Awisendakayo a Dumngeg iti Libre a Palawag Publiko a
“No Apay nga Imutektekantayo Dagiti Nakaskasdaaw nga Ar-aramid ti Dios”
MANGRUGI ita a bulan, ti nadakamat iti ngato ket maipalawag kas tampok iti 54 a tallo-aldaw a “Managtungpal iti Sao ti Dios” a Kombension Distrito dagiti Saksi ni Jehova iti Pilipinas. Kadagitoy a kombension, 18 ti maangay iti Cebuano, 15 iti Tagalog, 11 iti Iloko, 1 iti Ingles, ken 9 iti 4 a dadduma pay a lenguahe iti Pilipinas. Ti tema a mabasa iti ngato ket maitampok iti nasurok a 2,000 a kakasta a kombension iti nasurok a 150 a pagilian iti intero a lubong.
Kabayatan ti maika-20 a siglo, adu ti nakaskasdaaw a naaramidan ti tattao ket sigurado nga ad-adunto pay iti maika-21 a siglo. Ngem awan kaimudingan dagitoy no idilig kadagiti naaramidan ti Dios! Di pakasdaawan nga indagadag ti maysa a masirib a tao idi ugma: “Agintekka ket ipakitam a sipapaliiwka iti nakaskasdaaw nga ar-aramid ti Dios”!—Job 37:14, NW.
Ania dagiti leksion a maadaltayo kadagiti parsua iti aglawlawtayo, kas iti danum ti taaw, tudo, niebe, ken ti angin? Kasano koma nga impluensiaan ti naggubuayan dagitoy ti panagbiagtayo ita a panawen? Dagitoy ken ti dadduma pay a saludsod ti masungbatan kabayatan ti palawag.
Makiumankayo kadagiti Saksi ni Jehova iti lugaryo wenno agsuratkayo kadagiti nangipablaak iti daytoy a magasin tapno maammuanyo ti pagasambleaan a kaasitgan iti lugaryo.