusan ti Biblia tapno mausarko kadagiti naespirituan a panggep ken nangnangruna pay, tapno isurok kadagiti dadduma. No kunayo a mangipatulodkayo iti libre nga impormasion, kayatko a magun-odan dayta!”

No kayatmo met ti umawat iti kopia ti 192-panidna a libro a Ti Sekreto ti Kinaragsak iti Pamilia wenno kayatmo nga adda libre a mangyadal kenka iti Biblia iti pagtaengam, pangngaasim ta agsuratka iti Watch Tower, P.O. Box 2044, 1060 Manila wenno iti maitutop a direksion a nailista iti panid 5.