Panangipaay Kadagiti Tattao iti Napaypayso a Namnama

MAYSA a 17 anyos a barito manipud Moldova, dati a republika ti Soviet, ti nagsurat iti opisina dagiti Saksi ni Jehova sadiay tapno iyebkasna ti apresasionna iti serye dagiti artikulo ti Setiembre 8, 1998 a ruar ti Agriingkayo a napauluan iti “Ania ti Namnama Dagiti Agtutubo Itatta?” Inlawlawag ti nagsurat:

“Diak malapdan ti makalua, ket nagsuratak tapno agyaman kadakayo. Adda dagiti kaririknak iti di pay unay nabayag nga impalagip dagiti artikulo. Agpakamatayak koma idin ngem sinalbardak dagiti Saksi ni Jehova nupay dida ammo dayta. Iti pannakisaritak kadakuada maipapan ti namnama iti masanguanan ken iti pannakapabileg ti panagtalekko iti panangngaasi ti Namarsua ket timmulong tapno in-inut a makalung-awak manipud iti awanan namnama a kasasaad. . . .

“Ti panangtulongyo kadagiti tattao a mangammo nga itdento ti Dios ti nasaysayaat a kasasaad ti panagbiag sigun iti panggepna ket pudno nga ebkas ti ayat iti kaarrubayo. Di mailibak nga adu ti ibunga dagitoy a panagregget. Makomendaran dagiti panagreggetyo a mangitampok kadagiti kangrunaan a parikut ti kagimongan. Itultuloyyo daytoy makagunggona a trabaho. Padpadaanakto ti tunggal baro a ruar daytoy a magasin.”

Kastoy ti kunaen ti parapo a “No Apay Maipabpablaak ti Agriingkayo!” nga agparang iti panid 4 iti tunggal ruar: “Pabilgen daytoy a magasin ti panagtalek iti kari ti Namarsua a natalna ken natalged a baro a lubong a dandanin mangsukat iti agdama a dakes, nakillo a sistema ti bambanag.” Ti naibatay-Biblia a kari ti Dios ti nangpabileg kadagiti minilion a tattao iti intero a daga a mangsango kadagiti parikut kadagitoy nariribuk a tiempo.

Masarakanyo ti napaypayso a namnama nga ituktukon ti Namarsua kadatayo iti nagpintas pannakailadawanna a 32-pinanid a broshur nga Ania ti Panggep ti Biag? Kasanoyo a Masarakan Dayta? Kitaenyo nangnangruna dagiti benneg a “Ti Panggep ti Dios Dandanin Matungpal” ken “Agbiagkay nga Agnanayon iti Paraiso a Daga.” Mabalinyo ti agkiddaw iti daytoy a broshur babaen ti panagsurat ken panangibusonyo iti naipakuyog a kupon iti direksion a naipakita iti kupon wenno iti maitutop a direksion a nailista iti panid 5 daytoy a magasin.

◻ Patulodandak ti kopia ti broshur nga Ania ti Panggep ti Biag? Kasanoyo a Masarakan Dayta?

◻ Interesadoak a maaddaan iti libre a panagadal iti Biblia iti pagtaengan.