“Addanto Ngata Tiempo nga Agiinnayat Amin a Tattao?”
Kabayatan ti Oktubre ken Nobiembre idi 1997, nasurok a 300 a milion a kopia ti uppat-panidna a polieto nga “Addanto Ngata Tiempo nga Agiinnayat Amin a Tattao?” ti naibunong iti intero a lubong iti nasurok a 100 a lenguahe. Adu ti makaay-ayo a komento maipapan iti dayta, agraman ti sumaganad a panangusig ti Express-Times idiay Easton, Pennsylvania, E.U.A.:
“Ipatuldona dagiti pagarigan ti kinaawan pannakaseknan dagiti agkakaarruba—nga agririnnanggasda pay, a kas ti napasamak idiay Bosnia-Herzegovina ken Rwanda, a nagpipinnatayan dagiti nabayagen nga agkakaarruba nga agduduma ti etniko ken narelihiosuan a grupoda.
“Maipapan iti mapaspasamak kadagiti pagtaengan iti pagilian, insalaysayna dagiti lallakay ken babbaket a maymaysada nga agbibiag nga awan man la mangsarungkar kadakuada, ket silalawag a naretrato ti rupa ti maysa a babai a mabutbuteng nga agsirsirip iti nalukatan bassit a de kadena a ridaw.”
Nakaawat ti sanga nga opisina dagiti Saksi ni Jehova idiay Slovenia iti sumaganad a kiddaw manipud iti The Philosophical Literature Club Impresie: “No maipapan iti pannakailawlawag ti narelihiosuan a kinapudno, nakalkaldaang ta solsoluen dayta ti Iglesia Romana Katolika iti Slovenia. Tapno lalo a maawatanmi dagitoy a narelihiosuan a kinapudno, sidadayaw unay a kiddawenmi a patulodandakami iti 50 a kopia ti tract a napauluan iti “Addanto Ngata Tiempo nga Agiinnayat Amin a Tattao?” Patienmi nga adda naisangsangayan iti dayta, saan laeng a ti linaonna no di pay ket dagiti ladawanna.”
No kayatmo met ti umawat iti pammaneknek a mabalin nga agbiag a sitatalna ken sangsangkatunos ti sangatauan, pangngaasim ta suratam ken ikoreom ti sumaganad a kupon.
◻ Patulodandak iti kopia ti broshur a Pudno Aya a Maseknan ti Dios Kadatayo?
◻ Pangngaasiyo ta pakaammuandak maipapan iti libre a panagadal iti Biblia iti pagtaengan.